कोंडी जिल्हा परिषद गटातून मराठा आंदोलक व संभाजी ब्रिगेड विचाराचा कार्यकर्ता निवडणुकीच्या रणांगणात उतरला
कोंडी (कटूसत्य वृत्त):- मराठा समाजाच्या हक्कांसाठी आणि संभाजी ब्रिगेडच्या प्रखर विचारसरणीसाठी काम करणारे कार्यकर्ता शिवश्री सोमनाथ राऊत यांनी आता थेट जिल्हा परिषदेच्या रणांगणात उतरायचा निर्णय घेतला आहे. “मी घराणेशाहीला सुरंग लावण्यासाठी येतोय, फक्त तुमचा आशीर्वाद हवा”, असे सांगत त्यांनी जनतेपुढे आपले स्पष्ट व लोकाभिमुख ध्येय जाहीर केले आहे.
सोमनाथ राऊत हे गेल्या अनेक वर्षांपासून मराठा आंदोलन, शिक्षण, आरक्षण व सामाजिक न्यायासाठीच्या चळवळींमध्ये सक्रियपणे कार्यरत आहेत. समाजातील वंचित घटकांचा आवाज शासनापर्यंत पोहोचवण्यासाठी त्यांनी सातत्याने लढा दिला आहे. तसेच संभाजी ब्रिगेडच्या तत्त्वज्ञानावर आधारित सामाजिक परिवर्तनाचा विचार जनतेपर्यंत पोहोचवण्यात त्यांनी पुढाकार घेतला आहे.
आता जिल्हा परिषदेच्या निवडणुकीत उतरून ग्रामविकास, पारदर्शक कारभार आणि सर्वसामान्य जनतेचा सहभाग असलेले लोकशाही प्रशासन उभे करणे हे त्यांचे मुख्य ध्येय असल्याचे त्यांनी सांगितले.
राऊत यांनी पुढे म्हटले की, “आज राजकारण काही मोजक्या घराण्यांच्या ताब्यात गेले आहे. कार्यकर्त्यांच्या कष्टांवर घराणेशाही फोफावत आहे. आता या व्यवस्थेला खऱ्या अर्थाने पर्याय उभा करण्याची वेळ आली आहे. मी कोंडी गटातून उमेदवारी जाहीर करीत असून, मला फक्त जनतेचा आशीर्वाद हवा आहे. बाकी सगळं मी जनतेच्या विश्वासाने लढणार आहे.”
स्थानिक स्तरावर तरुणांमध्ये व सामाजिक कार्यकर्त्यांमध्ये राऊत यांच्या उमेदवारीबाबत चांगली चर्चा रंगू लागली आहे. मराठा आंदोलनातील त्यांचे योगदान आणि संभाजी ब्रिगेडच्या विचाराशी असलेली बांधिलकी यामुळे “सामाजिक न्याय आणि परिवर्तनाच्या राजकारणाला नवी दिशा मिळू शकते” असा विश्वास कार्यकर्त्यांमध्ये व्यक्त होत आहे.
आगामी काही दिवसांत राऊत जनतेशी संवाद साधण्यासाठी “घराणेशाहीला सुरंग लावा – जनतेचा आवाज बना” या अभियानांतर्गत दौरा सुरू करणार आहेत.
ठळक मुद्दे :
शिवश्री सोमनाथ राऊत – मराठा आंदोलक व संभाजी ब्रिगेड विचाराचा कार्यकर्ता
“घराणेशाहीला सुरंग लावण्यासाठी येतोय” असा निर्धार
कोंडी जिल्हा परिषद गटातून उमेदवारीची घोषणा पारदर्शक व जनतेच्या सहभागावर आधारित कारभाराचे ध्येय.
.jpg)
.jpg)
No comments:
Post a Comment