संसदेच्या आवारात सत्ताधारी-विरोधकांमध्ये जुंपली!

 संसदेच्या आवारात सत्ताधारी-विरोधकांमध्ये जुंपली!

भाजप खासदाराच्या डोक्याला जबर मार

नवी दिल्ली (वृत्त सेवा):- भाजप खासदारांनी संसदेत काँग्रेस पक्षाने बाबासाहेब आंबेडकरांचा अपमान केल्याचा आरोप करत निदर्शने केली. यावेळी "राहुल गांधींनी एका खासदाराला धक्काबुक्की केली जो, माझ्यावर पडला ज्यामुळे मी खाली पडलो आणि माझ्या डोक्याला दुखापत झाली" असा गंभीर आरोप भाजप खासदार प्रतापचंद्र सारंगी यांनी राहुल गांधींवर केला आहे.

याशिवाय, बाबासाहेब आंबेडकर यांच्या अपमानाच्या निषेधार्थ निदर्शने करणाऱ्या मल्लिकार्जुन खर्गे आणि प्रियांका गांधी यांना संसदेच्या मकर गेटवर भाजपच्या खासदारांनी धक्काबुक्की केल्याचा दावा काँग्रेसने केला आहे.

प्रतापचंद्र सारंगींनी केला गंभीर आरोप

भाजप खासदार प्रतापचंद्र सारंगी म्हणाले, "मी पायऱ्यांजवळ उभा असताना राहुल गांधी आले आणि माझ्यावर पडलेल्या खासदाराला राहुल गांधींनी धक्का दिला आणि त्यानंतर मी खाली पडलो. " याचदरम्यान प्रताप सारंगी यांची प्रकृती खालावल्यामुळे त्यांना रुग्णवाहिकेतून रुग्णालयात नेण्यात आले. फरुखाबादचे खासदार मुकेश राजपूत यांनीही राहुल गांधींवर धक्काबुक्की केल्याचा आरोप केला आहे. त्यांना आयसीयूमध्ये दाखल करण्यात आले आहे.

राहुल गांधींचं मोठं विधान

लोकसभेतील विरोधी पक्षनेते आणि काँग्रेसचे खासदार राहुल गांधी म्हणाले, " मी संसदेच्या प्रवेशद्वारावर जाण्याचा प्रयत्न करत असताना भाजपच्या खासदारांनी मला रोखण्याचा प्रयत्न केला. ते मला धमक्या देत होते, त्यामुळे हे घडले. हे संसदेचे प्रवेशद्वार आहे आणि आम्हाला आत जाण्याचा अधिकार आहे. मुख्य मुद्दा हा आहे की ते संविधानावर हल्ला करत आहेत."

माणिकम टागोर यांचा खुलासा

"भाजपचे लोक नाटक करत आहेत. या घटनेबाबत आम्ही लोकसभा अध्यक्षांची भेट घेणार आहोत. या घटनेपूर्वी

राहुल गांधी आणि प्रियांका गांधींच्या नेतृत्वाखाली भारत आघाडीच्या खासदारांनी संसदेच्या संकुलातील बाबासाहेब आंबेडकर पुतळ्याजवळ निषेध मोर्चा काढला होता." असं वक्तव्य काँग्रेसचे खासदार बी. माणिकम टागोर यांनी केलं.

भाजप आंबेडकरांचा अपमान करते

"काल भाजपने अमित शहांच्या माध्यमातून बाबासाहेब आंबेडकरांचा अपमान केला. आणि आज ते त्यांच्या स्वसंरक्षणासाठी आंदोलन करत आहेत. काल भाजपच्या सोशल मीडियाने आंबेडकरांऐवजी सोरोस यांचे छायाचित्र पोस्ट केले.भाजप पुनः पुन्हा आंबेडकरांचा अपमान करत आहेत" असे काँग्रेस खासदार केसी वेणुगोपाल म्हणाले.