पुणे येथे शिक्षकेतर कर्मचाऱ्यांचा उच्च शिक्षण संचालक कार्यालयावर धडक मोर्चा यशस्वी

 पुणे येथे शिक्षकेतर कर्मचाऱ्यांचा उच्च शिक्षण संचालक कार्यालयावर धडक मोर्चा यशस्वी

१३ नोव्हेंबर रोजी लेखणी बंद आणि १८ नोव्हेंबर रोजी लाक्षणिक कामबंद आंदोलन

सोलापूर (कटूसत्य वृत्त):- राज्यातील अकृषि विद्यापीठे व संलग्न महाविद्यालयातील शिक्षकेतर कर्मचाऱ्यांच्या प्रलंबित न्याय मागण्यांसाठी महाविद्यालयीन व विद्यापीठ शिक्षकेतर कर्मचारी युनियनच्या वतीने आज पुणे येथे उच्च शिक्षण संचालक कार्यालयावर धडक मोर्चा व एकदिवसीय धरणे आंदोलन यशस्वीरीत्या पार पडले.

या मोर्चामध्ये शिक्षण संचालक, उच्च शिक्षण महाराष्ट्र राज्य पुणे डॉ. शैलेंद्र देवळणकर यांनी मोर्चाला आश्वासित केले की दीपावलीनंतर शिक्षण मंत्री चंद्रकांत दादा पाटील व वित्त विभागाचे संबंधित अधिकारी यांच्या समवेत संघटनेचे पदाधिकारी यांची बैठक घेऊन सदर सर्व विषय मार्गी लावण्यात येतील. मागण्या मान्य न झाल्यास १३ नोव्हेंबर रोजी लेखणी बंद आणि १८ नोव्हेंबर रोजी लाक्षणिक कामबंद आंदोलन करण्यात येईल असा इशारा यावेळी देण्यात आला. या मोर्चाचे नेतृत्व राज्याचे विद्यापीठ व महाविद्यालयीन शिक्षकेतर कर्मचारी महासंघाचे पदाधिकारी अजय देशमुख,  माधव राऊळ व रावसाहेब त्रिभुवन यांनी केले.

प्रमुख मागण्या :

१) १०, २०, ३० आश्वासित प्रगती योजना लागू करणे

२) सेवानिवृत्तीचे वय ६० करावे

३) जुनी पेन्शन योजना लागू करणे

 सोलापूर जिल्ह्यातून उत्स्फूर्त प्रतिसाद 

या मोर्चासाठी सोलापूर विद्यापीठ कर्मचारी संघटनेचे अध्यक्ष सुनिल थोरात व महासंघ उपाध्यक्ष सोमनाथ सोनकांबळे, रवि हुक्कीरे, गजानन काशिद व मलिक रोकडे यांच्या नेतृत्वाखाली 62, सोलापूर जिल्हा कॉलेज कर्मचारी युनियनचे अध्यक्ष दत्ता भोसले, सरचिटणीस राजेंद्र गिड्डे, सिनेट सदस्य सिद्धेश्वर स्वामी, चिदानंद स्वामी, राजेंद्र नरुणे   यांचे नेतृत्वाखाली 25 व अशासकीय महाविद्यालयीन शिक्षकेतर कर्मचारी महासंघ सोलापूरचे संघटक सचिव राजाराम माने व भीमा मस्के यांच्या नेतृत्वाखाली 25 शिक्षकेतर कर्मचारी सहभागी झाले होते.