सोलापूर जिल्ह्यात येण्यासाठी चार हजार नागरिकांना परवानगी

सोलापूर जिल्ह्यात येण्यासाठी

चार हजार नागरिकांना परवानगी

 सोलापूर दि. 16 : राज्याच्या इतर जिल्ह्यातून तसेच परराज्यातून सोलापूर जिल्ह्यात येण्यासाठी 54 नागरिकांना आज परवानगी देण्यात आली आहे, अशी माहिती  जिल्हा प्रशासनाकडून आज देण्यात आली. कालअखेर 3976 नागरिकांना अशी परवानगी देण्यात आली होती. त्यामुळे जिल्ह्यात येण्यासाठी  चार हजार चार नागरिकांना परवानगी देण्यात आली आहे.

राज्याच्या इतर जिल्ह्यातून सोलापूर जिल्ह्यात येण्यासाठी आणि इतर जिल्ह्यात जाण्यासाठी तसेच परराज्यातून सोलापूर जिल्ह्यात येण्यासाठी आणि सोलापूर जिल्ह्यातून परराज्यात जाण्यासाठी covid19.mhpolice.in या वेबसाईटवर ऑनलाईन अर्ज करायचा आहे. या प्रणालीद्वारे प्राप्त झालेल्या अर्जानुसार परवानगी देण्यात येत आहे.

एक मे पासून covid19.mhpolice.in या वेबसाईट आजपर्यंत 45051 अर्ज प्राप्त  झाले असून 28964 जणांना परवानगी देण्यात आली आहे. 3082 अर्जांना परवानगी नाकारली असून 13005अर्ज प्रलंबित आहेत. नाकारण्यात आलेले बहुतांशी अर्ज वैद्यकीय प्रमाणपत्र जोडले नसल्यामुळे नाकारले आहेत. तर काही अर्ज इतर जिल्ह्यातून/राज्यातून मान्यता मिळाली नसल्याने  प्रलंबित आहेत. वैद्यकीय कारणाबाबतचे अर्ज तात्काळ समन्वय साधून परवानगी दिली जात आहे, असे जिल्हा प्रशासनाकडून सांगण्यात आले.

सोलापूर जिल्ह्यातून इतर जिल्ह्यात जाण्यासाठी एकूण  21289 नागरिकांनी ऑनलाईन अर्ज केले आहेत. त्यापैकी  16339 जणांना परवानगी दिली आहे तर 4920 जणांचे अर्ज प्रलंबित आहेत.

सोलापूर जिल्ह्यात अडकलेल्या उत्तर प्रदेश मधील 2928 मजुरांना रेल्वेद्वारे पाठवण्यासाठी  मंजुरीचे पत्र सादर करण्यात आले आहेत.  सोलापूर जिल्हृयातून परराज्यात जाण्यासाठी 28816 मजुरांनी अर्ज केले आहेत त्यापैकी आतापर्यंत 5953 मजुर रवाना झाले आहेत.

ज्येष्ठ नागरिकांना धान्य वाटप  जेष्ठ नागरिक व दिव्यांग सहाय्यता कक्ष यांच्या मार्फत जिल्ह्यातील 12 जेष्ठ नागरिक व दिव्यांगांना घरपोच किराणा धान्य देण्यात आले, अशी माहिती सामाजिक न्याय विभागाचे सहाय्यक आयुक्त कैलास आढे यांनी दिली.