पंढरपूर(कटूसत्य वृत्त):- महाराष्ट्र राज्याच्या सांस्कृतिक धोरण (२०१०) अंतर्गत जिल्हा ग्रंथालय अधिकारी कार्यालय, सोलापूर आणि पंढरपूर तालुका ग्रंथालय संघ यांच्या संयुक्त विद्यमाने पंढरपूर येथे जिल्हास्तरीय ग्रंथालय अधिवेशन व ग्रंथमहोत्सवाचे आयोजन करण्यात आले आहे. विठ्ठल–रुक्मिणीच्या पवित्र नगरीत असलेल्या रुक्मिणी सभागृहात हा कार्यक्रम पार पडत असून, तालुक्यातील सर्व ग्रंथालय पदाधिकारी व कर्मचाऱ्यांचा सक्रिय सहभाग यामध्ये अपेक्षित आहे.
या अधिवेशनाच्या माध्यमातून वाचन संस्कृतीचा प्रसार, ग्रंथालयांचे बळकटीकरण तसेच समाजात ज्ञानवर्धनाची चळवळ अधिक प्रभावी करण्याचा प्रयत्न करण्यात येत आहे. ग्रंथालय क्षेत्रातील विविध उपक्रम, पुस्तक प्रदर्शन, चर्चासत्रे आणि ग्रंथालय व्यवस्थापनासंदर्भातील मार्गदर्शन अशा विविध कार्यक्रमांचे आयोजन या ग्रंथमहोत्सवात करण्यात आले आहे.
तालुक्यातील सर्व ग्रंथालय पदाधिकारी व कर्मचाऱ्यांनी हा कार्यक्रम आपल्या घरातील कार्यक्रम समजून पूर्ण वेळ देऊन सहकार्य करावे, तसेच त्यांना सोपविण्यात आलेल्या विभागांमध्ये परस्पर सहकार्याने आपापल्या जबाबदाऱ्या प्रामाणिकपणे पार पाडाव्यात, असे आवाहन जिल्हा ग्रंथालय संघाचे अध्यक्ष मा. श्री. ज्योतीराम गायकवाड यांनी केले आहे.
प्रत्येकाला वैयक्तिकरित्या संपर्क साधणे शक्य नसल्यामुळे सर्वांना सामूहिकरित्या सूचना देण्यात आल्याचे त्यांनी नमूद केले. तसेच सर्वांनी ग्रंथालय अधिवेशन व ग्रंथमहोत्सव यशस्वी करण्यासाठी सक्रिय सहभाग नोंदवावा, असेही त्यांनी आवर्जून सांगितले.
या अधिवेशनामुळे पंढरपूर तालुक्यातील ग्रंथालय चळवळीला नवसंजीवनी मिळेल, तसेच वाचन संस्कृतीला चालना मिळून समाजात ज्ञानवर्धनाचा संदेश अधिक प्रभावीपणे पोहोचेल, असा विश्वास आयोजकांनी व्यक्त केला आहे.
.jpg)
No comments:
Post a Comment