सोलापूर महानगरपालिकेत 'महाराष्ट्र लोकसेवा हक्क दिन' उत्साहात साजरा

 सोलापूर महानगरपालिकेत 'महाराष्ट्र लोकसेवा हक्क दिन' उत्साहात साजरा

सोलापूर (कटूसत्य वृत्त):- महाराष्ट्र लोकसेवा हक्क दिनाचे औचित्य साधून आज सोलापूर महानगरपालिकेच्या अधिपत्याखालील सर्व विभाग आणि खात्यांमध्ये अधिकारी व कर्मचाऱ्यांचा सामूहिक शपथविधी सोहळा पार पडला. नागरिकांना पारदर्शक, गतिमान आणि विहित वेळेत सेवा मिळावी, या उद्देशाने प्रशासकीय स्तरावर हा उपक्रम राबवण्यात आला. या प्रसंगी उपायुक्त आशिष लोकरे यांनी उपस्थित अधिकारी व कर्मचाऱ्यांना मार्गदर्शन केले. ते म्हणाले की, "नागरिकांना नागरी सेवा पुरवताना त्यांच्या तक्रारींचे निवारण करण्यासाठी संविधानाच्या चौकटीत 'महाराष्ट्र लोकसेवा हक्क अधिनियम' प्रस्थापित करण्यात आला आहे. प्रत्येक कर्मचाऱ्याने आपली जबाबदारी प्रामाणिकपणे आणि निष्ठेने पार पाडली पाहिजे. प्रशासनाचे कामकाज इतके चोख असावे की, कोणत्याही नागरिकाला तक्रार करण्याची वेळ येऊ नये आणि प्रशासनाच्या प्रतिमेवर प्रश्नचिन्ह उभे राहू नये." कार्यक्रमाचा मुख्य उद्देश प्रशासकीय कामात पारदर्शकता आणणे आणि 'लोकसेवा हक्क कायद्या'ची प्रभावी अंमलबजावणी करून सर्वसामान्य नागरिकांच्या कामाचा निपटारा जलद गतीने करणे, हा या उपक्रमाचा मुख्य हेतू होता. या कार्यक्रमामुळे कर्मचाऱ्यांमध्ये आपल्या कर्तव्याप्रती नवी ऊर्जा आणि बांधिलकी निर्माण झाल्याचे दिसून आले. कार्यक्रमाच्या सुरुवातीला सर्व विभागांतील कर्मचाऱ्यांनी लोकसेवा हक्क अधिनियमाची अंमलबजावणी करण्याची शपथ घेतली. या महत्त्वपूर्ण कार्यक्रमाला सोलापूर महानगरपालिकेचे वरिष्ठ अधिकारी उपस्थित होते, ज्यात प्रामुख्याने अतिरिक्त आयुक्त संदीप कारंजे, माननीय उपायुक्त आशिष लोकरे,माननीय सहाय्यक आयुक्त.सौ. मनीषा मगर,मालमत्ता कर अधिकारी युवराज गाडेकर,कामगार कल्याण व जनसंपर्क अधिकारी अजित कुमार खानसोळे,सामान्य प्रशासन विभाग अधिकारी. पेंढारी यांसह विविध विभागांतील विभागप्रमुख, अधीक्षक आणि मोठ्या संख्येने कर्मचारी उपस्थित होते.