"दारूमुळे माझा भाऊ गेला, आता तरी निर्णय घ्या"

 "दारूमुळे माझा भाऊ गेला, आता तरी निर्णय घ्या"

 स्मशानभूमीत तरुणाच्या आक्रोशाने अख्खं गाव गहिवरलं!

सोलापूर (कटूसत्य वृत्त):- "माझ्या भावाला कोणतेही व्यसन नव्हते, फक्त दारूच्या व्यसनात माझा भाऊ जगाला सोडून गेला. गाववाल्यांना व सरपंचाला हात जोडून विनंती आहे की गावातील दारूधंदे बंद करा," असं म्हणत मंगळवेढा तालुक्यातील अकोले येथील विनोद सरवदे या तरुणाने त्याचा बंधू अनिल सरवदे यांच्या निधनाच्या तिसऱ्या दिवशी स्मशानभूमीत अस्थीविसर्जनाच्या कार्यक्रमात आक्रोश केला. दारुबंदीबाबत एका भावाचा आक्रोश सोलापुरात आणि सोशल मीडियावर प्रचंड वायरल होता आहे. भावनाविवश झालेल्या भावाचा आक्रोश पाहून सोलापुरात हळहळ व्यक्त होत आहे.

मंगळवेढ्यापासून हाकेच्या अंतरावर असलेल्या अकोले या गावातील हा व्हिडिओ आहे.अस्थीविसर्जनाचे विधी करताना गावात दारूबंदी करा अशी मागणी मयत झालेल्या तरुणाच्या भावाकडून होत आहे. मंगळवेढा तालुक्यातील अकोले गावची लोकसंख्या दोन हजाराच्या आसपास आहे. गावातील काही क्षेत्र उजनी लाभक्षेत्रात येत असल्यामुळे तरुणाईच्या हातात पैसा मोठ्या प्रमाणात खिळू लागला आहे. अकोले गावात अवैध दारू धंद्याने धुमाकूळ घातला असून यापायी अनेक ग्रामस्थ दारूच्या आहारी गेले आहेत. दारूच्या व्यसनात गावातील एका तरुणाचं निधन झाल्यानंतर तिसऱ्या दिवशीच्या अस्थीविसर्जनाच्या कार्यक्रमासाठी नातेवाईक,पाहुणे, यासाठी आले होते.

भावनाविवश झालेल्या भावाची विनंती

अकोले गावात अंत्यविधी केलेल्या ठिकाणासमोर डोळ्यातील अश्रू ढाळत भाऊ विनोद सरवदे म्हणाला, "शेजारच्या मारापूर गावाचा आदर्श घ्या, तिथला सरपंच गावातील दारूबंदी करून आदर्श झाला आहे. तुम्ही पण आदर्श सरपंच व्हा आणि आज दुपारपासून गावात एकही दारूचा थेंब विकणार नाही याची काळजी घ्या ," असे आवाहन केले.

"लिव्हर संबंधित रुग्णांच्या संख्येत वाढ"

सोलापूर मधील दवाखान्यामध्ये या गावातील रुग्ण उपचारासाठी गेल्यानंतर सर्वाधिक आजार लिव्हरशी संबंधित आहेत. ग्रामस्थांनी आज निर्णय नाही घेतला तर येत्या काही दिवसांत तुम्हाला आणखीन काहींचे अंत्यविधी करण्यासाठी या ठिकाणी यावे लागेल. या दारूमुळे अनेकांचे संसार उद्ध्वस्त झाले आहेत. गावातील तरुणांचे मृतदेह बघायचे नसतील तर दारूबंदी सारख्या विषयावर सर्वांनी एकजूट करण्याचे आव्हान यावेळी करण्यात आले.

दारू विक्रेत्याला तंबी गावातील जगन्नाथ इंगळे पाटील म्हणाले की, दारूबंदी आजपासून करण्यासाठी सगळ्यांनी सोबत या. सगळे एकसंध राहिले तर आपण दारूबंदी करू शकतो. यावेळी अस्थीविसर्जनाला एक विक्रेता देखील आला होता. त्याला देखील यावेळी तंबी देण्यात आली. दारूबंदीसाठी तालुक्यात पहिल्यांदाच अस्थीविसर्जनाच्या कार्यक्रमात आवाज उठवल्याने पोलीस याबाबत कोणती भूमिका घेतात याकडे ग्रामस्थांचे लक्ष लागले आहे.