एकनाथ शिंदे यांना महाराष्ट्राचे मुख्यमंत्री बनवण्याची किंमत गुजरातने वेदांत फॉक्सकॉनच्या रूपाने वसूल केली- महेश तपासे

 एकनाथ शिंदे यांना महाराष्ट्राचे मुख्यमंत्री बनवण्याची किंमत गुजरातने  वेदांत फॉक्सकॉनच्या रूपाने वसूल केली- महेश तपासे

 मुख्यमंत्री शिंदे गुजरातसमोर लाचार, महाराष्ट्रात वेदांत फॉक्सकॉन टिकवता आले नाही...

 

मुंबई (नासिकेत पानसरे):-वेदांत फॉक्सकॉनने महाराष्ट्राऐवजी गुजरातमध्ये २०अब्ज डॉलरचा प्रकल्प उभारत असल्याचे समोर आल्यावर मुख्यमंत्री एकनाथ शिंदे महाराष्ट्राचे हित साधत आहेत की गुजरातचे हित साधत आहेत असा थेट सवाल राष्ट्रवादी काँग्रेसचे राज्य मुख्य प्रवक्ते महेश तपासे यांनी केला आहे. 

महाराष्ट्रातील मागील महाविकास आघाडी सरकारने महाराष्ट्र राज्यात गुंतवणुकीसाठी वेदांत फॉक्सकॉनशी योग्य संवाद व चर्चा सुरू केली होती आणि तळेगावचे ठिकाण निश्चित करण्यात आले होते.महाविकास आघाडी सरकारने स्थानिक तरुणांसाठी मोठ्या प्रमाणावर रोजगाराच्या संधी निर्माण करण्याच्या उद्देशाने वेदांत फॉक्सकॉनला सर्वोत्तम प्राधान्य दिले होते. वेदांत फॉक्सकॉनसह व्यवसायाच्या संधीची वाट पाहणाऱ्या अनेक लहान उद्योजकांची साखळी त्यामुळे आता पूर्णपणे विस्कळीत झाली आहे असेही महेश तपासे म्हणाले.

नव्याने स्थापन झालेल्या ईडी सरकारला महाराष्ट्रात वेदांत फॉक्सकॉन कायम ठेवता आले नाही ही लाजिरवाणी गोष्ट असून मुख्यमंत्री शिंदे यांची राज्याच्या विकासाबाबतची उदासीन वृत्ती दिसून येते. त्यांनी गुजरातला बळी पडून महाराष्ट्राचे आर्थिक नुकसान आणि लाखो इच्छूक तरुणांचे रोजगार बुडवले आहेत असा थेट आरोपही महेश तपासे यांनी केला. 

मुख्यमंत्री एकनाथ शिंदे हे महाराष्ट्रातील जनतेला आपल्या बंडाचे समर्थन करण्यात व्यस्त असून रोजगार आणि औद्योगिकीकरणासारख्या विकासाच्या मुद्द्यांवर ते बोलत नाहीत असा टोलाही महेश तपासे यांनी लगावला.दरम्यान मुख्यमंत्री एकनाथ शिंदे यांनी महाराष्ट्रातील जनतेला तरुणांचे रोजगार घालवल्याबद्दल स्पष्टीकरण द्यावे अशी मागणीही महेश तपासे यांनी केली आहे.