वीज पडून जनावरे दगावलेल्या शेतकऱ्यांना आर्थिक मदत; दक्षिण सोलापूर तहसील कार्यालयातून धनादेशांचे वितरण
नेताजी खंडागळे यांच्या प्रयत्नांना यश; संकटात सापडलेल्या शेतकऱ्यांना दिलासा
दक्षिण सोलापूर (कटूसत्य वृत्त) : दक्षिण सोलापूर तालुक्यात तीन महिन्यांपूर्वी झालेल्या मुसळधार पावसादरम्यान वीज पडून जनावरे दगावल्याने आर्थिक संकटात सापडलेल्या शेतकऱ्यांना अखेर शासनाकडून आर्थिक मदत मिळाली आहे. कासेगाव, धोत्रे, बक्षीहिप्परगा आणि कुंभारी येथील बाधित शेतकऱ्यांना एकूण २ लाख १९ हजार ५०० रुपयांची मदत मंजूर करून त्यांचे धनादेश दक्षिण सोलापूर तहसील कार्यालयात वितरित करण्यात आले.
नैसर्गिक आपत्तीमुळे शेतकऱ्यांचे पशुधन दगावल्याने त्यांच्यावर मोठे आर्थिक संकट ओढवले होते. शेतीला पूरक व्यवसाय म्हणून पशुपालन करणाऱ्या शेतकऱ्यांसाठी जनावरांचा मृत्यू म्हणजे मोठे आर्थिक नुकसान असते. अशा परिस्थितीत प्रशासनाकडून मिळालेल्या आर्थिक मदतीमुळे संबंधित शेतकऱ्यांना काहीसा दिलासा मिळाला आहे.
या मदतीनुसार, कासेगाव येथील प्रमोद पाटील यांना गायीसाठी ३७ हजार ५०० रुपये, धोत्रे येथील ब्रह्मानंद हिप्परगे यांना गायीसाठी ३७ हजार ५०० रुपये, बक्षीहिप्परगा येथील शिवाजी निकम यांना बैलासाठी ३२ हजार रुपये, तर कुंभारी येथील अप्पाशा इमडे यांच्या सहा म्हशींपैकी तीन म्हशींच्या नुकसानीपोटी १ लाख १२ हजार ५०० रुपये आर्थिक मदत देण्यात आली.
दक्षिण सोलापूर तहसील कार्यालयात संबंधित शेतकऱ्यांना मदतीचे धनादेश वितरित करण्यात आले. नैसर्गिक आपत्तीमुळे नुकसान झाल्यानंतर प्रशासनाने मदतीसाठी पुढाकार घेतल्याने शेतकऱ्यांनी समाधान व्यक्त केले.
या मदतीसाठी दक्षिण सोलापूरचे तहसीलदार किरण जमदाडे यांनी विशेष प्रयत्न केले. त्यांच्या प्रयत्नांमुळे बाधित शेतकऱ्यांना आर्थिक मदत मिळण्याचा मार्ग मोकळा झाला. संकटाच्या काळात प्रशासनाने शेतकऱ्यांच्या पाठीशी उभे राहून त्यांना आधार दिल्याबद्दल संबंधित शेतकऱ्यांनी आभार व्यक्त केले.
‘शेतकऱ्यांच्या अडचणीच्या काळात त्यांच्या पाठीशी उभे राहणे, हाच खरा जनसेवेचा धर्म आहे,’ अशी भावना जिल्हा परिषद सदस्य नेताजी खंडागळे यांनी व्यक्त केली. नैसर्गिक आपत्तीमुळे नुकसान झालेल्या शेतकऱ्यांना वेळेत मदत मिळणे आवश्यक असून, अशा मदतीमुळे संकटग्रस्त शेतकऱ्यांना पुन्हा उभे राहण्यासाठी बळ मिळते, असेही त्यांनी सांगितले.
.jpg)
.jpeg)
No comments:
Post a Comment