बामसेफ व बुद्धिस्ट इंटरनॅशनल नेटवर्कच्या माढा तालुका कार्यकारिणीची घोषणा
प्रा. अभिमान आहोळ व सुनील भोसले यांच्याकडे नेतृत्वाची धुरा; कार्यकर्त्यांमध्ये उत्साहाचे वातावरण
टेंभुर्णी (कटूसत्य वृत्त):- बहुजन समाजाच्या प्रबोधन, संघटन व परिवर्तनाच्या चळवळीला अधिक बळ देण्यासाठी ‘बामसेफ’ आणि ‘बुद्धिस्ट इंटरनॅशनल नेटवर्क (BIN)’ यांच्या माढा तालुका कार्यकारिणीची अधिकृत घोषणा करण्यात आली आहे. या निवडीमध्ये प्रा. अभिमान आहोळ यांच्याकडे महत्त्वाची जबाबदारी सोपविण्यात आली असून आयु. सुनील उद्धव भोसले यांचीही नेतृत्वपदी निवड करण्यात आल्याने तालुक्यातील कार्यकर्त्यांमध्ये उत्साहाचे वातावरण निर्माण झाले आहे.
बहुजन समाजातील सामाजिक, शैक्षणिक व वैचारिक चळवळींना चालना देण्याच्या उद्देशाने ही कार्यकारिणी जाहीर करण्यात आली आहे. नव्या नेतृत्वामुळे संघटनात्मक कामकाज अधिक प्रभावी होण्यास मदत होईल, असा विश्वास कार्यकर्त्यांकडून व्यक्त करण्यात येत आहे.
प्रा. अभिमान आहोळ हे दीर्घकाळापासून सामाजिक क्षेत्रात सक्रिय असून विविध सामाजिक उपक्रम, जनजागृती आणि परिवर्तनवादी विचारांच्या प्रसारासाठी सातत्याने कार्यरत आहेत. छत्रपती शिवाजी महाराज, महात्मा ज्योतिराव फुले, राजर्षी शाहू महाराज आणि भारतरत्न डॉ. बाबासाहेब आंबेडकर यांच्या विचारधारेतून प्रेरित होऊन त्यांनी समाजात प्रबोधनाचे कार्य उभारले आहे. त्यांच्या निवडीमुळे संघटनेचे काम अधिक मजबूत होईल, अशी अपेक्षा व्यक्त केली जात आहे.
तसेच, बुद्धिस्ट इंटरनॅशनल नेटवर्कच्या माध्यमातून आयु. सुनील उद्धव भोसले यांच्यावरही महत्त्वाची जबाबदारी सोपविण्यात आली आहे. सामाजिक बांधिलकी, युवकांमधील संपर्क आणि संघटनात्मक कार्यातील सक्रिय सहभाग याची दखल घेत त्यांची निवड करण्यात आल्याचे सांगण्यात आले.
नव्या कार्यकारिणीच्या माध्यमातून माढा तालुक्यात बहुजन समाजातील युवकांना सामाजिक आणि वैचारिक चळवळीत सहभागी करून घेण्यावर भर दिला जाणार आहे. विविध जनजागृती मोहिमा, सामाजिक उपक्रम आणि संघटन विस्ताराच्या माध्यमातून समाजहिताचे काम अधिक वेगाने पुढे नेण्याचा निर्धार पदाधिकाऱ्यांनी व्यक्त केला.
दरम्यान, या निवडी जाहीर झाल्यानंतर तालुक्यातील विविध क्षेत्रातील मान्यवर, कार्यकर्ते व नागरिकांनी प्रा. अभिमान आहोळ आणि आयु. सुनील भोसले यांचे अभिनंदन करून पुढील वाटचालीस शुभेच्छा दिल्या आहेत.
No comments:
Post a Comment