"आजी मला लय लागलंय गं... मला सोडून जाऊ नकोस" शिवांशूचे शेवटचे शब्द ठरले

 "आजी मला लय लागलंय गं... मला सोडून जाऊ नकोस" शिवांशूचे शेवटचे शब्द ठरले  

सोलापूर (कटूसत्य वृत्त):-  दुचाकीने धडक दिली अन् हँडलमध्ये सहा वर्षांच्या चिमुकल्याचं टीशर्ट अडकलं. त्यामुळे शिवांशू काही अंतर फरफटत गेला. अपघातात गंभीर जखमी झाल्यामुळे त्याचा उपचारादरम्यान मृ्त्यू झाला.  सोलापुरातील गेंट्याल चौकातून गीतानगरकडे आजीचे बोट धरुन जणाऱ्या सहा वर्षांच्या चिमुरड्याला दुचाकीने जोरदार धडक दिली.  यात गंभीर जखमी झाल्याने त्याचा उपचारादरम्यान अंत झाला. शिवांशू लक्ष्मीनारायण बोद्धूल, वय 6 वर्ष, रा. अशोक चौक सोलापूर शहर, असे त्या चिमुकल्याचे नाव आहे.  टी-शर्ट दुचाकीच्या हँडलमध्ये अडकल्यानंतर ब्रेक लागला नाही, त्यामुळे शिवांशू काही अंतर फरफटत गेला. आजी मला लय लागलंय गं... मला सोडून जाऊ नकोस, हे त्याचे शेवटचे शब्द ठरले. शनिवारी सायंकाळी सोलापूर शहरातील गेंट्याल चौकात हा अपघात झाला. शिवांशूच्या डोक्याला गंभीर जखम झाली होती.  अपघातात गंभीर जखमी झालेल्या शिवांशूला एका खाजगी दवाखान्यात उपचारासाठी नेण्यात आले होते. तिथे प्रथमोपचार करुन शिवांशूला शासकीय रुग्णालयात उपचारासाठी दाखल करण्यात आले. शिवांशू गंभीर जखमी अवस्थेतही बोलत होता. शेवटच्या क्षणी शासकीय रुग्णालयात शिवांशू म्हणाला, आजी मला लय लागलंय... मला सोडून जाऊ नको. गंभीर जखमी झालेला शिवाशू रक्तबंबाळ झाला होता. उपचार सुरु असताना माझा नातू गेला... असे सांगत आजींनी हंबरडा फोडला .

अंतर्गत आणि बाहेरून अतिरक्तस्त्राव सुरू झाला होता. शिवांशु बोद्धूल याला खासगी रुग्णालयात प्रथमोपचार आणि मलमपट्टी करून पुढील उपचारासाठी शासकीय रुग्णालयात दाखल करण्यात आले होते. शासकीय रुग्णालयात तासभर फॉरमॅलिटी करण्यात वेळ गेल्याचा दावा केला जात आहे.आजी उमा नागेश फलमारी, वय 60 वर्ष, रा. उत्तर सदर बझार, येमूल विहार, या शिवांशूसोबत होत्या. उमा फलमारी यांनी सदर बाजार पोलीस ठाण्यात फिर्याद दिली आहे.

"मी नातू शिवांशू आणि नात वैभवी यांना घेऊन सोलापूर शहरातील सरस हॉटेलसमोर रिक्षातून उतरले. वैभवी कडेवर होती. शिवांशूने हात धरला होता. गुरुनानक चौकातून गेंट्याल चौकाकडे डबलसीट येणाऱ्या दुचाकीने (एमएच 13 सीएफ 2653) शिवांशूला जोरदार धडक दिली.  सिव्हिलला नेल्यानंतर तो म्हणत होता, 'आजी मला खूप लागलं आहे गं, तू मला सोडून जाऊ नको..!' सिव्हिलमध्ये केसपेपर घेऊन या म्हणाले. त्यानंतर एका तासाने त्याच्यावर उपचार सुरु झाले. परंतु त्याच वेळी शिवांशू गतप्राण झालेला होता.