योद्धा पुन्हा रणांगणात...

 योद्धा पुन्हा रणांगणात...

सातारा दौऱ्यात शरद पवारांचे जल्लोषात स्वागत; पक्ष संघटन आणि आगामी राजकारणावर खलबते

सातारा (कटूसत्य वृत्त) :- राज्यातील बदलत्या राजकीय परिस्थितीत राष्ट्रवादी काँग्रेस पक्षाचे राष्ट्रीय अध्यक्ष खासदार शरदचंद्र पवार यांच्या सातारा दौऱ्याने पुन्हा एकदा राजकीय वातावरण तापले आहे. “योद्धा पुन्हा रणांगणात” अशा घोषणांनी सातारा दुमदुमून गेले असून कार्यकर्त्यांमध्ये नवचैतन्याचे वातावरण निर्माण झाले आहे.

सातारा दौऱ्यादरम्यान प्रदेशाध्यक्ष तथा आमदार शशिकांत शिंदे यांनी शरद पवार यांचे सहर्ष स्वागत केले. शासकीय विश्रामगृह परिसरात पक्ष पदाधिकारी, कार्यकर्ते आणि समर्थकांनी मोठी गर्दी करत पवार साहेबांचे जल्लोषात स्वागत केले. अनेक कार्यकर्त्यांनी घोषणाबाजी करत आपल्या नेतृत्वावरील निष्ठा व्यक्त केली.

यावेळी सातारा येथील शासकीय विश्रामगृहात पक्षाच्या विविध पदाधिकाऱ्यांची महत्त्वपूर्ण बैठक पार पडली. या बैठकीत पक्ष संघटन अधिक मजबूत करणे, आगामी स्थानिक स्वराज्य संस्था निवडणुका, राज्यातील सध्याची राजकीय परिस्थिती तसेच जनतेच्या प्रश्नांवर सविस्तर चर्चा करण्यात आली.

राज्यातील राजकीय समीकरणे झपाट्याने बदलत असताना शरद पवार यांच्या दौऱ्याला विशेष महत्त्व प्राप्त झाले आहे. कार्यकर्त्यांमध्ये असलेला उत्साह आणि पवार यांच्या नेतृत्वावरील दृढ विश्वास या भेटीतून स्पष्टपणे दिसून आला. “साहेब अजूनही मैदानात सक्रिय आहेत आणि पक्षाला नव्या उर्जेने पुढे नेत आहेत,” अशी भावना अनेक कार्यकर्त्यांनी व्यक्त केली.

प्रदेशाध्यक्ष शशिकांत शिंदे यांनीही कार्यकर्त्यांशी संवाद साधताना पक्ष संघटन अधिक सक्षम करण्याचे आवाहन केले. जनतेच्या प्रश्नांवर आक्रमक भूमिका घेऊन पक्षाची ताकद वाढवण्याचा निर्धार यावेळी व्यक्त करण्यात आला.

दरम्यान, शरद पवार यांच्या सातारा दौऱ्यामुळे जिल्ह्यातील राजकीय चर्चांना वेग आला असून आगामी निवडणुकांच्या पार्श्वभूमीवर हा दौरा महत्त्वाचा मानला जात आहे. साताऱ्यातील बैठकीतून पक्ष संघटन मजबूत करण्याबरोबरच कार्यकर्त्यांना नवसंजीवनी देण्याचा प्रयत्न झाल्याचे राजकीय वर्तुळात बोलले जात आहे.