“SAMVED 2026” स्मार्ट गव्हर्नन्स हॅकाथॉनला उत्स्फूर्त प्रतिसाद

 “SAMVED 2026” स्मार्ट गव्हर्नन्स हॅकाथॉनला उत्स्फूर्त प्रतिसाद

25 संघ अंतिम फेरीत

सोलापूर कटूसत्य वृत्त):- MIT विश्वप्रयाग विद्यापीठ, सोलापूर येथे सोलापूर महानगरपालिका यांच्या सहकार्याने “SAMVED 2026” या स्मार्ट गव्हर्नन्स हॅकाथॉनचे आयोजन 15 व 16 एप्रिल 2026 रोजी करण्यात आले आहे. या उपक्रमाला देशभरातील विद्यार्थ्यांकडून उत्स्फूर्त प्रतिसाद मिळाला असून अंतिम फेरीसाठी 25 संघांची निवड करण्यात आली आहे.

या हॅकाथॉनअंतर्गत महानगरपालिकेकडून शहरातील पाच महत्त्वाच्या नागरी समस्या विद्यार्थ्यांसमोर मांडण्यात आल्या. या समस्यांवर नाविन्यपूर्ण व व्यवहार्य उपाय शोधण्याचे आव्हान सहभागी संघांना देण्यात आले होते. उच्च शिक्षण संस्था, महाविद्यालये आणि विद्यापीठांमधील विद्यार्थ्यांनी मोठ्या उत्साहाने सहभाग नोंदवला.

स्पर्धेसाठी देशातील 10 राज्यांमधून एकूण 546 विद्यार्थी संघांनी नोंदणी केली होती. त्यापैकी 507 संघांनी आपापल्या कल्पना सादर केल्या. या कल्पनांचे मूल्यांकन शैक्षणिक व औद्योगिक तज्ज्ञांकडून करण्यात आले. त्यानंतर 75 संघांची पुढील टप्प्यासाठी निवड करण्यात आली. या संघांना आपले उपाय प्रोटोटाइप स्वरूपात विकसित करण्याची संधी देण्यात आली होती.

प्री-फायनल टप्प्यात सखोल मूल्यांकनानंतर 25 संघ अंतिम फेरीसाठी पात्र ठरले. या टप्प्यात उपायांची गुणवत्ता, नाविन्य आणि व्यवहार्यता यांचा विशेष विचार करण्यात आला. या प्रक्रियेत शैक्षणिक व औद्योगिक तज्ज्ञांसह महानगरपालिकेचे अधिकारीही सहभागी होते.

अंतिम फेरीत निवडलेल्या 25 संघांना 15 एप्रिल रोजी विद्यापीठात आपले प्रकल्प सादर करण्याची संधी मिळणार आहे. त्यानंतर 16 एप्रिल रोजी अंतिम प्रकल्पांचे प्रदर्शन व पारितोषिक वितरण समारंभ विद्यापीठाच्या परिसरात होणार आहे.

या कार्यक्रमाला सोलापूर जिल्ह्याचे पालकमंत्री प्रमुख पाहुणे म्हणून उपस्थित राहणार असून अच्युत गोडबोले, कृष्णा वेदुला, विल्यम ओक्स, स्वाती चाटे कराड (कार्यकारी अध्यक्षा), गोपाळकृष्ण जोशी (कुलगुरू) तसेच सचिन ओंबासे, आयुक्त, सोलापूर महानगरपालिका हे मान्यवर उपस्थित राहणार आहेत.

हॅकाथॉनची वैशिष्ट्ये :

या उपक्रमात सोलापूर महानगरपालिकेकडून प्रत्यक्ष शहरातील समस्या विद्यार्थ्यांसमोर मांडण्यात आल्या. विविध शाखांतील विद्यार्थ्यांचे आंतरशाखीय संघ सक्रियपणे सहभागी झाले. संपूर्ण प्रक्रियेत शैक्षणिक, औद्योगिक तज्ज्ञ आणि महानगरपालिकेचे अधिकारी सहभागी होते. विद्यार्थ्यांना सातत्याने मार्गदर्शन देण्यात आले, ज्यामुळे त्यांच्या उपायांची गुणवत्ता अधिक सुधारली.

याशिवाय, MathWorks तज्ज्ञांकडून MATLAB विषयावर कार्यशाळा घेण्यात आली. त्यामुळे विद्यार्थ्यांना त्यांच्या प्रकल्पांच्या विकासात तांत्रिक मदत मिळाली.

हा उपक्रम शासन, शिक्षण आणि उद्योग यांच्यातील समन्वय अधोरेखित करणारा ठरत असून विद्यार्थ्यांमध्ये नाविन्यपूर्ण विचारसरणी आणि प्रत्यक्ष समस्या सोडवण्याची क्षमता विकसित करण्यास चालना देत आहे.