जिल्हास्तरीय अंमली पदार्थ विरोधी कार्यकारी समितीची पहिली बैठक

पोस्ट आणि खाजगी कुरिअरच्या गोडावूनची तपासणी करणार डॉग स्क्वॉड पोलीस अधीक्षक तेजस्वी सातपुते

सोलापूर, (कटुसत्य वृत्त): जिल्ह्यात अंमली पदार्थांवर आळा घालण्यासाठी जिल्हास्तरीय अंमली पदार्थ विरोधी कार्यकारी समितीची स्थापना करण्यात आली आहे. जिल्ह्यात अंमली पदार्थांची विक्री आणि तस्करी होऊ यासाठी पोस्ट कार्यालय आणि खाजगी कुरिअरच्या गोडावूनची तपासणी डॉग स्क्वॉडद्वारे केली जाणार असल्याची माहिती जिल्हा पोलीस अधीक्षक तेजस्वी सातपुते यांनी दिली.

जिल्हास्तरीय अंमली पदार्थ विरोधी कार्यकारी समितीच्या बैठकीत श्रीमती सातपुते बोलत होत्या. यावेळी सोलापूर पोस्ट विभागाचे वरिष्ठ अधीक्षक ए. व्यंकटेश्वर रेड्डी, राज्य उत्पादन शुल्कचे अधीक्षक नितीन धार्मिक, केंद्रीय कस्टम विभागाचे सीमा शुल्क अधीक्षक फुलचंद राठोड, नायब तहसीलदार आर.आर. कुरणे, औषध निरीक्षक सचिन कांबळे, कृषी उपसंचालक राजकुमार मोरे, वरिष्ठ पोलीस निरीक्षक सुहास जगताप आदी उपस्थित होते.

श्रीमती सातपुते यांनी सांगितले की, आपल्या जिल्ह्यात खसखस आणि गांजाची लागवड होऊ नये, याबाबत कृषी विभागाने दक्षता घ्यावी. कृषी सहायकाने पीक नोंदीची माहिती घेताना काही आढळले तर पोलीस विभागाला कळवावे. पोस्ट विभागाने आणि खाजगी कुरिअरवाल्यांनी बारकाईने लक्ष द्यावे. पोस्टाची आणि खाजगी कुरिअरची पाकिटांची गोडावूनची तपासणी नियमीत करतील. शिवाय जिल्ह्यातील व्यसनमुक्ती केंद्रांची माहिती घ्यावी. या केंद्रात येणाऱ्यांकडून काय व्यसन होते...अंमली पदार्थ माहिती आहेत का...याची माहिती संकलित करावी. या केंद्रावरही दक्षता ठेवण्याच्या सूचना त्यांनी दिल्या. अंमली पदार्थाचे व्यसन असेल तर ते लगेच सुटू शकत नाही, याकरिता वेळ द्यायला हवा.

मेडिकल वापरासाठी आलेली औषधे ड्रग्ज म्हणून वापर होऊ नये, याची दक्षता अन्न व औषध प्रशासनाने घ्यावी. राज्य उत्पादन शुल्क विभागाने रासायनिक कारखान्यांमध्ये अंमली पदार्थांचे उत्पादन होणार नाही, याची दक्षता घेण्याच्या सूचनाही त्यांनी दिल्या. ड्रग्ज डिटेक्शन कीट आणि तपासणीसाठी लागणारे रसायन हे पोस्ट कार्यालय, एलसीबी आणि राज्य उत्पादन शुल्क विभागाकडे असायला हवे, असेही त्यांनी सांगितले.

प्रत्येक विभागांनी तालुका दत्तक घेऊन अंमली पदार्थांचे सेवन केल्यास होणाऱ्या दुष्परिणामांची माहिती जनतेला द्यावी. याबाबत जनजागृती करण्याच्या सूचनाही त्यांनी दिल्या.