कोरोनाचा सामना करण्यास राज्य सरकार अपयशी

कोरोनाचा सामना करण्यास राज्य सरकार अपयशी - चेतनसिंह केदार-सावंत

भाजपच्या वतीने शेतकऱ्यांच्या प्रश्नांसह इतर मागण्यांचे निवेदन सादर

सांगोला (तालुका प्रतिनिधी): राज्यातील पोलिसांना कोविडची लागण झाली असून पोलिसांवरील हल्ल्यांचं प्रमाण वाढले आहे. कोरोनाचा सामना करण्यास राज्य सरकार पूर्णपणे अपयशी ठरले आहे. संजय गांधी निराधार योजनेचे पैसे लाभार्थ्यांना मिळावेत, पीपीई किट्स उपलब्ध करावे, नीरा उजवा कालवा, म्हैसाळ, टेंभू योजनेतून मेथवडे बंधाऱ्यापर्यंचे बंधारे भरून द्यावेत, पाझर तलाव भरून द्यावेत, शेतकऱ्यांना खते, बियाणे उपलब्ध करावेत, कृषी व घरगुती वीज बिले माफ करावीत, कोरोनाशी लढा देत असलेले मंडळ अधिकारी, तलाठी, ग्रामसेवक, शिक्षक, पत्रकार, पोलीस पाटील याना विमा संरक्षण द्यावे अशा विविध मागण्यांचे निवेदन भाजपचे तालुकाध्यक्ष चेतनसिह केदार-सावंत यांनी तहसीलदार योगेश खरमाटे यांच्याकडे सादर केले.

यावेळी जिल्हा परिषद सदस्य अतुल पवार, युवा मोर्चाचे जिल्हाध्यक्ष गजानन भाकरे, उमेश मंडले, जगदीश केदार उपस्थित होते.

कोरोनावरील उपाययोजना व सोयी उपलब्ध करून महाविकास आघाडी सरकार अपयशी ठरले आहे. राज्यातील पोलिसांना कोविडची लागण झाली असून पोलिसांवरील हल्ल्यांचं प्रमाण वाढले आहे. राज्य सरकार शेतमाल खरेदी करत नसल्याने शेतकऱ्यांना बिनव्याजी कर्ज तातडीने उपलब्ध करून द्यावे. अवकाळी पावसामुळे झालेले नुकसान भरपाई सुद्धा देण्याची आवश्यकता आहे.

गरिबांचे मध्यमवर्गीयांचे, हातावर पोट असलेल्या लोकांचे अतोनात हाल चालू आहेत. संजय गांधी निराधार योजनेचे पैसे लोकांना तातडीने मिळावेत. पीपीई किटसची उपलब्ध नसून विलगीकरण केंद्रांची स्थिति भयावह आहे. तेथे जेवण, पाणी अशा प्राथमिक सोयीसुविधांचा पुर्णपणे अभाव आहे. वृत्तपत्र वितरणावर बंदी घालणाऱ्या या सरकारने दारूची दुकानं उघडण्याकरिता विलक्षण तत्परता दाखवली आहे. सर्वसामान्य लोकांकरीता आर्थिक पॅकेज घोषित करावे, अशी मागणी भाजपचे तालुकाध्यक्ष चेतनसिंह केदार-सावंत यांनी निवेदनाद्वारे केली आहे.

सांगोला तालुक्याचा पाणी प्रश्न सोडविण्यासाठी नीरा उजवा कालवा, म्हैसाळ, टेंभू योजनेतून मेथवडे बंधाऱ्यापर्यंत पाणी सोडावे. शेतकऱ्यांना फळे व भाजीपाला विक्रीसाठी भाजीपाला विक्री केंद्र सुरु करावे. विलगीकरण कक्षातील नागरिकांना सुविधा उपलब्ध करून द्याव्यात. ग्रामीण रुग्णालय व प्राथमिक आरोग्य केंद्रात औषधांचा मुबलक पुरवठा करावा. स्वस्त धान्य दुकानातून सर्वच शिधापत्रिका धारकांना धान्य मिळावे. शेतकऱ्यांना तातडीने राष्ट्रीयीकृत व सहकारी बँकांमधून कर्ज उपलब्ध व्हावे.

मायक्रो फायनान्स, पतसंस्था,बँकाचे हप्ते भरण्यास सहा महिने मुदतवाढ मिळावी. कामगारांच्या हाताला काम मिळण्यासाठी तालुक्यात मनरेगाची कामे तातडीने सुरु करावीत. शाळांमधील विद्यार्थ्यांची प्रवेश फी माफ करावी, शेतकऱ्यांना ठिबक सिंचन, तुषार सिंचन व शेततळे याचे अनुदान तातडीने मिळावे. कोरोनाशी लढा देत असलेले मंडळ अधिकारी, तलाठी, ग्रामसेवक, शिक्षक, पत्रकार, पोलीस पाटील याना विमा संरक्षण द्यावे अशा विविध मागण्यांचे निवेदन भाजपचे तालुकाध्यक्ष चेतनसिंह केदार-सावंत यांनी तहसीलदार योगेश खरमाटे यांना देण्यात आले आहे.