शिंदेसेनेकडून पुन्हा भाजप लक्ष्य; महायुतीत ‘साखरपुड्यापेक्षा’ भांडणं जास्त!

सोलापूर (कटूसत्य वृत्त):- महायुतीच्या गाडीत तीन चाके असली तरी दिशादर्शन एकाच्याकडे नाही! भाजप, शिंदेसेना आणि अजित पवारांची राष्ट्रवादी या तिन्ही घटकपक्षांमध्ये सध्या "आलबेल" पेक्षा "आलबेल नसलेले" वातावरण अधिक आहे. एकमेकांवर कुरघोडी करण्याची संधी कोणीही दवडत नाही. आणि आता या राजकीय गाडीचा नवा धक्का म्हणजे शिंदेसेनेकडून भाजपवर पुन्हा हल्लाबोल!

अगदी सहा महिन्यांपूर्वी शिंदेसेनेत काँग्रेसचे माजी आमदार सिद्धाराम म्हेत्रे यांच्या झालेल्या प्रवेशाने भाजपचा पारा चढला होता. कारण म्हेत्रे हे भाजपचे प्रभावशाली आमदार सचिन कल्याणशेट्टी यांचे कट्टर प्रतिस्पर्धी! आणि त्याहूनही भाजपला जास्त झोंबलेली गोष्ट म्हणजे मुख्यमंत्री एकनाथ शिंदे स्वतः त्या प्रवेश सोहळ्यासाठी मंचावर उपस्थित होते! त्या दिवसापासूनच भाजप आणि शिंदेसेना यांच्यातील साखरपुड्याची गोडी संपली आणि कुरघोडीचं राजकारण सुरू झालं.

मग काय, भाजपने ताबडतोब ‘ऑपरेशन लोटस’चा मोर्चा सुरू केला. शिंदेसेनेतील काही मातब्बरांना चुचकारण्याची, त्यांना “उजव्या हाताने” घेण्याची प्रक्रिया सुरू झाली. त्यात प्रा. शिवाजी सावंत यांनी भाजप प्रवेशाची तयारी सुरू केल्याचं राजकीय वर्तुळात चर्चेत आलं आहे.

यावर उत्तर देताना एकनाथ शिंदे यांनीही आपला डाव चोख खेळला. कार्तिकी एकादशीच्या निमित्ताने त्यांनी भाजपचे आमदार समाधान आवताडे यांच्या बंधू बबनराव आवताडे यांची विशेष भेट घेतली. ही भेट योगायोगाने झाली, असं सांगणं सुद्धा पक्षनेत्यांना अवघड गेलं! कारण भेटीचं राजकीय फलित काही दिवसांत समोर येईल, अशी खात्री शिंदे गटातील सूत्रांनीच दिली आहे.

राजकीय विश्लेषकांचं म्हणणं आहे की, “महायुतीत सत्तेचा गोडवा संपतोय, आणि आता प्रत्येक पक्ष स्वतःचा पाय मजबूत करण्याच्या प्रयत्नात आहे.”

भाजपला आपला बालेकिल्ला टिकवायचा आहे, तर शिंदेसेनेला दाखवायचं आहे की ती केवळ ‘जोडा धरून चालणारी सेना’ नाही. त्यामुळेच म्हेत्रेंपासून आवताड्यांपर्यंतचा खेळ आता खुला झाला आहे.

या घडामोडींनी महायुतीतील अंतर्गत तणाव आणखी वाढवला आहे. एकनाथ शिंदे आणि देवेंद्र फडणवीस यांच्या नात्याला सध्या ‘राजकीय डोकेदुखी’ म्हणावं लागेल. एकमेकांचे नेते ओढून घेणे, खालच्या पातळीवर शक्तिप्रदर्शन करणे आणि सत्तेचा गंड सांभाळणे हा आता रोजचाच कार्यक्रम बनला आहे.

महायुतीचे तीन भाग भाजप, शिंदेसेना आणि अजित पवारांची राष्ट्रवादी हे बाहेरून एकत्र दिसत असले तरी आतून घड्याळाचे काटे वेगवेगळ्या दिशेला फिरत आहेत.एकनाथ शिंदे यांची ही “आवताडे भेट” म्हणजे भाजपला दिलेला थेट सिग्नलच म्हणावा लागेल. “खेळ अजून बाकी आहे, आणि लक्ष्य आता भाजपचं!”