छत्रपती शिवरायांबाबत वादग्रस्त वक्तव्य करणाऱ्या प्रशांत कोरटकरला कोणत्याही क्षणी अटक होणार? नागपुरात घडामोडींना वेग

 छत्रपती शिवरायांबाबत वादग्रस्त वक्तव्य करणाऱ्या प्रशांत कोरटकरला

 कोणत्याही क्षणी अटक होणार? नागपुरात घडामोडींना वेग

कोल्हापूर (कटूसत्य वृत्त):- कोल्हापूर पोलिसांनी त्यांच्या विरोधात गुन्हा दाखल केला आहे. तर, नागपूरमध्येही घडामोडींना वेग आला आहे. प्रशांत कोरटकरला आता कोणत्याही क्षणी अटक होण्याची शक्यता आहे.

इतिहास संशोधक इंद्रजित सावंत यांना ब्राह्मण समाजाला का लक्ष्य करत आहे असा जाब विचारणारा फोन कोरटकर यांनी केला होता. त्या दरम्यान कोरटकराने छत्रपती शिवाजी महाराजांबाबत काही आक्षेपार्ह वक्तव्ये केली. त्याचे पडसाद आता उमटण्यास सुरुवात झाली आहे. मंगळवारी इंद्रजित सावंत यांनी कोल्हापूरमध्ये पोलीस तक्रार करत ऑडिओ क्लिप आणि फोन आल्याचे पुरावे सादर केले. कोल्हापूर पोलिसांनी कोरटकराविरोधात अजामीनपात्र कलमातंर्गत गुन्हे दाखल केले आहेत.

कोल्हापूर पोलीस नागपुरात दाखल...

कोरटकराविरोधात कोल्हापूर पोलिसांचे पथक नागपूरकडे रात्रीच रवाना झाल्याची माहिती समोर आली आहे. प्रशांत कोरटकरला ताब्यात घेण्याची शक्यता आहे. कोल्हापूर पोलिसांच्या पथकात उपनिरीक्षक दर्जाचे अधिकारी आणि पोलीस कर्मचारी आहेत. कोरटकर यांच्या निवासस्थानी जाऊन कोल्हापूर पोलीस त्याला ताब्यात घेण्याची शक्यता आहे. चौकशीसाठी कोल्हापुरात त्याला आणले जाणार असून तिथे त्याच्यावर अटकेची कारवाई होऊ शकते.

प्रशांत कोरटकरच्या घराबाहेर बहुजन समाजाचे कार्यकर्ते आज सकाळी एकत्र झाले. हातात काळे झेंडे घेऊन कोरटकर विरोधात घोषणाबाजी करण्यात आली. मंगळवारी सकाळी ऑडिओ क्लिप व्हायरल झाल्यानंतर कोरटकरच्या घराबाहेर पोलिसांचा बंदोबस्त आहे. कोरटकरांना पोलीस बंदोबस्तही पुरवण्यात आला आहे.

नेमकं प्रकरण काय आहे?

इतिहास संशोधक इंद्रजित सावंत यांना धमकी दिल्याची ऑडिओ क्लिप व्हायरल झाली आहे. या प्रकरणी प्रशांत कोरटकर व्यक्तीवर गुन्हा दाखल झाला आहे. जुना राजवाडा पोलीस ठाण्यात प्रशांत कोरटकरवर गुन्हा दाखल झाला आहे. कोरटकर याने छत्रपती शिवाजी महाराज आणि छत्रपती संभाजीराजे यांच्याबाबत आक्षेपार्ह वक्तव्य करत सावंत यांना शिवीगाळ केली होती. 'तुला घरात येऊन मारेल, हा फायनल कॉल आहे' असं म्हणत सावंत यांना धमकी दिली होती. एवढंच नाहीतर छत्रपती शिवाजी महाराज आणि छत्रपती संभाजीराजे यांच्याबद्दल कोरटकर याने अत्यंत खालच्या शब्दांत भाष्य केलं होतं. या प्रकरणी पोलीस स्टेशनमध्ये गुन्हा दाखल झाला आहे.

दरम्यान, ही ऑडिओ क्लिप व्हायरल झाल्यानंतर हाच प्रशांत कोरटकर माध्यमांसमोर येऊन म्हणतो  AI च्या मदतीने आपल्या आवाजाचा वापर करण्यात आला आहे. मात्र याबाबतचे सर्व पुरावे पोलीसांच्या हाती लागले असून प्रशांत कोरटकरला कोणत्याही क्षणी अटक करून अशा बदमाशांचा माज जिरवतील असे सुत्रांनी सांगितले.