पोलिस पाटलाच्या अल्पवयीन मुलीच्या हातात चारचाकी; धडक बसल्याने एकाचा मृत्यू पुणे पोर्शे दुर्घटनेचे शिरूर तालुक्यामध्ये पुनरावृत्ती

 पोलिस पाटलाच्या अल्पवयीन मुलीच्या हातात चारचाकी; धडक बसल्याने

 एकाचा मृत्यू पुणे पोर्शे दुर्घटनेचे शिरूर तालुक्यामध्ये पुनरावृत्ती

 शिरूर (कटूसत्य वृत्त):- सध्या पुण्यातील हिट अँड रण प्रकरणाची देशभरात जोरदार चर्चा असुन एका बड्या बांधकाम व्यावसायिकाच्या मुलाने दारुच्या नशेत वेगाने आलिशान पोर्शे कार चालवून दोघांना उडवल्याने दुचाकीवरील तरुण-तरुणीचा मृत्यू झाला होता. शिरुर तालुक्यातही पोर्शे पॅटर्नचीचं पुनरावृत्ती  झाली असुन एका अल्पवयीन पोलिस पाटलाच्या मुलीने दि 31 मे 2024 रोजी सकाळी 10: 15 च्या सुमारास मालवाहू पिकउप चालविताना दुचाकीला धडक दिल्याने दुचाकीवरील तीसवर्षीय तरुणाचा जागीच मृत्यू झाला असुन दुसरा व्यक्ती जखमी झाला आहे. 

याबाबत शिक्रापुर पोलिस स्टेशन येथे सतिश विठ्ठल मेमाणे (रा.वडगाव बांडे, ता. दौंड, जि. पुणे) यांनी फिर्याद दाखल केली असुन दि 31 मे 2024 रोजी सकाळी 10:15 च्या सुमारास मयत अरुण विठ्ठल मेमाणे व त्याचा मित्र महिंद्र राउसाहेब बांडे हे दोघेही स्प्लेंडर मोटार सायकल क्रं एम एच 12 व्ही आर 2072 घेवुन रोहित्राचे (Transformer) ऑइल आणण्यासाठी वडगावबांडे येथुन न्हावरे गावात निघाले होते. जाताना मोटार सायकल अरुण विठ्ठल मेमाणे हा चालवित होता. त्याच्या पाठीमागे महिंद्र राउसाहेब बांडे हा बसलेला होता. सदर मोटारसायकल अरणगाव (ता. शिरुर) येथे आली असताना त्यांच्या मोटार सायकलला अरणगावातील पिकअप नंबर एम एच 12 एस एफ 3439 यावरील चालकाने समोरासमोर धडक दिली. यात दुचाकी चालक अरुण मेमाणे याचा जागीच मृत्यू झाला तर महिंद्र बांडे हा जखमी झाला. 

हा अपघात एवढा गंभीर होता की मालवाहु पिकअपने मोटार सायकलसह चालकास 20 ते 30 फुट फरफटत नेले. पिकअप क्रं एम एच 12 एस एफ 3439 अरणगावातील पोलिस पाटील संतोष लेंडे यांची अल्पवयीन मुलगी (अंदाजे वय 15) चालवत होती. तिच्या सोबत शेजारील सिटवर पोलिस पाटील संतोष निवृत्ती लेंडे बसले होते. सदर मुलीने तिच्या ताब्यातील सदरचा पिकअप हा जोरात भरधाव वेगात चालवुन सायकलला समोरुन ठोस देवुन सदरचा अपघात केला आहे. तसेच अपघात झाल्यानंतर मदत न करता ते दोघे ही पिकअप सोडुन तेथुन निघुन गेले. याबाबत शिक्रापुर पोलिस स्टेशन येथे मयत अरुण मेमाणे यांचा भाऊ सतिश मेमाणे यांनी फिर्याद दिली असुन अल्पवयीन मुलीचे वडील अरणगावचे पोलिस पाटील संतोष लेंडे यांच्यासह अल्पवयीन मुलीवर गुन्हा दाखल झाला असुन या घटनेचा पुढील अधिक तपास शिक्रापुर पोलिस करत आहेत.

 पुणे पोर्शे दुर्घटना नुकतीच झालेले असून यामधून नागरिक काहीतरी बोध घेतील असे वाटत असतानाच शिरूर तालुक्यामध्ये याचेच पुनरावृत्ती झालेली असून अनेक लहान तरुणांच्या हाती ट्रॅक्टर असतील मालवाहतूक गाडी असेल किंवा दुचाकी असेल याचा सरास वापर करताना दिसत आहे तरी प्रशासनाने कठोर कारवाई किंवा भूमिका घ्यावी- तेजस फडके 

शिरूर तालुका पत्रकार महासंघ