सोलापूर जिल्ह्यात भूकंपाचे धक्के! सांगोल्यात केंद्रबिंदू

 सोलापूर जिल्ह्यात भूकंपाचे धक्के! सांगोल्यात केंद्रबिंदू

सोलापूर (कटूसत्य वृत्त):- सोलापूर जिल्ह्यात (३ एप्रिल) भूकंपाचे सौम्य धक्के बसल्याची माहिती समोर आली आहे. या भूकंपाचा केंद्रबिंदू सोलापूर जिल्ह्यातील सांगोला येथे असल्याचे समजते. या भूकंपाविषयी राष्ट्रीय भूकंपशास्त्र केंद्राने ट्विट करत माहिती दिली आहे. त्यामुळे, सोलापूर जिल्ह्यासह आसपासच्या परिसरातील नागरिकांमध्ये भीतीचे वातावरण पसरले आहे.

सोलापूर जिल्ह्यातील पंढरपूर, सांगोला आणि मंगळवेढा येथे २.६ रिश्टर स्केल एवढ्या तीव्रतेच्या भूकंपाचे धक्के जाणवले आहेत. आज सकाळी ११ वाजून २२ मिनिटांनी काही क्षणांसाठी भूकंपाचे सौम्य धक्के जाणवले असल्याची माहिती आहे. सुदैवाने या भूकंपाच्या धक्क्यामुळे कोणत्याही पद्धतीची हानी झालेली नाही. मात्र, भूकंपाचे वृत्त समजताच नागरिकांच्या मनात काहीशी भीती निर्माण झाली आहे. सोलापूर जिल्ह्यातील सांगोला येथे भूकंपाचे केंद्रस्थान आहे.

जगाच्या पाठीवर अलिकडे सतत भूकंप होत असल्याच्या बातम्या समोर येत आहेत. काहीच दिवसांपूर्वी थायलंडमध्ये भूकंपाचे मोठे धक्के बसले होते. या भूकंपाची तीव्रता इतकी होती की बँकॉकसह शेजारील देशांचं मोठं नुकसान झालं. जीवित हानीसहित मालमत्तेचेही खूप मोठे नुकसान झाले. उंचच उंच इमारती पत्त्याच्या बंगल्यासारख्या क्षणात कोसळल्याचं दिसून आलं. या दुर्घटनेत मोठी वित्तहानी व जीवितहानी झाली होती, हजारांपेक्षा अधिक नागरिकांना आपला जीव गमवावा लागला होता. या घटनेचे व्हिडिओ देखील मन हेलावून टाकणारे आहेत.

दरम्यान, महाराष्ट्रातील सातारा जिल्ह्यात सातत्याने भूकंपाचे सौम्य धक्के बसत असतात. या भूंकपाचे केंद्र साधारणतः कोयना परिसरात असल्याचे पहायला मिळते. भूकंपाच्या सौम्य धक्क्यांनी देखील येथील परिसर काहीसा हादरुन जातो. १९९३ साली ३० सप्टेंबरला भारतीय प्रमाणवेळेनुसार पहाटे ३.५६ वाजता लातूर व उस्मानाबाद जिल्ह्यांत एक भूकंप झाला. त्याला लातूरचा भूकंप म्हणले जाते. या भूकंपाचे केंद्र सोलापूरच्या ईशान्येस ७० किमी अंतरावर होते. रिश्टर स्केलवर ६.०४ तीव्रता मोजला गेलेल्या ह्या भूकंपात अंदाजे ७,९२८ माणसे मृत्युमुखी पडले, १५,८५४ जनावरांचा मृत्यू झाला, तर सुमारे १६,००० लोक जखमी झाले होते.