JNU मधून ABVPचा सफाया; विद्यार्थ्यांचा जल्लोष, नृत्यातून व्यक्त आनंद

 JNU मधून ABVPचा सफाया; विद्यार्थ्यांचा जल्लोष, नृत्यातून व्यक्त आनंद

नवी दिल्ली  (कटूसत्य वृत):- जवाहरलाल नेहरू विद्यापीठाच्या (JNU) विद्यार्थी निवडणुकीत अखिल भारतीय विद्यार्थी परिषद (ABVP)चा संपूर्ण सफाया झाल्यानंतर विद्यार्थी वर्गात प्रचंड उत्साहाचे वातावरण निर्माण झाले आहे. डाव्या आघाडीच्या उमेदवारांनी बहुमताने विजय मिळवला असून, निवडणुकीचे निकाल जाहीर होताच कॅम्पस परिसरात विद्यार्थ्यांनी नृत्य आणि घोषणांच्या माध्यमातून जल्लोष साजरा केला.

शुक्रवारी रात्री उशिरा निकाल स्पष्ट झाल्यानंतर ‘ABVP हारा, JNU जिंकलं’ अशा घोषणा कॅम्पसमध्ये घुमू लागल्या. विद्यार्थी संघटनांच्या तंबूंमधून डफली, ढोल आणि बॅनरांसह विद्यार्थ्यांनी आनंदोत्सव साजरा केला. काही ठिकाणी पारंपरिक नृत्य आणि ढोलकीच्या तालावर विद्यार्थ्यांनी विजय मिरवणुकीचे आयोजन केले.

या निवडणुकीत डाव्या पक्षांच्या आघाडीने सर्व महत्त्वाची पदं जिंकली. विशेष म्हणजे गेल्या काही वर्षांपासून ABVPने JNUमध्ये मजबूत पकड निर्माण केली होती. मात्र, या वर्षी विद्यार्थ्यांमधील असंतोष, शिक्षण शुल्कवाढ, स्वायत्ततेचे प्रश्न आणि प्रशासनाच्या धोरणांविरोधातील नाराजी यामुळे मतदानाचा कल पूर्णतः डाव्या संघटनांकडे वळला.

“ही केवळ एका संघटनेचा पराभव नाही, तर JNUच्या विचारस्वातंत्र्याचा विजय आहे,” असं म्हणत अनेक विद्यार्थ्यांनी ABVPविरोधी घोषणाबाजी केली. सोशल मीडियावरसुद्धा #JNURejectsABVP हा हॅशटॅग ट्रेंड होत असून हजारो विद्यार्थ्यांनी या विजयाचा आनंद व्यक्त केला.