सर्व अधिकारी- कर्मचाऱ्यांनी 'कर्मयोगी' प्रशिक्षण पूर्ण करावे- वीणा पवार

 सर्व अधिकारी- कर्मचाऱ्यांनी 'कर्मयोगी' प्रशिक्षण पूर्ण करावे- वीणा पवार 

सोलापूर (कटूसत्य वृत्त):- राज्य शासनाच्या महा साधना सप्ताह या उपक्रमांतर्गत सर्व अधिकारी कर्मचारी यांना ऑनलाईन प्रशिक्षण देण्यात येणार आहे. या उपक्रमात सोलापूर महानगरपालिका सर्व अधिकारी- कर्मचारी यांनी सहभागी व्हावे व प्रशिक्षण पूर्ण करावे, असे आवाहन अतिरिक्त आयुक्त वीणा पवार यांनी  केले. भारत सरकार क्षमता विकास आयोग आणि कर्मयोगी भारत यांच्या संयुक्त विद्यमाने दि. २ ते ८ या दरम्यान 'साधना सप्ताह' राबविण्यात येणार आहे. अधिकारी कर्मचारी यांना | Got कर्मयोगी या प्लॅटफॉर्मवर किमान ४ तासाचे प्रशिक्षण देण्यात येणार आहे. या प्रशिक्षण कार्यक्रमाची सुरुवात आज एका प्रशिक्षण कार्यशाळेद्वारे करण्यात आली. 2 एप्रिल रोजी दुपारी 3 वाजता इंद्रभुवन इमारतीत मीटिंग हॉल सभागृहात हे प्रशिक्षण पार पडले. या कार्यशाळेस उपायुक्त सोनाली यादव, सहायक आयुक्त मनिषा मगर , सहायक आयुक्त गिरीश पंडित ,सर्व  विभागप्रमुख, विभागीय अधिकारी,कार्यालयप्रमुख तसेच कर्मचारी सहभागी झाले होते.

संगणक विभाग प्रमुख स्नेहल चपळगावकर  यांनी महा साधना सप्ताह, तसेच i-Got प्रणाली नोंदणी व पूर्ण करावयाचे अभ्यासक्रम याविषयी तांत्रिक मार्गदर्शन केले.

राज्य शासनाने हा उपक्रम 'महासाधना' उपक्रम म्हणून राबविण्याचे ठरविले आहे. शासकीय अधिकारी व कर्मचाऱ्यांना बदलत्या काळातील आव्हानांना समर्थपणे सामोरे जाण्यासाठी हा प्रशिक्षण कार्यक्रम राबविण्यात येत आहे. या उपक्रमाच्या माध्यमातून प्रशासन अधिक गतिमान, पारदर्शक आणि परिणामकारक बनविण्याचा प्रयत्न होत आहे. या उपक्रमांतर्गत विविध सादरीकरणे, मार्गदर्शन सत्रे आणि प्रशिक्षण कार्यक्रम आयोजित करण्यात येत आहेत. यामध्ये डिजिटल तंत्रज्ञानाचा वापर, ई-गव्हर्नन्स प्रणाली, प्रभावी संवाद कौशल्य, तसेच कार्यालयीन कामकाजातील कार्यक्षमता वाढविण्यावर विशेष भर देण्यात आला आहे. बदलत्या तंत्रज्ञानाच्या पार्श्वभूमीवर अधिकारी व कर्मचाऱ्यांना अद्ययावत ज्ञान व कौशल्ये आत्मसात करता यावीत, हा या उपक्रमाचा मुख्य उद्देश आहे. हे सर्व अधिकारी कर्मचारी या प्रशिक्षण कार्यक्रमात सहभागी होतील.प्रशासनातील कामकाज अधिक सुलभ, जलद आणि पारदर्शक करण्यासाठी या प्रशिक्षणाचा उपयोग होणार आहे. तसेच नागरिकांना वेळेत आणि दर्जेदार सेवा उपलब्ध करून देण्यासाठीही हा उपक्रम उपयुक्त ठरेल, असे मत अतिरिक्त आयुक्त वीणा पवार यांनी व्यक्त केले. अधिकारी कर्मचाऱ्यांना आधुनिक प्रशिक्षणाने अद्यावत करणाऱ्या या उपक्रमात सर्व अधिकारी कर्मचारी यांनी सहभागी होऊन नेमून दिलेल्या कालावधीत प्रशिक्षण पूर्ण करावे, असे निर्देश अतिरिक्त आयुक्त वीणा पवार यांनी दिले.