डॉ. मामासाहेब जगदाळे कृषी महाविद्यालयात राहुरी कृषी विद्यापीठाच्या वरिष्ठ शास्त्रज्ञांची सदिच्छा भेट

 डॉ. मामासाहेब जगदाळे कृषी महाविद्यालयात राहुरी कृषी विद्यापीठाच्या वरिष्ठ शास्त्रज्ञांची सदिच्छा भेट

बार्शी (कटूसत्य वृत्त):- कर्मवीर डॉ. मामासाहेब जगदाळे कृषी महाविद्यालय, बार्शी येथे महात्मा फुले कृषी विद्यापीठ, राहुरी येथील नामवंत शास्त्रज्ञ व प्राध्यापकांनी सदिच्छा भेट दिली. यावेळी विद्यार्थ्यांसाठी कृषी क्षेत्रातील आधुनिक तंत्रज्ञान, संशोधन, रोजगार व करिअरच्या संधी याविषयी विशेष मार्गदर्शन सत्र आयोजित करण्यात आले.

या कार्यक्रमास कृषीविद्या विभागाचे प्राध्यापक व सेंद्रिय शेती संशोधन व प्रशिक्षण केंद्राचे नोडल ऑफिसर डॉ. यू. एस. सुर्वे, कनिष्ठ मृद शास्त्रज्ञ डॉ. इक्बाल बागवान व कृषी अर्थशास्त्र विभागाचे प्राध्यापक डॉ. एस. एस. कावरे यांची प्रमुख उपस्थिती होती.

मार्गदर्शन करताना डॉ. सुर्वे यांनी अचूक शेती, ड्रोन तंत्रज्ञान, सेंद्रिय व नैसर्गिक शेती, मूल्यवर्धन तसेच MPSC, ICAR व IBPS-AFO यांसारख्या स्पर्धा परीक्षांमधील संधींबाबत विद्यार्थ्यांना मार्गदर्शन केले.

यानंतर मान्यवरांनी महाविद्यालयाच्या शैक्षणिक प्रक्षेत्रास भेट देऊन विविध पिकांची प्रात्यक्षिके, आधुनिक जलव्यवस्थापन व फळबागेची पाहणी केली. महाविद्यालयातील शैक्षणिक व प्रक्षेत्रावरील उपक्रमांचे त्यांनी कौतुक केले.

यावेळी महाविद्यालयाचे प्राचार्य डॉ. जे. डी. जाधव, सर्व विभागांचे प्राध्यापक, प्राध्यापकेतर कर्मचारी व विद्यार्थी मोठ्या संख्येने उपस्थित होते.