सांगोला पंचायत समितीमध्ये कोरोना प्रतिबंधात्मक उपाययोजनांची अंमलबजावणी
सांगोला (जगन्नाथ साठे)(कटूसत्य वृत्त): कोरोना विषाणूचा प्रसार व प्रादुर्भाव दिवसेंदिवस वाढत आहे. या पार्श्वभूमीवर शासन आदेश दिनांक 27 मार्च 2021 मधील निर्देशानुसार पंचायत समिती सांगोला कार्यालय दिनांक 1 एप्रिल 2021 पासून अभ्यागतांसाठी प्रतिबंधित क्षेत्र म्हणून घोषित करण्यात आले आहे. पंचायत समिती कार्यालयात तालुक्यातील ग्रामीण भागातून दररोज शेकडो अभ्यागत कामानिमित्त येत असतात. कोरोना प्रसाराच्या पार्श्वभूमीवर शासनाकडून आदेश प्राप्त झाल्यामुळे आता अभ्यागतांना पंचायत समिती कार्यालयात प्रवेश करता येणार नाही.
1 एप्रिल रोजी पंचायत समिती कार्यालयातील अधिकारी- कर्मचाऱ्यांची कोविड टेस्ट घेण्यात आली. एकूण 69 टेस्ट घेण्यात आल्या असून त्यापैकी 02 कर्मचाऱ्यांच्या टेस्ट पॉझिटिव्ह आल्यामुळे कार्यालयात चिंतेचे वातावरण निर्माण झाले आहे. तसेच यापुढे दररोज पंचायत समिती कार्यालयाच्या प्रवेशद्वारावर कोविड चाचणी केली जाणार आहे.
तालुक्यातील पदाधिकारी व ग्रामस्थांनी अत्यावश्यक कामाशिवाय पंचायत समिती कार्यालयात येऊ नये. आपले अर्ज, निवेदन इत्यादी bdosangola41@gmail.com या ई मेलवर ऑनलाईन पाठवून द्यावेत. आपल्या अर्जांवर नियमानुसार योग्य ती कार्यवाही केली जाईल, असे आवाहन सभापती राणीताई कोळवले व गट विकास अधिकारी संतोष राऊत यांनी केले आहे.
तालुक्यात कोरोनाचा प्रसार वेगाने होत आहे. यामुळे नागरीकांनी पंचायत समिती कार्यालयात येण्याचे टाळावे. आपण ई-मेलद्वारे किंवा टपालाद्वारे पाठविलेल्या अर्जांवर नियमानुसार कार्यवाही करण्यात येईल. सर्वांनी शासनाच्या निर्देशांचे पालन करावे. -राणीताई कोळवले, सभापती, पंचायत समिती, सांगोला.
कोरोनाचा प्रसार रोखण्यासाठी कांही कठोर उपाययोजना करणे आवश्यक आहे. त्याचाच एक भाग म्हणून पंचायत समिती कार्यालय प्रतिबंधित क्षेत्र म्हणून घोषित केले आहे. कार्यालयातील अधिकारी, कर्मचाऱ्यांची नियमित कोविड टेस्ट केली जाईल. तसेच अभ्यागतांना सुध्दा कोविड टेस्ट केल्याशिवाय कार्यालयात प्रवेश दिला जाणार नाही. सर्वांनी याबाबत प्रशासनास सहकार्य करावे. -संतोष राऊत, गट विकास अधिकारी, पंचायत समिती, सांगोला.
आधी केले, मग सांगितले …..!!
पंचायत समितीच्या सभापती राणीताई कोळवले व गट विकास अधिकारी संतोष राऊत यांनी आज कार्यालयात येताच आपल्या कोविड चाचण्या करुन घेतल्या. तसेच कार्यालयातील सर्व अधिकारी व कर्मचाऱ्यांना सुध्दा चाचणी करुन घेण्याची सूचना केली. त्यानुसार एक दिवसात 69 कोविड चाचण्या करण्यात आल्या. गट विकास अधिकारी संतोष राऊत व पंचायत समिती कार्यालयातील अधिकारी व कर्मचारी यांनी कोविड लसीकरणाचे दोन्ही डोस सुध्दा घेतले आहेत. नागरिकांनी सुद्धा कोविड चाचणी करण्यास व लसीकरण करण्यात प्रशासनाला सहकार्य करावे, अशी अपेक्षा व्यक्त केली जात आहे.
0 Comments