गॅस दरवाढीच्या निषेधार्थ राष्ट्रवादी महिला काँग्रेसच्या वतीने जवळा येथे "चूल पेटवा आंदोलन" केंद्र सरकारच्या विरोधात जोरदार घोषणाबाजी

गॅस  दरवाढीच्या निषेधार्थ राष्ट्रवादी महिला काँग्रेसच्या वतीने जवळा येथे "चूल पेटवा आंदोलन"

केंद्र सरकारच्या विरोधात जोरदार घोषणाबाजी

सांगोला (कटुसत्य वृत्त ) :- पेट्रोल डिझेल आणि त्याचबरोबर घरगुती गॅसचे दिवसेंदिवस गगनाला भिडत असल्याने सामान्य नागरिकांचे कंबरडे मोडले आहे. महिला आणि सामान्य कुटुंबांचे अर्थकारण दरवाढीमुळे बिघडून गेले आहे. केंद्र सरकारने गेल्या काही दिवसांपासून सातत्याने गॅसच्या दरात वाढ केल्याच्या निषेधार्थ जवळा ता. सांगोला येथे राष्ट्रवादी महिला काँग्रेसच्या प्रदेश उपाध्यक्षा जयमलाताई गायकवाड यांच्या मार्गदर्शनाखाली "चूल पेटवा आंदोलन" करून महिलांनी केंद्र सरकारचा निषेध करणाऱ्या घोषणा दिल्या.
आधीच गेली वर्षभर कोरोना आणि लॉकडाऊन मुळे मध्यमवर्गीय आणि सर्वसामान्य कुटुंबीयांचे अर्थकारण कोलमडले आहे. त्यातच मार्च 2020 पासून केंद्र सरकारने सातत्याने पेट्रोल डिझेल सह घरगुती गॅसच्या दरात वाढ केल्याने विशेषतः महिलांना याचा चांगलाच फटका बसत आहे. घरगुती गॅसचे दर गगनाला भिडत असल्याने केंद्र सरकारचा निषेध करण्यासाठी राष्ट्रवादी महिला काँग्रेसच्या वतीने जवळा ता सांगोला येथीलयेथील पेट्रोल पंपावरच महिलांनी चूल मांडून या दरवाढीचा निषेध केला आणि सामान्य नागरिक व महिलांच्या हिताच्या आड येत असलेल्या केंद्र सरकारच्या विरोधात "या केंद्र सरकारचे करायचं काय खाली मुंडकं वर पाय" "मोदी सरकार हाय हाय" "मोदी हटावो देश बचावो" अशा घोषणा देऊन केंद्र शासनाचा निषेध व्यक्त केला यावेळी राष्ट्रवादी महिला काँग्रेसच्या तालुकाध्यक्षा सखुबाई वाघमारे उपाध्यक्ष जयश्री पाटील चारुशीला साळुंखे शशिकला चडचणकर यांच्यासह महिला उपस्थित होत्या.
केंद्र सरकार उज्वला गॅस योजनेअंतर्गत घरोघरी घरगुती गॅस कनेक्शन दिल्याचा दावा करत आहे मात्र लॉकडाउन नंतर म्हणजेच मार्च 2020 पासून घरगुती गॅसच्या दरात सातत्याने वाढ होत असल्याने महिला वर्गाला याचा मोठा फटका बसत आहे. मोदी सरकारने घरोघरी गॅस दिला असला तरीही त्याचे सिलेंडर भरणे आज सामान्य नागरिकांना दरवाढीमुळे शक्य होत नाही. मोदी सरकारने जेवढा खर्च जाहिरातबाजीवर केला इतकाच खर्च उज्वला गॅस योजनेवर केला असता तर, आज गॅसचे दर गगनाला भिडले नसते. घरगुती गॅसच्या दरात केंद्र सरकारने तात्काळ कपात करावी अन्यथा या पुढील काळात खा. सुप्रियाताई सुळे व प्रदेशाध्यक्षा रूपालीताई चाकणकर यांच्या नेतृत्वाखाली राष्ट्रवादी महिला काँग्रेसच्या वतीने तीव्र आंदोलन करण्यात येईल.