ज्येष्ठ अभिनेते नाना पाटेकर यांच्या निधनाने भारतीय कलाविश्वाची मोठी हानी – राज्यमंत्री मेघना साकोरे-बोर्डीकर

 

ज्येष्ठ अभिनेते नाना पाटेकर यांच्या निधनाने भारतीय कलावि

श्वाची मोठी हानी – राज्यमंत्री मेघना साकोरे-बोर्डीकर

मुंबई(कटूसत्य वृत्त):- भारतीय रंगभूमीपासून आपल्या अभिनयप्रवासाची सुरुवात करून मराठी तसेच हिंदी चित्रपटसृष्टीवर आपल्या अफाट अभिनयाची अमीट छाप उमटविणारे ज्येष्ठ अभिनेते नाना पाटेकर यांच्या निधनाचे वृत्त अत्यंत दुःखद आणि मन हेलावून टाकणारे आहे. त्यांच्या निधनाने भारतीय कलाविश्वाची कधीही भरून न निघणारी हानी झाली आहे, अशा शब्दांत राज्यमंत्री मेघना साकोरे-बोर्डीकर यांनी श्रद्धांजली अर्पण केली.

‘क्रांतीवीर’, ‘परिंदा’, ‘अंकुश’, ‘नटसम्राट’ यांसारख्या अजरामर चित्रपटांमधून नाना पाटेकर यांनी आपल्या अभिनयाची विलक्षण ताकद दाखवून दिली. त्यांचा दमदार अभिनय, प्रभावी संवादफेक आणि भूमिकेला जिवंत करण्याची हातोटी रसिकांच्या कायम स्मरणात राहील. मराठी बाणा, परखड स्वभाव आणि संवेदनशील व्यक्तिमत्त्व यांचा अनोखा संगम त्यांच्या व्यक्तिमत्त्वात होता, असे राज्यमंत्री मेघना साकोरे-बोर्डीकर यांनी म्हटले आहे.

अभिनय क्षेत्रातील योगदानासोबतच ‘नाम फाउंडेशन’च्या माध्यमातून शेतकरी आणि गरजूंसाठी केलेले कार्य हे नाना पाटेकर यांच्या सामाजिक बांधिलकीचे आणि संवेदनशीलतेचे दर्शन घडविणारे होते. कला आणि समाजसेवा या दोन्ही क्षेत्रांत त्यांनी आपल्या कार्याचा ठसा उमटविला.

ज्येष्ठ अभिनेते नाना पाटेकर यांच्या निधनाने मराठी तसेच भारतीय चित्रपटसृष्टीतील एक बुलंद तारा निखळला आहे. त्यांच्या अभिनयाची समृद्ध परंपरा आणि त्यांनी साकारलेल्या भूमिका रसिकांच्या स्मरणात सदैव राहतील. त्यांच्या कुटुंबीय, आप्तस्वकीय आणि असंख्य चाहत्यांच्या दुःखात सहभागी असल्याचे राज्यमंत्री मेघना साकोरे-बोर्डीकर यांनी शोकसंदेशात म्हटले आहे.