करमाळ्यात पोलिसांची मोठी कारवाई; १० किलो गांजासह एक जण जेरबंद

 करमाळ्यात पोलिसांची मोठी कारवाई; १० किलो गांजासह एक जण जेरबंद

करमाळा (कटूसत्य वृत्त) :- करमाळा शहरात अमली पदार्थांच्या वाढत्या हालचालींबाबत चिंता व्यक्त होत असतानाच करमाळा पोलिसांनी धडक कारवाई करत तब्बल १० किलो गांजा जप्त केला आहे. या प्रकरणी गौरव उर्फ फंट्या दिलीप दोशी (रा. गुजर गल्ली, करमाळा) याला अटक करण्यात आली असून त्याच्याविरुद्ध अमली पदार्थ प्रतिबंधक कायद्यानुसार गुन्हा दाखल करण्यात आला आहे. या कारवाईमुळे शहरातील अमली पदार्थांच्या अवैध व्यवसायाला मोठा धक्का बसल्याचे मानले जात आहे.

पोलिसांनी दिलेल्या माहितीनुसार, ६ जून रोजी पोलीस कॉन्स्टेबल अर्जुन गोसावी यांना गोपनीय माहिती मिळाली होती. साडेकर प्लॉटिंग परिसरातील करमाळा पॅलेस लॉजसमोर एक व्यक्ती मोटारसायकलवरून मोठ्या प्रमाणात गांजा विक्रीसाठी घेऊन येणार असल्याची खात्रीशीर माहिती पोलिसांना प्राप्त झाली होती. या माहितीची पडताळणी करून पोलिसांनी तात्काळ सापळा रचण्याचा निर्णय घेतला.

माहिती मिळालेल्या ठिकाणी पोलिसांचे पथक गुप्तपणे तैनात करण्यात आले. काही वेळानंतर एक संशयित व्यक्ती मोटारसायकलवरून परिसरात फिरताना आढळून आली. पोलिसांची हालचाल लक्षात येताच त्याने तेथून पळ काढण्याचा प्रयत्न केला. मात्र सतर्क पोलिसांनी त्याचा पाठलाग करून श्री कमला भवानी मंदिराकडे जाणाऱ्या चौकात त्याला ताब्यात घेतले.

संशयिताची झडती घेतल्यानंतर त्याच्याकडे असलेल्या पिशव्यांमधून सुमारे १० किलो गांजा आढळून आला. पोलिसांनी तत्काळ हा गांजा जप्त करून आरोपीला अटक केली. जप्त करण्यात आलेल्या गांजाची बाजारातील किंमत लक्षणीय असल्याचे सांगितले जात आहे. आरोपीकडून हा गांजा कोठून आणण्यात आला होता आणि तो कोणाला विक्रीसाठी नेण्यात येत होता, याचा तपास आता पोलीस करीत आहेत.

या प्रकरणी करमाळा पोलीस ठाण्यात अमली पदार्थ प्रतिबंधक कायद्यानुसार गुन्हा दाखल करण्यात आला असून आरोपीची अधिक चौकशी सुरू आहे. या प्रकरणामागे मोठे रॅकेट कार्यरत आहे का, याचाही तपास केला जात असल्याची माहिती सूत्रांकडून मिळत आहे.

विशेष म्हणजे, करमाळा शहरात यापूर्वीही एमडी ड्रग्जसंबंधी प्रकरण उघडकीस आले होते. तसेच वैद्यकीय नियमांचे उल्लंघन करून अनधिकृतपणे टर्मिन इंजेक्शनची विक्री होत असल्याची प्रकरणेही समोर आली होती. या घटनांमुळे शहरात अमली पदार्थांचे जाळे विस्तारत असल्याची चर्चा सुरू असतानाच आता १० किलो गांजा जप्त झाल्याने नागरिकांमध्ये पुन्हा एकदा चिंता व्यक्त होत आहे.

अमली पदार्थांच्या विळख्यात युवक अडकत असल्याच्या तक्रारी वाढत असताना पोलिसांनी केलेली ही कारवाई महत्त्वाची मानली जात आहे. मात्र केवळ किरकोळ विक्रेत्यांवर कारवाई करून प्रश्न सुटणार नसून या व्यवसायामागील मुख्य सूत्रधार आणि पुरवठा साखळी शोधून काढण्याची गरज असल्याची मागणी नागरिकांमधून व्यक्त होत आहे.

करमाळा पोलिसांनी वेळेवर मिळालेल्या गुप्त माहितीच्या आधारे केलेल्या या कारवाईमुळे शहरात अमली पदार्थांची विक्री करणाऱ्यांमध्ये खळबळ उडाली असून आगामी काळात अशा प्रकारच्या कारवाया आणखी तीव्र करण्यात येणार असल्याचे संकेत पोलीस सूत्रांकडून देण्यात आले आहेत.