डॉ. सुभाष कन्नी यांच्या ‘RAAVAN’ चित्रपटातील दोन गाण्यांचे गुरुवारी सोलापूरात अनावरण

डॉ. सुभाष कन्नी यांच्या ‘RAAVAN’ चित्रपटातील दोन गाण्यांचे गुरुवारी सोलापूरात अनावरण

सोलापूर (कटूसत्य वृत्त):- हिंदी चित्रपटसृष्टीत पौराणिक कथेला आधुनिक तंत्रज्ञानाची जोड देणारा ‘RAAVAN – THE RISE BEFORE THE FALL’ हा आगामी हिंदी चित्रपट सध्या चर्चेत आहे. या चित्रपटातील ‘जो हारने से डर गया’ आणि ‘चलते रहेंगे’ या दोन गाण्यांचा विशेष प्रकाशन सोहळा गुरुवार, दि. २९ ऑक्टोबर २०२६ रोजी सायंकाळी ६ वाजता सोलापुरातील जामश्री सिटी येथील कॉनप्लेक्स सिनेमात आयोजित करण्यात आला आहे. पी. एस. मोशन रील्स आणि सिद्धा आर्ट्स यांच्या वतीने या कार्यक्रमाचे आयोजन करण्यात आले आहे. अशी माहिती दिग्दर्शक, लेखक डॉ. सुभाष कन्नी यांनी पत्रकार परिषदेत दिली.

या चित्रपटाचे लेखन, दिग्दर्शन, संगीत दिग्दर्शन आणि गीतलेखन डॉ. सुभाष कन्नी यांनी केले आहे. पौराणिक पार्श्वभूमी, भव्य दृश्यात्मक मांडणी, प्रभावी संगीत आणि आधुनिक तंत्रज्ञानाचा वापर ही या चित्रपटाची प्रमुख वैशिष्ट्ये आहेत. भारतीय पौराणिक कथांमधील रावण या बहुआयामी व्यक्तिमत्त्वाकडे एका वेगळ्या दृष्टिकोनातून पाहण्याचा प्रयत्न या चित्रपटातून करण्यात आला आहे.

संघर्ष, जिद्द आणि आशावादाचा संदेश

चित्रपटातील ‘जो हारने से डर गया’ हे गाणे धैर्य, आत्मविश्वास, संघर्ष आणि पराभवाची भीती न बाळगता पुढे जाण्याची प्रेरणा देणारे आहे. आव्हानांना सामोरे जाण्याची तयारी आणि यशासाठी आवश्यक असलेली जिद्द या गाण्यातून अधोरेखित करण्यात आली आहे.

तर ‘चलते रहेंगे’ हे गाणे सातत्य, आशा आणि प्रतिकूल परिस्थितीतही आपला प्रवास सुरू ठेवण्याची मानवी वृत्ती व्यक्त करते. अडचणी आल्या तरी ध्येयाच्या दिशेने वाटचाल थांबवू नये, हा सकारात्मक विचार या गाण्यातून मांडण्यात आला आहे. दोन्ही गाण्यांचे गीतलेखन आणि संगीत दिग्दर्शन डॉ. सुभाष कन्नी यांनी केले असून, कृत्रिम बुद्धिमत्तेच्या (AI) साहाय्याने निर्मित स्वरांचा वापर हे या गाण्यांचे आणखी एक वैशिष्ट्य आहे.

पौराणिक कथेला आधुनिक तंत्रज्ञानाची जोड

‘RAAVAN – THE RISE BEFORE THE FALL’ हा केवळ पौराणिक घटनांवर आधारित चित्रपट नसून, सत्ता, महत्त्वाकांक्षा, सामर्थ्य, संघर्ष आणि आत्मपरीक्षण अशा विषयांचा वेध घेणारा हिंदी पौराणिक ॲक्शन थ्रिलर आहे. रावण या व्यक्तिमत्त्वाच्या उदयामागील विचार, त्याची शक्ती, महत्त्वाकांक्षा आणि त्याच्या प्रवासातील संघर्ष यांचा शोध चित्रपटाच्या कथानकातून घेण्यात आला आहे.

या चित्रपटाचे आणखी एक महत्त्वाचे वैशिष्ट्य म्हणजे AI-Assisted Hybrid Filmmaking ही संकल्पना. पारंपरिक चित्रपटनिर्मितीच्या पद्धतींसोबत कृत्रिम बुद्धिमत्तेवर आधारित आधुनिक साधनांचा वापर करून दृश्यात्मक आणि सर्जनशील अभिव्यक्तीला नवे आयाम देण्याचा प्रयत्न करण्यात आला आहे. भारतीय चित्रपटसृष्टीतील तांत्रिक बदलांचा उपयोग करून वेगळी कलात्मक मांडणी प्रेक्षकांसमोर आणण्याचा निर्मात्यांचा मानस आहे.

सोलापूरच्या मातीतून बॉलिवूडपर्यंतचा प्रवास

डॉ. सुभाष कन्नी हे मूळचे सोलापूरचे असून, त्यांनी बॉलिवूड चित्रपटसृष्टीत लेखन, दिग्दर्शन, संगीत आणि सर्जनशील निर्मिती या क्षेत्रांत काम केले आहे. आपल्या कामाच्या माध्यमातून वेगळी कलात्मक ओळख निर्माण करण्याचा त्यांचा प्रयत्न आहे.

सोलापूरशी असलेले नाते जपत भविष्यात आपल्या प्रॉडक्शन हाऊसच्या माध्यमातून सोलापूर आणि परिसरातील होतकरू कलाकारांना चित्रपटसृष्टीत काम करण्याची संधी उपलब्ध करून देण्याचा त्यांचा मानस आहे. अभिनय, संगीत, लेखन आणि चित्रपटनिर्मितीशी संबंधित विविध क्षेत्रांतील स्थानिक प्रतिभेला योग्य व्यासपीठ मिळावे, तसेच सोलापूरमधील कलाकारांना हिंदी चित्रपटसृष्टीपर्यंत पोहोचण्याची संधी मिळावी, अशी त्यांची इच्छा आहे.

चित्रपटप्रेमींसाठी विशेष पर्वणी

दि. २९ ऑक्टोबर रोजी होणाऱ्या या विशेष गीते प्रकाशन सोहळ्याच्या निमित्ताने सोलापूरमधील चित्रपटप्रेमींना आगामी हिंदी चित्रपटाच्या संगीतविश्वाची आणि संकल्पनेची ओळख करून घेण्याची संधी मिळणार आहे. या कार्यक्रमाला सोलापूरचे खासदार, आमदार तसेच शहरातील विविध क्षेत्रांतील मान्यवर उपस्थित राहणार असल्याचे आयोजकांनी सांगितले आहे.

या दोन्ही गाण्यांचे प्रकाशन पी. एस. मोशन रील्सच्या अधिकृत यूट्यूब चॅनेलवर करण्यात येणार असून, चित्रपटप्रेमींना ही गाणी ऑनलाइन पाहता आणि ऐकता येणार आहेत.

पौराणिक कथानक, आधुनिक तंत्रज्ञान, स्वतंत्र संगीतनिर्मिती आणि भव्य दृश्यात्मक मांडणी यांचा संगम असलेल्या ‘RAAVAN – THE RISE BEFORE THE FALL’ या चित्रपटातील दोन गाण्यांच्या प्रकाशन सोहळ्याबाबत सोलापूरमधील चित्रपटप्रेमींमध्ये उत्सुकता निर्माण झाली आहे.

  या पत्रकार परिषदेस विजयकुमार हत्तुरे, प्रा. काकासाहेब कुलकर्णी आदी उपस्थित होते.