शिक्षण क्षेत्रात खळबळ

 शिक्षण क्षेत्रात खळबळ

परीक्षेच्या आदल्या दिवशी भूगोलाच्या ५० प्रश्नपत्रिका चोरीला

सोलापूर (कटूसत्य वृत्त):- परीक्षेआधीच दहावीचा भूगोल पेपर फुटल्याची बातमी समोर आली आहे. सोलापूर जिल्ह्यातल्या सांगोल्यामध्ये दहावीच्या भूगोल पेपरची चोरी झाली. या पेपर चोरी प्रकरणाची बोर्डाने दखल घेतली. या प्रकरणाच्या तपासासाठी बोर्डाचे अधिकारी सांगोल्याला तात्काळ रवाना झाले आहेत. महाराष्ट्र राज्य शिक्षण मंडळाचे उपसंचालक स्वतः सांगोल्यातील ज्या शाळेतून भूगोलाच्या पेपरची चोरी झाली होती त्या ठिकाणाला भेट देणार आहेत.

सोलापुरातील सांगोल्यामध्ये असलेल्या सांगोला विद्यामंदिर प्रशालेतून भूगोलाच्या तब्बल ५० प्रश्नपत्रिका चोरीला गेल्या होत्या. या प्रकरणी पोलिस ठाण्यात तक्रार दाखल करण्यात आली आहे. या पेपर फुटी प्रकरणाची पोलिसांनी दखल घेत चौकशी सुरू केली आहे. या तपासातून शाळेमधील सीसीटीव्ही कॅमेरे बंद असल्याची धक्कादायक माहिती समोर आली आहे.

सांगोला विद्या मंदिर विद्यालयाच्या कस्टी रूमचे कुलूप तोडून अज्ञात चोरांनी दहावीच्या भूगोल विषयाच्या ५० प्रश्नपत्रिका चोरून नेल्याची घटना घडली होती. दरम्यान कस्टी रूमच्या बाहेर सीसीटीव्ही कॅमेरे बंद असल्याची बाब आता पोलिस तपासातून समोर आली आहे. या घटनेनंतर खळबळ उडाली आहे.‌ प्रश्नपत्रिका चोरी प्रकरणी पोलिसांनी तपास सुरू केला आहे.

सोलापूर जिल्हा पोलिस उपाधीक्षक प्रीतम कुमार यावलकर यांनी घटनास्थळी येऊन भेट दिली आहे. दरम्यान पुणे बोर्डाचे अधिकारी देखील या शाळेला भेट देणार आहेत. भूगोलाची प्रश्नपत्रिका चोरी झाल्यानंतर उद्याच्या भूगोल पेपर विषयी विद्यार्थी आणि पालकांमध्ये संभ्रम निर्माण झाला आहे. पेपर पुढे जाण्याची शक्यता वर्तवली जात आहे.

दरम्यान, सांगोला विद्यामंदिर येथील दहावीच्या भूगोल विषयाच्या ५० प्रश्नपत्रिकांचा गठ्ठा चोरीला गेल्या प्रकरणी बंदोबस्तासाठी असलेले पोलिस कर्मचारी आणि होमगार्ड दोषी असतील तर त्याच्याविरोधात कारवाई होईल. सोलापूर ग्रामीण अप्पर पोलिस अधीक्षक प्रीतमकुमार यावलकर यांनी ही माहिती दिली.