नगर विकास निधीच्या तिजोरीच्या चाव्या आमच्याकडे आहेत म्हणणाऱ्यांनी तिजोरीचे मालक भाजपा आहे हे ध्यानात घ्यावे- ना. जयकुमार गोरे

मोहोळच्या अंतर्गत रस्ते साठी २०० कोटी

मुख्य रस्त्यासाठी १२ कोटी तर संपूर्ण शहर

सीसीटीव्ही करण्याचे दिले भर सभेत आश्वासन

लोकनियुक्त नगराध्यक्ष पदाच्या भाजपा उमेदवार शितल क्षीरसागर यांच्यासह भाजपच्या सर्व वीस उमेदवारांच्या प्रचारार्थ मोहोळ मध्ये भाजपची मोठी सभा

मोहोळ (कटूसत्य वृत्त):-

देशाचे पंतप्रधान नरेंद्र मोदी राज्याचे मुख्यमंत्री देवेंद्र फडणवीस यांच्या अत्यंत समन्वयकातून भूमिकेतून आज महाराष्ट्राचा सर्वच क्षेत्रात विकास होऊन आपल्या राज्याची भरभराट होत आहे. त्यामुळे येत्या काळात मोहोळच्या सर्वांगीण विकासाची उत्तुंग झेप घेण्यासाठी भारतीय जनता पक्षाच्या अधिकृत उमेदवार शितल सुशील क्षीरसागर आणि अन्य सर्व भारतीय जनता पक्षाच्या अधिकृत उमेदवारांना मोठ्या मताधिक्याने विजयी करा.चार दिवसांपूर्वी एका अन्य पक्षाच्या उमेदवारांच्या प्रचारार्थ सत्तेतील बडे नेते म्हणाले की सत्तेच्या तिजोरीच्या चाव्या आमच्याकडे आहेत मी मोहोळच्या विकासाचे काय करायचे ते पाहतो. अहो सत्तेच्या तिजोरीच्या चाव्या जरी तुमच्याकडे असल्या तरी या तिजोरीची मालकी आमच्या भाजपाच्या माध्यमातून मुख्यमंत्री देवेंद्रभाऊ फडणवीस यांच्याकडे आहे. त्यामुळे शहरातील जनतेने निश्चितपणे ना.देवाभाऊंच्या मार्गदर्शनाखाली मोहोळच्या विकासासाठी भाजप सोबतच राहावे असे आवाहन राज्याचे ग्रामविकास मंत्री तथा सोलापूर जिल्ह्याचे पालकमंत्री ना. जयकुमार भाऊ गोरे यांनी मोहोळ येथे केले.

मोहोळ येथे भारतीय जनता पक्षाच्या लोकनियुक्त नगराध्यक्ष पदाच्या अधिकृत उमेदवार शितल सुशील क्षीरसागर यांच्या आणि भाजपच्या सर्व वीस अधिकृत उमेदवारांच्या प्रचारार्थ छत्रपती संभाजीराजे महाराज चौकात आयोजित भव्य प्रचार सभेमध्ये मार्गदर्शन करताना ना. जयकुमारभाऊ गोरे बोलत होते.

यावेळी व्यासपीठावर भाजपचे नेते सदाभाऊ खोत मुंबई अल्पसंख्याक मोर्चाचे अध्यक्ष वसीम आर. खान, भाजपचे ज्येष्ठ नेते तथा माजी आमदार राजन पाटील, माजी आमदार यशवंत माने, ज्येष्ठ नेते नागनाथभाऊ क्षीरसागर, जिल्हाध्यक्ष शशिकांतनाना चव्हाण, सोलापूर शहराध्यक्ष रोहिणीताई तडवळकर, शहाजीभाऊ पवार, नगराध्यक्ष पदाच्या उमेदवार शीतल सुशील क्षीरसागर, निवडणूक प्रभारी सुशील क्षीरसागर यांच्यासह भाजपचे सर्व पदाधिकारी उपस्थित होते.

यावेळी बोलताना पालकमंत्री ना. गोरे म्हणाले की आज भाजपाच्या विरोधात ज्यांनी पॅनल लावला आहे त्या पॅनलचे प्रमुख माझ्याकडे येऊन दोन-तीन तास बसत होते आणि विनंती करून म्हणत होते एखादा कोटीचा तरी निधी द्या. चार दिवसापूर्वी मोहोळच्या विद्यमान आमदारांनी भरसभेतच कबुली दिली की मला पाच कोटी रुपयांच्या आमदार निधी व्यतिरिक्त एक रुपयांचाही निधी मिळाला नाही. आता मला सांगा की जे आमदाराला पाच कोटी पेक्षा जास्तीचा निधी मिळवु शकत नाही त्या आमदारांच्या भरोशावर भाजपच्या विरोधातील लोक पॅनलची निर्मिती करून कोणत्या नीधीचा भरोशावर विकासासाठी मत मागत आहेत याबाबत शहरवासीयांनी जरा गांभीर्याने विचार करावा

यावेळी जेष्ठ नेते सदाभाऊ खोत यांनी आपल्या भाषणातून भाजपाने सोलापूर जिल्ह्यातील अनगर नगरपंचायत जिंकून विजयाचे खाते उघडले आहे. आता मोहोळच्या जनतेने शीतल क्षीरसागर यांना विजयी करून भाजपाच्या विकासधारेमध्ये सहभागी व्हावे. नामदार जयकुमार गोरे हे अत्यंत कार्यक्षम आणि कर्तव्यदक्ष पालकमंत्री सोलापूर जिल्ह्याला लाभले आहेत. आम्हाला देखील निधी मागायला त्यांच्याकडे जावे लागते. तुमच्या जिल्ह्याला असे पालकमंत्री असल्यामुळे तुम्हाला मुख्यमंत्री देवाभाऊंच्या माध्यमातून सहजरित्या शहराच्या विकासासाठी आवश्यक असणारा निधी मिळू शकेल असे सदाभाऊ खोत आवर्जून म्हणाले.

यावेळी मुंबई अल्पसंख्याक मोर्चा भाजपाचे अध्यक्ष वसीम आर खान म्हणाले की भाजपा हा सर्व समाजाला सर्वधर्माच्या सर्व जातीच्या समाज बांधवांना सोबत घेऊन जाणारा पक्ष आहे. ठराविक धर्माबद्दल चुकीच्या पद्धतीने नॅरेटिव्ह पसरवत विरोधी पक्षांनी बऱ्याचदा स्वतःची राजकीय पोळी भाजून घेण्याचा प्रयत्न केला आहे. मात्र भाजपाने हा डाव हाणून पाडत सबका साथ सबका विकास या धोरणाने प्रत्येक धर्माचा आदर सन्मान करत त्यांना विकासाच्या प्रवाहात सहभागी करून देशांतर्गत भाईचारा जपला आहे. त्यामुळे सर्व अल्पसंख्याक समाजातील व सर्वधर्मीय समाज बांधवांनी मोहोळच्या सर्वांगीण विकासासाठी भविष्यातील विकासाच्या दृष्टीने धोरणात्मक विचार करत भाजपच्या नगराध्यक्ष पदाच्या अधिकृत उमेदवार शीतल क्षीरसागर यांना मोठ्या बहुमताने विजयी करावे असे आवाहन यावेळी वसीम आर. खान यांनी केले.

यावेळी भाजपचे ज्येष्ठ नेते माजी आमदार राजन पाटील, माजी आमदार यशवंत माने नगराध्यक्षपदाच्या उमेदवार शितल क्षीरसागर, निवडणूक प्रभारी सुशील क्षीरसागर, तालुकाध्यक्ष सतीशआप्पा काळे यांनी आपल्या मनोगत आतून भारतीय जनता पक्षाच्या उमेदवारांना मोठ्या बहुमताने विजयी करण्याचे आवाहन केले.

चौकट

तुम्ही नगराध्यक्षपदी शीतल क्षीरसागर यांना विजयी करून नगरपरिषदेच्या सत्तेची सूत्रे आमच्या भाजप पक्षाकडे द्या. आठ दिवसात मोहोळ मधील अंतर्गत रस्त्यासाठी २०० कोटी मेन रोडच्या मजबूत बांधणीसाठी १२ कोटी तर अंतर्गत सीसीटीव्हीसाठी भरीव निधी देतो. मी नगराध्यक्ष पदाच्या उमेदवार क्षीरसागर यांचे भाषण दोन वेळा ऐकले मला खूप समाधान वाटले.कारण पक्षाने अशा कार्यक्षम आणि सुशिक्षित व्यक्तिमत्त्वाला उमेदवारी देऊन मोहोळच्या सर्वांगीण विकासासाठी खूप धोरणात्मक निर्णय घेतला आहे तुमच्या सर्वांची साथ आणि मार्गदर्शन मोहोळच्या भविष्यातील सर्वांगीण विकासाची सूत्रे ठरवणार आहे.

ना. जयकुमारभाऊ गोरे

पालकमंत्री सोलापूर