बार्शीत दमदार पावसाने खरीप पेरणीला वेग

 बार्शीत दमदार पावसाने खरीप पेरणीला वेग

पुरेशा ओलाव्यामुळे शेतकऱ्यांमध्ये समाधानाचे वातावरण

बार्शी (कटूसत्य वृत्त) : अनेक दिवसांच्या प्रतीक्षेनंतर बार्शी तालुक्यात झालेल्या समाधानकारक पावसामुळे खरीप हंगामाला दिलासा मिळाला आहे. पावसामुळे जमिनीत पुरेसा ओलावा निर्माण झाल्याने खरीप पिकांच्या पेरणीचा मार्ग मोकळा झाला असून, शेतकऱ्यांनी मशागत आणि पेरणीच्या कामांना वेग दिला आहे.

यंदा जून महिन्याच्या बहुतांश कालावधीत अपेक्षित पाऊस न झाल्याने खरीप हंगाम धोक्यात येण्याची भीती व्यक्त केली जात होती. पावसाअभावी अनेक शेतकऱ्यांनी पेरणी लांबणीवर टाकली होती, तर काही ठिकाणी पेरलेले बियाणे उगवणीअभावी संकटात सापडले होते. मात्र, गेल्या दोन दिवसांपासून झालेल्या पावसामुळे शेतकऱ्यांना मोठा दिलासा मिळाला आहे.

तालुक्यातील अनेक भागांत शेतकरी सोयाबीन, मूग, उडीद, तूर, मका तसेच इतर खरीप पिकांच्या पेरणीत व्यस्त असल्याचे चित्र पाहायला मिळत आहे. उपलब्ध ओलाव्याचा योग्य वापर करून कृषी विभागाने शिफारस केलेल्या वाणांची पेरणी करण्याचे आवाहनही शेतकऱ्यांना केले आहे.

बार्शी हा अवर्षणप्रवण तालुका असल्याने प्रत्येक पावसाची सर शेतकऱ्यांसाठी महत्त्वाची ठरते. यंदाच्या पावसाने शेतकऱ्यांच्या आशा पुन्हा पल्लवित झाल्या असून आगामी काळातही नियमित आणि समाधानकारक पाऊस झाल्यास खरीप हंगाम चांगला होईल, अशी अपेक्षा व्यक्त केली जात आहे.

दरम्यान, पावसामुळे शहरासह ग्रामीण भागातील वातावरण आल्हाददायक झाले असून तापमानातही घट झाली आहे. पाण्याअभावी चिंतेत असलेल्या शेतकऱ्यांच्या चेहऱ्यावर समाधानाचे हास्य उमटले असून शेतीच्या कामांना नव्याने गती मिळाली आहे.