आ. रणजीतसिंह मोहिते-पाटील यांच्याकडून पत्रकार अनिल जगताप यांचे सांत्वन

 आ. रणजीतसिंह मोहिते-पाटील यांच्याकडून पत्रकार अनिल जगताप यांचे सांत्वन

टेंभुर्णी (कटूसत्य वृत्त):- टेंभुर्णी येथील 'जनसेवा वृत्तपत्र एजन्सी'चे मालक व पत्रकार अनिल जगताप यांच्या दुःखात सहभागी होत आमदार रणजीतसिंह मोहिते-पाटील यांनी त्यांच्या निवासस्थानी भेट देऊन जगताप परिवाराचे सांत्वन केले. एकामागून एक आलेल्या संकटांमुळे जगताप कुटुंबियांवर दुःखाचा डोंगर कोसळला असून, या कठीण प्रसंगी त्यांना धीर देण्यासाठी ही भेट घेण्यात आली.

एकापाठोपाठ तीन दुःखाचे प्रसंग जगताप परिवारासाठी गेल्या काही महिन्यांचा काळ अत्यंत वेदनादायी ठरला आहे. अवघ्या तीन ते चार महिन्यांपूर्वी अनिल जगताप यांचे वडील भागवत (भाऊ) जगताप यांचे वार्धक्याने निधन झाले होते. या दुःखातून सावरत नाहीत तोच, अनिल जगताप यांच्या पत्नीचे किडनी विकार आणि हृदयविकाराच्या तीव्र झटक्याने दुर्दैवी निधन झाले. या दुःखाची सावली ओसरण्यापूर्वीच, अवघ्या १० ते १२ दिवसांत त्यांचे थोरले बंधू व 'दैनिक केसरी'चे ज्येष्ठ पत्रकार महादेवराव जगताप यांनीही कर्करोगासारख्या दुर्धर आजाराशी झुंज देत जगाचा निरोप घेतला. अवघ्या काही महिन्यांत कुटुंबातील तीन महत्त्वाच्या व्यक्तींच्या निधनाने संपूर्ण जगताप परिवार पूर्णपणे खचून गेला आहे.

'परमेश्वर परिवाराला हे दुःख सहन करण्याची शक्ती देवो'

घरातील छत्र हरपल्याने निर्माण झालेली पोकळी भरून काढणे अशक्य असले, तरी अशा अत्यंत कठीण प्रसंगी आप्तेष्ट आणि मित्रांनी दिलेला धीर दुःखातून सावरण्यास बळ देतो. आमदार रणजीतसिंह मोहिते-पाटील यांनी अनिल जगताप यांच्याशी संवाद साधून त्यांच्या पाठीशी खंबीरपणे उभे राहण्याचा विश्वास दिला. तसेच, दिवंगत आत्म्यांस शांती लाभो आणि जगताप परिवाराला या असह्य दुःखातून सावरण्याची शक्ती परमेश्वराने द्यावी, अशी प्रार्थना त्यांनी याप्रसंगी केली.

या सांत्वनपर भेटीदरम्यान राष्ट्रवादी काँग्रेस (शरदचंद्र पवार) पक्षाचे सोलापूर जिल्हा युवक नेते रावसाहेब नाना देशमुख यांच्यासह आमदार मोहिते-पाटील यांचे सहकारी, पत्रकार सदाशिव अण्णा पवार, गणेश मामा चौगुले, संतोष वाघमारे, पत्रकार विष्णू बिचकुले, चव्हाणवाडी येथील शरीफ काझी, रमेश आप्पा नांगरे, शशिकांत नांगरे , विशाल कुबेर, विजय नांगरे, संतोष देशमुख, बाळासाहेब जगताप, अनिल शिवाजी जगताप,केशव गायकवाड,तसेच चव्हाणवाडीतील ग्रामस्थ आणि मित्रपरिवार मोठ्या संख्येने उपस्थित होता.