१ कोटीच्या बंगल्याचा मालक, विमानाने यायचा चोरी करायला, सोलापूरमध्ये फसला डाव

 १ कोटीच्या बंगल्याचा मालक, विमानाने यायचा चोरी करायला, सोलापूरमध्ये फसला डाव

 सोलापूर (कटूसत्य वृत्त):- सोलापूर गुन्हे शाखेच्या पोलिसांनी एका हायप्रोफाईल चोराच्या मुसक्या आवळल्या आहेत. हा संशयित चोरी करण्यासाठी विमानाने प्रवास करत होता. या आंतरराज्य चोरट्याच्या मुसक्या शहर गुन्हे शाखेच्या पथकाने आवळल्या आहेत. संशयितावर विविध राज्यात ३५ गुन्हे दाखल आहेत, सध्या तो न्यायालयीन कोठडीत आहे. वेळ वाचवण्यासाठी तसेच चोरी करुन एका राज्यातून दुसऱ्या राज्यात पळून जाण्यासाठी तो विमान प्रवास करत असल्याची माहिती समोर आली आहे. अनिलकुमार मिस्त्रीलाल राजभर (वय ३८, रा. बोदरी, ता. केराकत, जि. जौनपूर उत्तर प्रदेश) असे हायप्रोफाईल चोरट्याचे नाव आहे.

सोलापूर पोलिसांनी पकडून त्याच्याकडून घरफोडीचे दोन गुन्हे उघडकीस आणले आहेत. गुन्हेगाराकडून पोलिसांनी ११० ग्रॅम सोन्याचे व ११३ ग्रॅम चांदीचे दागिने असा ९ लाख रुपये किंमतीचा ऐवज जप्त केला आहे. त्याच्याकडून जेलरोड पोलिस व नाशिक जिल्ह्यातील सिन्नर पोलिस ठाण्यातील गुन्हा उघडकीस आला. संशयित चोरट्याने १० मार्च रोजी प्राथमिक शिक्षणाधिकारी कादर शेख (रा. फ्लॅट नं. ६०२, सेंटर पार्क अपार्टमेंट, सिध्देश्वर पेठ, सोलापूर) यांचे घर फोडून १० तोळे सोने चांदीचे दागिने व रोख रक्कम लंपास केली होती.

अनिलकुमार या संशयितावर महाराष्ट्र राज्यात विविध शहरात चोरीचे गुन्हे दाखल आहेत. पोलिसांकडून मिळालेल्या माहितीनुसार हा अनिलकुमार हायप्रोफाईल सराईत गुन्हेगार आहे. उत्तर प्रदेश, जौनपूर या ठिकाणी अलिशान बंगला आहे. अनिलकुमार याचा जवळपास एक कोटीचा बंगला आहे. गुजरात, कर्नाटक, महाराष्ट्र, उत्तर प्रदेश या राज्यांमध्ये मिळून दिवसा घरफोडीचे ३५ गुन्हे दाखल आहेत.

पळून जाण्याच्या तयारीत असताना पोलिसांनी आवळल्या मुसक्या

अनिलकुमारने सोलापुरात दिवसा घरफोडी केली होती. आणखी एक घरफोडी करून निघून जाण्याच्या बेतात होता, त्यापूर्वीच त्यास तांत्रिक माहितीच्या आधारे ताब्यात घेण्यात आले. सहाय्यक पोलिस निरीक्षक शैलेश खेडकर, गुन्हे शाखा यांनी ताब्यात घेतले. त्याच्याकडे अधिक चौकशी केली असता त्याने घरफोडी केल्याचे कबूली दिली. पोलिसांनी त्याच्याकडून सोन्या-चांदीचे दागिने हस्तगत केले. अनिलकुमारला सोलापूर शहरातील जेलरोड पोलिसांच्या ताब्यात देण्यात आले आहे.