मुख्याधिकारी महेश रोकडे; आषाढी यात्रेसाठी पंढरपूर नगरपालिका प्रशासन सज्ज
पंढरपूर (कटूसत्य वृत्त):-
आषाढी यात्रा कालावधीत पंढरपुरात श्री विठ्ठल-रुक्मिणीच्या दर्शनासाठी परराज्यासह राज्यातील
इतर जिल्ह्यातून सुमारे १८ ते २२ लाख भाविक येतात. येणाऱ्या भाविकांच्या व स्थानिक नागरिकांच्या आरोग्य सुरक्षिततेच्या व स्वच्छतेच्या दृष्टीने सेवा बजावण्यासाठी १,५४२ कर्मचारी तैनात करण्यात आले आहेत. तसेच भाविकांना आवश्यक सोयी-सुविधा उपलब्ध करून देण्यासाठी नगरपालिका प्रशासन सज्ज असल्याची माहिती मुख्याधिकारी पंढरपूर : भक्तिसागर येथे कायमस्वरुपी उभारण्यात आलेले शौचालय दिसत आहे. महेश रोकडे यांनी दिली.
आषाढी यात्रा कालावधीत शहरासह नदीपात्र, वाळवंट, ६५ एकर परिसर, पत्राशेड, प्रदक्षिणा मार्ग,
मंदिर परिसर, वाखरी पालखी तळ आदी ठिकाणच्या स्वच्छतेसाठी १५४२ स्वच्छता कर्मचाऱ्यांची
नियुक्ती केली आहे. यामध्ये नगरपरिषद पंढरपूरचे ३४८ कायम कर्मचारी तर जवळपास १००० हंगामी
कर्मचारी तसेच जिल्ह्यातील इतर नगरपालिकेकडून जिल्हा प्रशासनामार्फत १९४ कर्मचारी 'स्वच्छतेसाठी नेमण्यात आले आहेत.
आषाढी यात्रा कालावधीत महिलांच्या स्वच्छतेच्या व सुरक्षिततेच्या दृष्टीने शहरामध्ये वेगळ्या शौचालयांची व्यवस्था करण्यात आलेली आहे. तसेच नदी पात्र, वाळवंट परिसर, वाखरी पालखी
तळ, ६५ एकर व इतर विविध ठिकाणी हिरकणी कक्ष स्थापन करण्यात येत असून कक्षाच्या ठिकाणी सॅनिटरी नॅपकिन वेडींग मशीन बसविण्यात येणार आहेत. भाविकांना स्वच्छ पिण्याच्या पाण्याचा पुरवठा व्हावा यासाठी शहरातील सार्वजनिक बोअरवेल, हातपंप आदी ठिकाणच्या पाण्याची तपासणी करण्यात आली आहे. तसेच दररोज पिण्याच्या पाण्याची क्लोरीन टेस्ट केली जाणार आहे.
यात्रेकरूंच्या सोयीसाठी जिल्हा प्रशासनाकडून ६५ एकर, नदीपात्र, पत्राशेड, मंदिर परिसर, वाखरी
पालखी तळ आदी ठिकाणी आपत्ती व्यवस्थापन कक्षाची स्थापना करण्यात आली आहे. त्याचबरोबर
पत्राशेड, वाळवंट, ६५ एकर परिसर, रेल्वे मैदान याठिकाणी तात्पुरते शौचालय उभारण्यात येणार आहेत.
तात्पुरत्या शौचालयाच्या ठिकाणी पाण्याच्या टिपा ठेऊन त्यामध्ये टँकरद्वारे पाणी पुरवठा करण्यात येणार आहे. वारकरी भाविकांनी उघड्यावर शौचविधी करू नये म्हणून प्रतिबंधक पथकांची नेमणूकदेखील करण्यात आली आहे.
सुरक्षिततेच्या दृष्टीने शहरातील जीर्ण व धोकादायक इमारतींना नोटिसा देण्यात आल्या आहेत. वाहनतळावरती दिशादर्शक फलक लावण्यात आले असून, आवश्यक ठिकाणी बॅरेकेडींग करण्यात येणार आहे. शहरातील सर्व प्रमुख रस्त्यांसह प्रदक्षिणा मार्ग, दर्शन बारी येथील लाईट दुरुस्तीची कामे करण्यात आली आहेत. तसेच नदीपात्रात व घाटावर अखंडित व पुरेसा प्रकाश मिळावा यासाठी नदीपात्रात १३ हायमास्ट पॉइंट्स, घाटांवर २०० वॅटचे एलईडी दिवे चालू करण्यात आले आहेत.
शहरात वारीच्या पार्श्वभूमीवर ठाकरे चौक, विसावा, भाई राऊळ चौक, कॉलेज चौक, संत गाडगेबाबा चौक, ६५ एकर आदी ठिकाणी सौंदर्यीकरण कलाकृती उभारण्यात येत आहेत.
दररोज ५५ ते १२० टन कचरा उचलण्याचे नियोजन
शहरासह ६५ एकर, वाळवंट, पत्राशेड आदी ठिकाणी जंतुनाशक फवारणी करण्यात आली आहे. यात्रा कालावधीत या घंटागाड्या सकाळी व रात्री अशा दोन वेळेस घरोघरीचा कचरा गोळा करतील. दररोज ५५ ते १२० टन इतका कचरा उचलण्याचे नियोजन करण्यात आले आहे. यात्रा काळात शहरातील व उपनगरातील सर्व मैदाने, नदी परिसर, ६५ एकर, पत्राशेड दर्शनबारी रोजचे रोज स्वच्छ व निर्जंतुक करण्यात येणार असल्याची माहिती मुख्याधिकारी रोकडे यांनी दिली.
0 Comments