टेंभुर्णी व कुर्डूवाडी आरोग्य खात्याचा पुन्हा एकदा भोंगळ कारभार चव्हाट्यावर

टेंभुर्णी(कटूसत्य वृत्त):- चांदज (ता. माढा) येथे शेतातील ऊस तोडून ट्रॅक्टरमधून कारखान्याकडे नेत असताना जाब विचारणाऱ्या महिलेला कोयत्याने व लोखंडी गजाने मारहाण केल्याची घटना मंगळवारी (दि. १७) सायंकाळी ६ वाजण्याच्या सुमारास घडली. या प्रकरणी टेंभुर्णी पोलीस ठाण्यात आठ जणांविरोधात विविध कलमान्वये गुन्हा दाखल करण्यात आला आहे.

टेंभुर्णी पोलीस ठाण्याकडून मिळालेल्या माहितीनुसार, फिर्यादी सुनिता नितीन पाटील (वय ३५, व्यवसाय घरकाम/शेती, रा. चांदज, ता. माढा, जि. सोलापूर) या दि. १७ फेब्रुवारी रोजी सायंकाळी ६ वाजण्याच्या सुमारास त्यांच्या शेतजमिनीतील ऊस ऊसतोड टोळीमार्फत तोडून ट्रॅक्टरमध्ये भरून कारखान्याकडे नेत असल्याचे त्यांच्या निदर्शनास आले.

त्यावेळी गावातील बळीराम हनुमंत हेगडकर व पंढरी हनुमंत हेगडकर हे ऊस घेऊन जात असल्याचे दिसून आल्याने फिर्यादी यांनी त्यांना “माझ्या शेतातील ऊस तोडून का नेताय?” असा जाब विचारला. यावर “तुझ्या बापाचा ऊस आहे का?” अशी उद्दाम भाषा वापरल्याचा आरोप फिर्यादीत नमूद आहे.

त्यानंतर बळीराम हेगडकर याने हातातील ऊसतोडीच्या कोयत्याने फिर्यादीच्या डाव्या पायाच्या पोटरीवर वार करून जखमी केल्याचे सांगण्यात आले आहे. तसेच पंढरी हेगडकर याने लोखंडी गजाने फिर्यादीच्या डाव्या पायाच्या नडगीवर तसेच दोन्ही पायांवर, कमरेवर व पोटावर मारहाण करून जखमी केल्याचे फिर्यादीत नमूद आहे.

दरम्यान, या वादात इतर आरोपीही सहभागी झाल्याचा आरोप आहे. शिवाजी हनुमंत हेगडकर, शंकर शिवाजी हेगडकर, नामदेव पंढरी हेगडकर, बाबुराव वसंत हेगडकर, सिता बळीराम हेगडकर व कल्पना शंकर हेगडकर (सर्व रा. चांदज, ता. माढा) यांनी फिर्यादीला शिवीगाळ व दमदाटी करून जमिनीवर हातपाय धरून आपटून लाथाबुक्क्यांनी मारहाण केल्याचे फिर्यादीत नमूद आहे.

यावेळी फिर्यादीची मुलगी प्रांजली व फिर्यादीच्या भावाची मुलगी समीक्षा शेंडगे या घटनेचे मोबाईलमध्ये चित्रीकरण करत असताना आरोपींनी त्यांनाही शिवीगाळ केली. तसेच शंकर हेगडकर व बळीराम हेगडकर यांनी त्यांच्या जवळील मोबाईल हिसकावून जमिनीवर आदळून फोडून नुकसान केल्याचे फिर्यादीत म्हटले आहे. याशिवाय शंकर हेगडकर याने फिर्यादीची मुलगी प्रांजली हिच्या छातीवर बुक्क्याने मारहाण केल्याचा आरोपही करण्यात आला आहे.

या घटनेप्रकरणी टेंभुर्णी पोलीस ठाण्यात गु.र.नं. ८६/२०२६ नुसार भा.न्या.सं. कलम 118(1), 115(2), 351(2), 352, 324(4)(5), 189(2), 191(2), 191(3), 190 प्रमाणे गुन्हा दाखल करण्यात आला आहे.

या प्रकरणाचा पुढील तपास टेंभुर्णी पोलीस ठाण्याचे पोलीस निरीक्षक नारायण पवार यांच्या मार्गदर्शनाखाली ए.पी.आय. गणेश चौधरी, पोलीस हवालदार गोळे व पोलीस कॉन्स्टेबल तळेकर करीत आहेत.

--------------------------------------

आरोग्य व्यवस्थेचा भोंगळ कारभार पुन्हा चव्हाट्यावर

दरम्यान, टेंभुर्णी परिसरातील आरोग्य व्यवस्थेचा भोंगळ कारभार पुन्हा एकदा समोर आला आहे. काही दिवसांपूर्वी टेंभुर्णी येथील प्राथमिक आरोग्य केंद्राने झाकले येथील ह भ प महाराज गायकवाड यांचे पोस्टमार्टम करण्यास नकार दिल्याने संबंधित मृतदेह सोलापूर येथे नेऊन पोस्टमार्टम करावे लागले होते.

त्यानंतर आता चांदज येथील मारहाणीच्या घटनेत जखमी महिलेला गुन्हा दाखल करण्यासाठी रात्री टेंभुर्णी पोलीस ठाण्यात उशिरापर्यंत थांबावे लागले. त्यानंतर तिला प्राथमिक उपचारासाठी टेंभुर्णी प्राथमिक आरोग्य केंद्रात नेण्यात आले. मात्र तात्पुरता उपचार करून तेथून पुढे कुर्डूवाडी ग्रामीण रुग्णालयात पाठवण्यात आले. कुर्डूवाडी येथून पुढे सोलापूर सिव्हिल हॉस्पिटल येथे उपचारासाठी जाण्यास चिठ्ठी दिली

मात्र टेंभुर्णी ते सोलापूर हे अंतर जवळपास १०० किलोमीटर असल्याने जखमी महिलेला वेळेत व योग्य उपचार मिळणे शक्य झाले नाही. परिणामी ती महिला उपचार न घेता अखेर घरी निघून गेल्याची माहिती समोर आली आहे. त्यामुळे जखमी रुग्णाला २४ तास उपचारासाठी विविध ठिकाणी फिरावे लागणे आणि शेवटी उपचार न मिळाल्याने परत जाणे, हा प्रकार अत्यंत गंभीर असून प्रशासनाचा तसेच प्राथमिक आरोग्य केंद्रांचा भोंगळ कारभार पुन्हा एकदा उघड झाला आहे.

परिसरातील नागरिकांना तातडीने योग्य उपचार, औषधे व सेवा मिळाव्यात, यासाठी प्रशासनाने या प्रकरणाकडे गांभीर्याने लक्ष देण्याची मागणी नागरिकांतून होत आहे.