पुणे : महाराष्ट्र राज्य माध्यमिक आणि उच्च माध्यमिक शिक्षण मंडळाद्वारे घेण्यात येणारी बारावीची परीक्षा १८ फेब्रुवारीपासून तर इयत्ता दहावीची परीक्षा ३ मार्चपासून सुरू होणार आहे. मंडळाने आज दोन्ही परिक्षांचं सविस्तर वेळापत्रक वेबसाइटवर जाहीर केलं. फेब्रुवारी-मार्च महिन्यात राज्य माध्यमिक व उच्च माध्यमिक शिक्षण मंडळाच्या पुणे, नागपूर, औंरगाबाद, मुंबई, कोल्हापूर, अमरावती, नाशिक, लातूर आणि कोकण अशा ९ विभागीय मंडळांमार्फत एकाचवेळी उच्च माध्यमिक प्रमाणपत्र म्हणजेच बारावी आणि माध्यमिक शालांत प्रमाणपत्र म्हणजेच दहावीची लेखी परीक्षा होणार आहे. बारावीची परीक्षा मंगळवार दि. १८ फेब्रुवारी २०२० रोजी सुरू होऊन बुधवार दि. १८ मार्च २०२० रोजी संपणार आहे तर दहावीची परीक्षा मंगळवार दि. ३ मार्च २०२० रोजी सुरू होऊन सोमवार दि. २३ मार्च रोजी संपणार आहे. या दोन्ही परिक्षांचं दिनांकनिहाय सविस्तर वेळापत्रक मंडळाच्या mahahsscboard.in या वेबसाइटवर आजपासून उपलब्ध करून देण्यात आलं आहे.
विद्यार्थ्यांना अभ्यासक्रमाचे नियोजन करणे सोपे जावे व विद्यार्थ्यांच्या मनावरील ताण कमी करण्याच्या दृष्टीने हे वेळापत्रक ४ महिने आधी जाहीर करण्यात येत असल्याचेही मंडळाकडून नमूद करण्यात आले आहे. हे संभाव्य वेळापत्रक असेल. छापील स्वरूपातील अंतिम वेळापत्रक परीक्षेपूर्वी माध्यमिक शाळा, उच्च माध्यमिक शाळा व कनिष्ठ महाविद्यालयांना नंतर देण्यात येईल, असेही पुढे स्पष्ट करण्यात आले आहे. अन्य वेबसाइट्स, व्हॉट्सऍप व इतर सोशल माध्यमांतून प्रसिद्ध वा व्हायरल झालेले वेळापत्रक ग्राह्य धरू नये, असे आवाहनही मंडळाचे सचिव डॉ. अशोक भोसले यांनी केले आहे.
- प्रात्यक्षिक परीक्षा, श्रेणी, तोंडी परीक्षा व अन्य विषयांचे वेळापत्रक स्वतंत्रपणे परीक्षेपूर्वी मंडळाकडून शाळा व कनिष्ठ महाविद्यालयांना कळवले जाईल.
- वेळापत्रकांबाबत काही सूचना वा हरकती असल्यास त्या विभागीय मंडळाकडे तसेच राज्य मंडळाकडे १५ दिवसांच्या आत लेखी स्वरूपात पाठवाव्यात. त्यानंतर आलेल्या सूचनांचा विचार होणार नाही.
No comments:
Post a Comment