रक्ताने चेअरमनला लिहिणार पत्र

राजेवाडीच्या कारखान्याने उर्वरित ऊस बिल द्यावे स्वाभिमानीची भावनीक साद

निमगाव (कटूसत्य वृत्त):- राजेवाडी येथील सदगुरू श्री श्री श्री साखर कारखान्याने शेतकऱ्यांचे मागील गाळप हंगामातील उर्वरित 223/- रुपये ऊस बिल द्यावे व कोरोना नंतर साजरी होणारी मायबाप शेतकऱ्याची पहिलीच दीपावली गोड करावी यासाठी स्वाभिमानी शेतकरी संघटनेच्या पदाधिकाऱ्यांसह माळशिरस तालुक्यातील 200 शेतकरी कारखाना कार्यस्थळावर जाऊन स्वतःचे रक्त काढून कारखान्याचे चेअरमन एन शेषागिरी राव यांना ही 200 पत्र भेट देऊन त्यांचा शाल ,श्रीफळ व फेटा बांधून गांधीगिरीने सत्कार करणार असल्याची माहिती स्वाभिमानी शेतकरी संघटनेचे माळशिरस तालुका अध्यक्ष अजित बोरकर यांनी दिली

यावेळी बोलताना अजित बोरकर म्हणाले की, मागील गाळप हंगामात राजेवाडी च्या सदगुरु साखर कारखान्याने शेतकऱ्यांना 2660/- रुपये प्रति टन ऊस बिल देतो असे गावोगावी जाऊन सांगितले आणि प्रत्यक्षात मात्र 2437/- रुपये बिल देऊन शेतकऱ्यांची बोळवण केली वास्तविक पाहता उर्वरित 223/- रुपये ऊस बिल दीपावलीच्या अगोदर देणे क्रमप्राप्त असताना उर्वरित ऊस बिल दिले जात नाही याबाबत वारंवार भेटून विनंती करूनही कारखाना प्रशासन व चेअरमन यांनी झोपेचे सोंग घेतले आहे यामुळे शेवटचा पर्याय म्हणून स्वाभिमानी शेतकरी संघटनेचे शेकडो कार्यकर्ते राजेवाडी येथील सद्गुरु श्री श्री साखर कारखान्यावर जाऊन चेअरमन एन शेषागिरी राव यांना कारखाना कार्यस्थळावरच स्वतःचे रक्त काढून स्वाभिमानी शेतकरी संघटनेचे पदाधिकारी व शेतकरी 200 पत्र देणार आहेत .

राजेवाडी येथील सदगुरु कारखान्याने मोळीपूजन केले परंतु सभासद असणाऱ्या शेतकऱ्यांना निमंत्रित केले नाही , याउलट राजकीय पदाधिकारी आणून शेतकऱ्यांवर दबाव टाकण्याचा प्रयत्न केला असाही आरोप केला जात आहे चेअरमन यांनी सभेला संबोधित करणे गरजेचे असताना ऊस बिल जाहीर करावे लागेल व मागील हंगामातील ऊस बिल द्यावे लागेल यासाठी कारखान्याचे चेअरमन यांनी ब्र शब्दही काढला नाही यामुळे सभासदांमध्ये असंतोषाचे वातावरण पसरले असून माळशिरस तालुक्यासह शेजारील पंढरपूर, आटपाडी व माण तालुक्यात राजेवाडी कारखान्याची ऊस वाहतूक करणारी वाहने शेतकरी अडवून धरत आहेत यावेळी कारखाना प्रशासन पोलीस बळाचा वापर करीत असल्याचे दिसून येत आहे यामुळे भविष्यात कायदा व सुव्यवस्थेचा प्रश्न निर्माण होऊ शकतो जोपर्यंत राजेवाडी कारखाना शेतकऱ्यांचे उर्वरित ऊस बिल देत नाही तोपर्यंत कारखान्याची ऊस वाहतूक अडवून धरली जाईल असेही गावोगावीचे शेतकरी सांगत आहेत .

(चौकट):-राजेवाडी कारखान्यास ऊस वाहतूक करणारी वाहनेही शेतकऱ्यांचीच आहेत यामुळे या वाहनधारकांनी देखील शेतकऱ्यांच्या हिताचा विचार करून ऊस वाहतूक बंद करावी व कारखाना प्रशासनास उर्वरित 223/- रुपये देण्यास भाग पाडावे व शेतकऱ्यांची दीपावली गोड करावी अन्यथा ऊस वाहतूक बंद करून शेतकऱ्यांना सहकार्य करावे अन्यथा शेतकऱ्यांच्या उद्रेकाला कारखाना प्रशासना बरोबरच वाहनधारकांना देखील सामोरे जावे लागेल व होणाऱ्या परिणामास कारखाना प्रशासन व वाहनधारक जबाबदार राहतील

साहिल आतार, ऊस उत्पादक शेतकरी