उपनगराध्यक्ष शिवतेजसिंह मोहिते पाटील यांनी नागरिकांच्या अडचणी जाणून घेतल्या

 उपनगराध्यक्ष शिवतेजसिंह मोहिते पाटील यांनी नागरिकांच्या अडचणी जाणून घेतल्या

अकलूज (कटूसत्य वृत्त):- अकलूज नगरपरिषदेचे गटनेते तथा उपनगराध्यक्ष शिवतेजसिंह मोहिते पाटील यांनी शहरातील प्रभाग क्रमांक 2, 4 आणि 5 मधील विविध विकासकामांचा आढावा घेत नागरिकांशी प्रत्यक्ष संवाद साधला. यावेळी नगरसेवक सयाजीराजे मोहिते पाटील, मोहसीन शेख, सचिन देशमुख, सौ. प्रियांका गायकवाड तसेच लालसाहेब अडगळे, संजय पाडोळे आणि स्थानिक नागरिक उपस्थित होते.

या दौऱ्यात त्यांनी शनि मंदिरासमोरील बागबगीच्याच्या सुशोभीकरणाच्या कामाची पाहणी केली. यावेळी नागरिकांच्या सूचना जाणून घेत, काम उच्च दर्जाचे व्हावे यासाठी संबंधित ठेकेदारांना स्पष्ट सूचना दिल्या.

तसेच अकलाई मंदिर ते शिवसृष्टी किल्ला पुलापर्यंत सुरू असलेल्या कामाची पाहणी करून आवश्यक त्या सुधारणा करण्याच्या सूचना त्यांनी दिल्या. याशिवाय अकलाई घाट येथे सुरू असलेल्या दशक्रिया विधी स्थळाच्या कामाचाही त्यांनी आढावा घेतला व संबंधित अधिकारी व ठेकेदारांना योग्य त्या सूचना केल्या.

दौऱ्यादरम्यान शिवतेजसिंह मोहिते पाटील यांनी नागरिकांशी थेट संवाद साधत त्यांच्या अडचणी, अपेक्षा आणि सूचना जाणून घेतल्या. अकलूज शहर अधिक सुंदर, सुव्यवस्थित आणि नागरिकाभिमुख करण्यासाठी सातत्याने प्रयत्न सुरू असल्याचे त्यांनी यावेळी सांगितले.

एकहाती सत्तेनंतर प्रशासनाला गती :

अकलूज नगरपरिषदेवर एकहाती सत्ता मिळवल्यानंतर शिवतेजसिंह मोहिते पाटील यांच्या नेतृत्वाखाली नगरसेवक आता ‘ऍक्शन मोड’मध्ये आल्याचे स्पष्टपणे दिसत आहे. शहरातील सुरू असलेल्या विकासकामांना गती देताना, नागरिकांच्या अडचणी प्रत्यक्ष जाणून घेऊन त्यावर तात्काळ उपाययोजना करण्यासाठी त्यांनी नगरपरिषदेचे अधिकारी व कर्मचाऱ्यांना ठोस आणि स्पष्ट सूचना दिल्या.