‘महाराष्ट्र राज्य उत्कृष्ट सार्वजनिक गणेशोत्सव मंडळ स्पर्धा २०२६’ मध्ये हाँगकाँग, उत्तराखंड आणि सांगलीच्या गणेशोत्सव मंडळांची राज्यस्तरीय स्पर्धेत बाजी

मुंबई,(कटूसत्य वृत्त):- ‘महागणेशोत्सव : महाराष्ट्राचा राज्य उत्सव’ अंतर्गत आयोजित ‘महाराष्ट्र राज्य उत्कृष्ट सार्वजनिक गणेशोत्सव मंडळ स्पर्धा २०२६’ मध्ये आंतरराष्ट्रीय स्तरावर हाँगकाँग, राष्ट्रीय स्तरावर उत्तराखंड आणि राज्य स्तरावर सांगली येथील गणेशोत्सव मंडळांनी प्रथम क्रमांक पटकावला आहे. यंदा प्रथमच जाहीर करण्यात आलेल्या ‘वेलिंग-खातू गणेशमूर्तीकार’ पुरस्काराचे पहिले मानकरी मूर्तिकार राजन विष्णू पाटकर ठरले आहेत. या स्पर्धेत एकूण ३५४ गणेशोत्सव मंडळांनी सहभाग घेतला होता.

आंतरराष्ट्रीय स्तरावरील स्पर्धेत महाराष्ट्र मंडळ, हाँगकाँग यांनी प्रथम, एडोगावा इंडिया कल्चर सेंटर, जपान यांनी द्वितीय, तर हेसन इंडियन लेडीज असोसिएशन अँड पायोनियर इंडियन्स ई.व्ही. यांनी तृतीय क्रमांक मिळविला. राष्ट्रीय स्तरावर महाराष्ट्र समाज सेवा समिती, उत्तराखंड यांनी प्रथम, श्री राम युवक मंडळ, कर्नाटक यांनी द्वितीय, तर गणराया गणेश उत्सव, गुजरात यांनी तृतीय क्रमांक पटकावला. राज्यस्तरीय स्पर्धेत मोरया गणेश मंडळ, सांगली यांनी प्रथम, छत्रपती सार्वजनिक गणेश मंडळ, दीपकनगर, नांदेड यांनी द्वितीय, तर स्वराज्य गणेश मंडळ, देवनांद्रा यांनी तृतीय क्रमांक मिळविला.

आंतरराष्ट्रीय, राष्ट्रीय आणि राज्यस्तरावरील प्रथम, द्वितीय व तृतीय क्रमांकाच्या विजेत्यांना अनुक्रमे साडेसात लाख, पाच लाख आणि अडीच लाख रुपये रोख पारितोषिकासह सन्मानचिन्ह देऊन गौरविण्यात येणार आहे. या स्पर्धेचा विस्तार जिल्हा आणि तालुकास्तरापर्यंत करण्यात आला असून, जिल्हास्तरीय प्रथम, द्वितीय व तृतीय क्रमांकाच्या विजेत्यांसह तालुकास्तरीय विजेत्या मंडळांचीही घोषणा करण्यात आली आहे.

पारंपरिक मूर्तिकलेचा वारसा जपणारे राजन पाटकर पुरस्काराचे पहिले मानकरी

राज्य शासनाने यंदा प्रथमच ‘वेलिंग-खातू गणेशमूर्तीकार’ पुरस्कार सुरू केला आहे. या पुरस्कारासाठी राजन विष्णू पाटकर यांची निवड करण्यात आली असून, त्यांना सन्मानचिन्ह, शाल आणि अडीच लाख रुपये रोख देऊन गौरविण्यात येणार आहे.

राजन पाटकर हे पारंपरिक कौटुंबिक मूर्तिकलेचा वारसा जपणारे मूर्तिकार आहेत. भव्य, आकर्षक आणि भावपूर्ण गणेशमूर्तींच्या निर्मितीत त्यांचे महत्वपूर्ण योगदान आहे. मुंबईतील प्रसिद्ध ‘गिरगावचा राजा’ गणेशोत्सव मंडळाच्या मूर्तिनिर्मितीशी त्यांचे नाव जोडले गेले आहे. तसेच वडाळा येथील जी.एस.बी. सेवा मंडळाच्या महाकाय गणेशमूर्तीचे ते मुख्य मूर्तिकार असून, गेल्या ३५ वर्षांहून अधिक काळ ते या मूर्तीची निर्मिती करीत आहेत.

पारंपरिक कलेसोबतच पर्यावरणपूरक मूर्तिनिर्मितीलाही त्यांनी प्राधान्य दिले आहे. त्यांच्या हलक्या वजनाच्या पेपर मेशीपासून तयार केलेल्या गणेशमूर्ती मुंबईसह लंडनपर्यंत पाठविल्या जातात. पाण्यात सहज विरघळणाऱ्या या मूर्ती पर्यावरणपूरक गणेशोत्सवाच्या संकल्पनेला प्रोत्साहन देतात.

१६ ऑक्टोबरला पारितोषिक वितरण समारंभ

या स्पर्धेतील विजेत्या मंडळांचा आणि ‘वेलिंग-खातू गणेशमूर्तीकार’ पुरस्काराचे मानकरी राजन पाटकर यांचा पारितोषिक वितरण समारंभ शुक्रवार, १६ ऑक्टोबर २०२६ रोजी दुपारी ३ वाजता प्रभादेवी येथील रवींद्र नाट्यमंदिर येथे आयोजित करण्यात आला आहे. या समारंभात सांस्कृतिक कार्यमंत्री ॲड. आशिष शेलार यांच्या हस्ते विजेत्यांना पारितोषिके आणि सन्मानचिन्हे प्रदान करून गौरविण्यात येणार आहे.

या स्पर्धेत सहभागी झालेल्या सर्व मंडळांचे तसेच विजेत्यांचे सांस्कृतिक कार्यमंत्री ॲड. आशिष शेलार यांनी अभिनंदन केले आहे.