टेंभुर्णी–कुर्डूवाडी रोडवर भीषण अपघात

टेंभुर्णी–कुर्डूवाडी रोडवर भीषण अपघात

तिघांचा जागीच मृत्यू, एक महिला गंभीर जखमी

टेंभुर्णी (कटूसत्य वृत्त):- टेंभुर्णी–कुर्डूवाडी रोडवर तांबवे गावच्या हद्दीत विटभटीजवळ भरधाव एस टी बसने कारला समोरासमोर जोरदार धडक दिल्याने झालेल्या भीषण अपघातात तिघांचा जागीच मृत्यू झाला, तर एक महिला गंभीर जखमी झाली आहे. 

बुधवारी (दि. 28 जानेवारी 2026) दुपारी सुमारे 2.45 वाजण्याच्या सुमारास घडलेल्या या हृदयद्रावक घटनेमुळे फलटण व कोळकी परिसरात शोककळा पसरली  आहे.

या बाबत टेंभुर्णी पोलीस ठाण्यात गुन्हा रजिस्टर नं. 48/2026 नुसार भा.न्या.सं. 2023 चे कलम 281, 106(1), 125(ब), 324(5) तसेच मोटार वाहन अधिनियम कलम 184 प्रमाणे गुन्हा दाखल करण्यात आला आहे. या प्रकरणात अनिल जगन्नाथ यादव (वय 50, व्यवसाय – सलून व्यवसाय, रा. निमगाव केतकी, ता. इंदापूर, जि. पुणे) यांनी फिर्याद दिली आहे.

फिर्यादीतील माहितीनुसार, सुराज्य तालमीचे 

उस्ताद  बाळासाहेब महादेव काशिद (वय 57),

सनिता  काशिद (वय 50) — दोघे रा. बुवासाहेब नगर, कोळकी, ता. फलटन, जि. सातारा तसेच

शारदा संभाजी राऊत (वय 65) व

मुक्ताबाई कल्याण राऊत (वय 70) — दोघी रा. तावशी, ता. इंदापूर, जि. पुणे

हे सर्वजण माढा येथून टेंभुर्णीकडे मारुती सुझुकी बलेनो (क्र. एमएच 11 सी.जी. 9066) या कारमधून प्रवास करत होते.

दुपारी सुमारे 2.45 वाजता तांबवे गावच्या हद्दीत विटभटीजवळ टेंभुर्णीकडून येणाऱ्या एस टी बस क्रमांक एमएच 14 एमएच 0198 वरील चालक जोतीराम भीमराव जाधव (रा. गीता नगर, पणदारे, पुणे) याने आपल्या ताब्यातील एस टी बस ही रस्त्याच्या परिस्थितीकडे दुर्लक्ष करून, निष्काळजीपणे व भरधाव वेगात चालवली. समोरील वाहनाला ओव्हरटेक करण्याच्या प्रयत्नात त्याने बसचे तोंड रस्त्याच्या बाहेर काढल्याने समोरून येणाऱ्या बलेनो कारला समोरासमोर जोरदार धडक दिली.

या भीषण धडकेत

 सुराज्य तालीमचे उस्ताद पैलवान बाळासाहेब काशिद,सनिता  काशिद आणि शारदा संभाजी राऊत हे तिघे गंभीर जखमी होऊन उपचारापूर्वीच मृत्यूमुखी पडले. तर मुक्ताबाई कल्याण राऊत या गंभीर जखमी असून त्यांच्यावर सध्या रुग्णालयात उपचार सुरू आहेत.

एस टी बस क्रमांक एमएच 14 एमएच 0198 चे सुमारे ₹1 लाख 50 हजार,

तर बलेनो कार क्रमांक एमएच 11 सी.जी. 9066 चे सुमारे ₹50 हजार रुपयांचे नुकसान झाल्याचे फिर्यादीत नमूद करण्यात आले आहे.

या प्रकरणी बस चालक जोतीराम भीमराव जाधव याच्याविरुद्ध टेंभुर्णी पोलीस ठाण्यात गुन्हा दाखल करण्यात आला असून, पोहेकॉ/976 देवकर यांनी गुन्हा दाखल केला आहे. पुढील तपास टेंभुर्णी पोलीस स्टेशनचे पोलीस निरीक्षक नारायण पवार यांच्या मार्गदर्शनाखाली सहाय्यक पोलीस निरीक्षक गणेश चौधरी करत आहेत.