सापटणे तलावात पाणी सोडा अन्यथा जनावरांसह रास्ता रोको! सापटणे, तांबवे व वेणेगावातील शेतकरी आक्रमक;

 सापटणे तलावात पाणी सोडा  अन्यथा जनावरांसह रास्ता रोको! सापटणे, तांबवे व वेणेगावातील शेतकरी आक्रमक; 

टेंभुर्णी (कटूसत्य वृत्त):-   माढा तालुक्यातील सापटणे (टें) तलावात पाणी सोडण्याच्या मागणीकडे वारंवार मागणी करूनही पाणी सोडले नसल्याने  सापटणे,तांबवे आणि वेणेगाव या तीन गावातील शेतकऱ्यांनी आक्रमक भूमिका घेतली आहे. तलावात तातडीने पाणी सोडण्यात यावे, अन्यथा शुक्रवार, दि. १६ ऑक्टोबर २०२६ रोजी सकाळी १० वाजता सापटणे हद्दीतील हॉटेल पाटीलराज जवळ सोलापूर पुणे-राष्ट्रीय महामार्गावर जनावरांसह रास्ता रोको आंदोलन करण्यात येणार असल्याचा इशारा निवेदनाद्वारे देण्यात आला आहे.

   

 पावसाळ्यात पाऊस न पडल्याने सापटणे, तांबवे आणि वेणेगाव परिसरातील शेतकरी सध्या पाणीटंचाईच्या गंभीर समस्येला सामोरे जात आहेत. गेल्या पाच ते सहा महिन्यांपासून सापटणे तलावात पाणी नसल्याने परिसरातील पाणीपातळी मोठ्या प्रमाणात खालावली आहे. परिणामी, पिण्याच्या पाण्यासह जनावरांच्या चारा आणि पाण्याचा प्रश्न गंभीर बनला असल्याचे शेतकऱ्यांनी सांगितले 

सापटणे पाणी वापर संस्थेने तलावात पाणी सोडण्याची वारंवार मागणी केली आहे. तसेच सापटणे, तांबवे आणि वेणेगाव ग्रामपंचायतींच्या वतीनेही दि. ७ ऑक्टोबर २०२६ रोजी शासनाकडे पाणी सोडण्याची मागणी करण्यात आली होती. त्यानंतर दि. ९ ऑक्टोबर रोजीही संबंधित विभागाकडे निवेदन देण्यात आले. मात्र, अद्याप तलावात पाणी सोडण्यात आले नसल्याने १६ ऑक्टोबर रोजी सोलापूर-पुणे राष्ट्रीय महामार्गावर जनावरांसह रास्ता रोको करण्याचा इशारा देण्यात आला.यावेळी माजी सभापती तुकाराम ढवळे,अशोक खटके,नागेश क्षीरसागर,यांचेसह तिन्ही गावातील शेतकरी उपस्थित होते.