मोहोळ नगरपरिषद निवडणुकीसाठी राजकीय पडघम सुरू २० जागांसाठी २०० जण रिंगणात उतरण्याची चिन्हे

 मोहोळ नगरपरिषद निवडणुकीसाठी राजकीय पडघम सुरू

२० जागांसाठी २०० जण रिंगणात उतरण्याची चिन्हे

मोहोळची निवडणूक पंचरंगी होण्याची शक्यता,निवडणुकीचे रिंगाण पेटणार हिंगाण भाग १

मोहोळ (साहील शेख):- करोना महामारीमुळे तब्बल एक वर्ष लांबणीवर पडलेल्या मोहोळ नगरपरिषदेच्या निवडणुकीची रणधुमाळी आता हळूहळू सुरू झाल्याचे जाणवत आहे. येत्या काही दिवसातच प्रभाग निश्चिती होऊन नव्याने आरक्षण सोडत होण्याची शक्यता आहे. जरी आरक्षण सोडत नव्याने होणार असली तरी यापूर्वी आपापल्या पक्षाच्या ताब्यात असलेले नगर परिषदेचे प्रभाग हे पुन्हा आपल्याच ताब्यात रहावे.यासाठी मोहोळ शहरातील राष्ट्रवादी शिवसेना भाजप आणि काँग्रेस त्याचबरोबर अपक्ष आघाड्यांनीही रणनीती आखण्यास सुरुवात केली आहे.दोन सदस्यीय प्रभाग रचना होणार असल्यामुळे आता १७ प्रभागांचे दहा प्रभाग होणार असून त्यामधुन वीस नगरसेवक मोहोळ शहरवासीयांना निवडून द्यायचे आहेत.गत निवडणुकीच्या निकालाच्या पक्षीय बलाबलामध्ये शिवसेना सहा, राष्ट्रवादी चार, मोहोळ विकास आघाडी तीन तर भाजपाचे दोन आणि काँग्रेस दोन असे एकूण १७ सदस्य निवडून आले होते. निवडणुकीच्या निकालाच्या दिवशीच राष्ट्रवादीचे ज्येष्ठ नेते राजन पाटील यांनी सत्ता स्थापन करणाऱ्या पक्षाला बाहेरून पाठिंबा देण्याचा गुगली टाकून सर्वांनाच चकित केले होते. मात्र नंतरच्या काळात निवडणुकीपूर्वी राष्ट्रवादीला विरोध केलेल्या मोहोळ विकास आघाडीने नंतर पुन्हा राष्ट्रवादीमध्येच जाऊन रमेश बारसकर यांच्या रूपाने नगराध्यक्षपद खेचून घेतले. शिवसेनेला बेरजेचे राजकारण करत काँग्रेस आणि भाजपला सोबत घेऊन सत्ता स्थापन करण्याची चांगली संधी उपलब्ध होती. तरीही केवळ समन्वयाअभावी सर्वात जास्त जागा जिंकूनही शिवसेनेला हात चोळत बसावे लागले. शिवाय सर्वात जास्त मतदान हे शिवसेनेनेच खेचून घेतले होते.राष्ट्रवादीने जिंकलेल्या चार जागांपैकी एक जागा ही काठावरच्या मताने जिंकली होती. निवडणुकीत समन्वय असता तर ती जागा नक्कीच शिवसेनेला मिळाली असती. गत निवडणुकीतील चुका सुधारून यावेळी काहीही झालं तरी नगरपरिषदेवर भगवा फडकवायचा असा निर्धार शिवसैनिकांनी केल्याचे जाणवत आहे. गेल्या काही महिन्यांपूर्वी झालेल्या शिवसेनेच्या बैठकीमध्ये मोहोळ नगर परिषदेच्या निवडणुकीसाठी उमेदवारी वाटपाचे सर्वाधिकार जिल्हा प्रमुख गणेश दादा वानकर यांना सर्वानुमते देण्यात आले आहेत . जिल्हाप्रमुख वानकर यांना मोहोळ शहराच्या शिवसेनेतील अनेक गमतीजमती ज्ञात असल्यामुळे यापुढील काळातील भक्कम पक्षबांधणीसाठी आणि मोहोळ नगरपरिषदेवर भगवा फडकविण्यासाठी जिल्हा प्रमुख गणेशदादा वानकर कोणती भूमिका घेणार ? याकडे सर्व शिवसैनिकांचे लक्ष लागले आहे.शहरातील राष्ट्रवादी आणि शिवसेना आणि इतर पक्षामधील काही नाराज इच्छुकांना हेरून मोट बांधणी करून नव्याने पुन्हा अपक्ष आघाडीची निर्मिती करण्याचा पवित्रा तिसऱ्या आघाडीने देखील घेतला आहे. त्यामुळे राष्ट्रवादी आणि शिवसेनेला उमेदवारी वाटप प्रसंगी मोठी कसरत आणि बंडखोरांना थंड करण्यासाठी मेहनत घ्यावी लागणार आहे. मोहोळ शहरात केवळ शिवसेना याच पक्षाची शाश्वत व्होट बँक आजही शाबूत आहे. आजवर पार पडलेल्या गत दहा वर्षातील सर्वच निवडणुकीमध्ये सर्वात जास्त मतदान हे शिवसेनेनेच खेचून घेतले आहे. तरीही शिवसेनेला सत्तेपासून दूर ठेवण्यामध्ये राष्ट्रवादी यशस्वी होत आली आहे. मात्र गत पाच वर्षाच्या काळात वरिष्ठ पक्षश्रेष्ठींच्या संपर्कात राहून नगर विकास खात्याच्या माध्यमातुन मोहोळच्या शिवसेना नेत्या सीमाताई पाटील यांनी कोट्यवधी रुपयांची विकासकामे पूर्ण केली आहेत. त्यामुळे शहराच्या पश्चिम भागात सध्या तरी शिवसेनेचा दबदबा स्पष्टपणे जाणवत आहे. मात्र शिवसेनेच्या काही प्रभागांना कोणत्याही स्तरावरून निधीच उपलब्ध न झाल्यामुळे त्या नगरसेवकांना शेवटपर्यंत निधीची वाटच पाहावी लागली हे देखील कोणी नाकारू शकणार नाही.मोहोळ शहराची सत्ता ताब्यात घेतल्यानंतर माजी आमदार राजन पाटील आणि विद्यमान आमदार यशवंत माने या जोडीने शरदचंद्र पवार आणि अजितदादा पवार यांच्याकडे पाठपुरावा करून मोहोळ शहरासाठी अनेक कोटी रुपयांचा निधी खेचुन आणला. तरीही राष्ट्रवादीच्या माध्यमातूनच पूर्ण झालेल्या कॉंक्रीट रस्त्यावर उभे राहून आजही त्यांना विरोध करणारे अनेक जण त्यांनी शहरासाठी काय केलं ? असा सवाल उपस्थित करत आहेत. वास्तविक पाहता वरिष्ठ नेत्यांचे काम हे निधी खेचून आणणे असते. त्या निधीचा विनियोग विकास कामासाठी प्रामाणिकपणे करणे हे नगरसेवकांचे कर्तव्य असते. त्यामध्ये काही नगरसेवक उत्कृष्ट कामे करून यशस्वी झाले तर काही नगरसेवक निकृष्ट दर्जाच्या कामांमुळे अपयशी ठरले. त्यामुळे येत्या निवडणुकीत नगरसेवकांच्या विकासकामांचे मूल्यमापन करूनच त्यांना पुन्हा संधी द्यायची की नाही हे पक्षश्रेष्ठी ठरवणार असल्याचे समजते.