मराठी भाषेचे सौष्ठव व सौंदर्य निर्विवाद आहे - प्राचार्य भीमाशंकर पैलवान सांगोला विद्यामंदिरमध्ये मराठी भाषा गौरव दिन उत्साहात साजरा..

 मराठी भाषेचे सौष्ठव व सौंदर्य निर्विवाद आहे - प्राचार्य भीमाशंकर पैलवान

सांगोला विद्यामंदिरमध्ये मराठी भाषा गौरव दिन उत्साहात साजरा..

सांगोला (कटूसत्य वृत्त):-  संतकाव्य , पंडिती, शाहिरी वाङ् मय,बखर वाङ् मय, महानुभाव पंथाचे साहित्य,व प्राचीन, अर्वाचीन व आधुनिक मराठी साहित्यामध्ये जगण्याचा अर्थ आणि अन्वयार्थ आहे, संस्कृतीचा दिप आहे, आपण वेळोवेळी त्याचा आस्वाद घेतला तरच आपणास मराठी भाषेचे निर्विवाद सौष्ठव व सौंदर्य लक्षात येईल असे प्रतिपादन म.सा.प.सांगोला कार्यकारिणी सदस्य प्राचार्य भीमाशंकर पैलवान यांनी केले येथील सांगोला विद्यामंदिर प्रशाला व ज्युनिअर कॉलेजमध्ये महाराष्ट्र साहित्य परिषद शाखा सांगोला, लायन्स क्लब ऑफ सांगोला, सांगोला विद्यामंदिर प्रशाला व ज्युनिअर कॉलेज यांचे संयुक्त विद्यमाने  मराठी भाषा गौरव दिनानिमित्त आयोजित कार्यक्रमामध्ये अध्यक्षीय पदावरून मराठीच्या थोरवी विषयी भाष्य करताना ते  बोलत होते.यावळी व्यासपीठावर उपप्राचार्य गंगाधर घोंगडे, पर्यवेक्षक बिभीषण माने, मराठी विभाग प्रा.शिवशंकर तटाळे, लायन्स क्लब ऑफ सांगोला अध्यक्ष ला.प्रा.धनाजी चव्हाण उपस्थित होते.

   पुढे बोलताना प्राचार्य पैलवान यांनी  मराठीची रसाळता,शब्दांचे सामर्थ्य, भाषेचे संस्कृतीशी असणारे नाते सांगत अभिमान बाळगावा मात्र  यावेळी इतर भाषेचा द्वेष करू नये.मराठीतील चरित्रे,आत्मचरित्रे, प्रवासवर्णने वाचली पाहिजेत गांधीजी,आंबेडकर, स्वामी विवेकानंद यासारखे विचारवंत निर्माण व्हायला पाहिजेत.त्यांचे विचार ऐकण्यासाठी चांगले श्रोते निर्माण व्हायला पाहिजे असे सांगत तुम्ही वाचन केले तर सर्जनशील विचार करू शकाल असे सांगताना विद्यार्थ्यांनी दरवर्षी नवीन अवांतर  पुस्तक विकत घ्यावे, चांगली व्याख्याने ऐकावी, दैनिक वर्तमानपत्राचे वाचन करावे असे सांगत छत्रपती शिवाजी महाराज यांनी निर्माण केलेले शब्दकोश,सावरकरांचे भाषाशुद्धी करण याविषयी माहिती दिली व कुसुमाग्रज यांची 'कणा'कविता सादर करून विद्यार्थ्यांना खूप मोठी प्रेरणा दिली व 'पाडले' या क्रियापदाच्या गमतीदार छटा उदाहरणांच्या माध्यमातून सांगत उपस्थितांना मंत्रमुग्ध केले.व राष्ट्रीय विज्ञान दिनाच्या निमित्ताने माहिती देत वैज्ञानिक दृष्टिकोन अंगीकारा  असे सांगितले.

कार्यक्रमाच्या सुरुवातीला कै.  गुरुवर्य चं.वि.तथा बापूसाहेब  झपके यांच्या प्रतिमेला पर्यवेक्षक बिभीषण माने यांचे हस्ते पुष्पहार समर्पित करण्यात आला व व्यासपीठावर उपस्थितांच्या हस्ते ज्ञानेश्वरी या ग्रंथाचे पूजन करण्यात आले.

या प्रसंगी मराठी विषय शिक्षक प्रशांत रायचुरे यांचा सीबीएस न्यूज चॅनल शिक्षणरत्न पुरस्कार मिळाल्याबद्दल प्राचार्य व उपप्राचार्य यांचे हस्ते सत्कार करण्यात आला.   या कार्यक्रमासाठी लायन्स क्लब ऑफ सांगोला सचिव उन्मेष आटपाडीकर,मराठी विषय प्रमुख मच्छिंद्र इंगोले,प्रा.अमोल कोरे, शिक्षक,शिक्षकेत्तर कर्मचारी, लायन्स क्लब पदाधिकारी, सदस्य, महाराष्ट्र साहित्य परिषद शाखा सांगोला पदाधिकारी व सदस्य मोठ्या संख्येने उपस्थित होते.कार्यक्रमाचे प्रास्ताविक ला.प्रा.धनाजी चव्हाण यांनी केले.प्रा.शिवशंकर तटाळे यांनी आभार प्रदर्शन केले तर सौ.शैलजा झपके यांनी सूत्रसंचालन केले..  

मराठी साहित्य  आत्मभान देणारे, ऊर्जा देणारे आहे.कवी कुसुमाग्रज व व इतर मराठी साहित्यिकांचे साहित्य आस्वादक करावे. भाषेचे जतन व संवर्धनासाठी विद्यार्थ्यांनी वाचन करावे,मित्राला वाढदिवसानिमित्त पुस्तक भेट द्यावे.व वेळोवेळी दैनंदिन व्यवहारात सजगपणे मराठीचा वापर करावा, मराठी भाषेच्या विकासासाठी सामूहिक प्रयत्न केल्यास भाषा प्रगल्भ होईल.नवनिर्मिती होईल.त्यातून संस्कृती व व्यक्तीविकास होईल.उपप्राचार्य गंगाधर घोंगडे (म.सा.प.कार्यकारिणी सदस्य)