सिंहगड पब्लिक स्कूलमध्ये स्वातंत्र्यदिनाचा देशभक्तीमय जल्लोष

 सिंहगड पब्लिक स्कूलमध्ये स्वातंत्र्यदिनाचा देशभक्तीमय जल्लोष

सोलापूर (कटूसत्य वृत्त):- सिंहगड पब्लिक स्कूल अँड ज्युनिअर कॉलेज, केगाव येथे भारताचा ८० वा स्वातंत्र्यदिन उत्साह, शिस्त आणि राष्ट्रप्रेमाच्या वातावरणात मोठ्या दिमाखात साजरा करण्यात आला. प्रमुख पाहुणे डॉ. एस. एच. पवार यांच्या हस्ते ध्वजारोहण करण्यात आले. कार्यक्रमाच्या अध्यक्षस्थानी सावित्रीबाई फुले शिक्षण प्रसारक मंडळाचे सहसचिव तथा सिंहगड इन्स्टिट्यूट, केगावचे कॅम्पस डायरेक्टर संजय नवले होते.

ध्वजारोहणानंतर विद्यार्थ्यांनी सादर केलेल्या दिमाखदार मार्चपास्टने उपस्थितांचे लक्ष वेधून घेतले. विविध हाऊसेसच्या विद्यार्थ्यांनी शिस्तबद्ध पथसंचलनातून एकता, शिस्त, नेतृत्वगुण आणि राष्ट्रनिष्ठेचे दर्शन घडविले. संजय नवले व डॉ. एस. एच. पवार यांनी मार्चपास्टची पाहणी करून विद्यार्थ्यांचे कौतुक केले.

यानंतर विद्यार्थ्यांनी सादर केलेल्या कवायत ड्रिलमधून अचूकता, समन्वय, एकाग्रता आणि संघभावनेचे प्रभावी दर्शन घडले. तालबद्ध हालचाली व शिस्तबद्ध सादरीकरणामुळे कार्यक्रमाला विशेष रंगत आली.

देशभक्तीपर कलाविष्कारांनी भारावले वातावरण

कवायत ड्रिलनंतर विद्यार्थ्यांनी सादर केलेल्या देशभक्तीपर सांस्कृतिक कार्यक्रमांनी वातावरण भारावून गेले. देशभक्तीपर नृत्य, समूहगीत, घोषवाक्ये आणि विद्यार्थ्यांच्या ओजस्वी भाषणातून स्वातंत्र्यसैनिकांचे बलिदान, राष्ट्रप्रेम तसेच देशाच्या विकासातील युवा पिढीची भूमिका प्रभावीपणे मांडण्यात आली. विविध हाऊसेसच्या विद्यार्थ्यांनी सादर केलेल्या कलाविष्कारांतून भारताची सांस्कृतिक विविधता आणि ‘एक भारत, श्रेष्ठ भारत’ ही संकल्पना अधोरेखित झाली.

अध्यक्षीय मनोगतात संजय नवले यांनी विद्यार्थ्यांना स्वातंत्र्याचा खरा अर्थ समजून घेत देशाप्रती आपली जबाबदारी पार पाडण्याचे आवाहन केले. शैक्षणिक प्रगतीसोबतच शिस्त, प्रामाणिकपणा, कर्तव्यनिष्ठा, राष्ट्रप्रेम आणि सामाजिक बांधिलकी ही मूल्ये विद्यार्थ्यांनी अंगीकारावीत, असे त्यांनी सांगितले. “आजचा विद्यार्थी हा उद्याच्या भारताचा शिल्पकार आहे,” असे सांगत विद्यार्थ्यांनी आपल्या ज्ञान, कौशल्य आणि प्रतिभेचा उपयोग देशाच्या प्रगतीसाठी करावा, असे आवाहन त्यांनी केले.

प्रमुख पाहुणे डॉ. एस. एच. पवार यांनी विद्यार्थ्यांना स्वातंत्र्यसैनिकांच्या त्यागाचे स्मरण करून शिक्षण, शिस्त, प्रामाणिकपणा आणि देशभक्तीची मूल्ये अंगीकारण्याचा संदेश दिला. “आजची युवा पिढी हीच उद्याच्या भारताची ताकद आहे,” असे त्यांनी नमूद केले.

कार्यक्रमास डॉ. शंकर नवले, डॉ. दत्तात्रय नवले यांच्यासह विविध मान्यवर उपस्थित होते. कार्यक्रमाच्या यशस्वी आयोजनासाठी प्राचार्या शाहीन शेख, उपप्राचार्य प्रकाश नवले, उपप्राचार्या निकहत शेख तसेच सर्व शिक्षक व शिक्षकेतर कर्मचाऱ्यांनी परिश्रम घेतले. कार्यक्रमाचे सूत्रसंचालन विद्यार्थिनी स्वरा गुंड व पलक मीना यांनी केले.

विद्यार्थ्यांचा उत्स्फूर्त सहभाग आणि विविधरंगी देशभक्तीपर सादरीकरणामुळे सिंहगड पब्लिक स्कूलचा स्वातंत्र्यदिन सोहळा संस्मरणीय ठरला.