धुळ्यानंतर सोलापुरात एसटी बसवर दगडफेक; प्रवाशांमध्ये पसरली भीती

 धुळ्यानंतर सोलापुरात एसटी बसवर दगडफेक; प्रवाशांमध्ये पसरली भीती

सोलापूर (कटूसत्य वृत्त):- परभणीतील आंदोलक सोमनाथ सूर्यवंशी यांचा न्यायालयीन कोठडीत मृत्यू झाल्याच्या घटनेचे सर्वत्र पडसाद उमटले. सोमनाथ सूर्यवंशी प्रकरणाच्या विरोधात आज आंबेडकरी अनुयायांनी महाराष्ट्र बंदची हाक दिली होती.

या बंददरम्यान आंदोलकांनी रस्त्यावर उतरून निदर्शने केली. यावेळी आंदोलकांनी दुकाने देखील बंद केली. तसेच आज धुळ्यात १० ते १२ जणांनी एसटी बसवरही दगडफेक केली. त्यानंतर आता सोलापुरात एसटी बसवर दगडफेक झाल्याची घटना घडली आहे. 

धुळ्यात दसरा मैदान स्टॉपजवळ नाशिकहून शहाद्याकडे जाणाऱ्या बसवर अज्ञात व्यक्तींनी दगडफेक केल्याची घटना आज सोमवारी दुपारी घडली. या दगडफेकीनंतर प्रवाशांमध्ये एकच भीती पसरली होती. तर काही प्रवासी किरकोळ जखमी झाले होते. धुळ्यानंतर सोलापुरात एसटी बसवर दगडफेकीची घटना घडली. सोलापुरातही अज्ञात व्यतींनी ३ एसटी बसवर दगडफेक केली. 

सोलापुरातील डी मार्ट आणि सम्राट चौक परिसरात एसटी बसवर दगडफेक करण्यात आली. सोलापूरहून तुळापूरला जाणाऱ्या दोन गाड्या आणि सोलापूरहून साताऱ्याला जाणाऱ्या एक गाडीवर दगडफेक झाली. दगडफेकीनंतर पोलीस तात्काळ घटनास्थळी पोहोचले. ही दगडफेक नेमकी कुणी केली, याचा तपास पोलीस करत आहेत. या प्रकरणी अज्ञातावर गुन्हा दाखल करण्याची प्रक्रिया सुरु आहेत. यामध्ये कोणत्याही प्रवाशाला त्रास झालेला नाही. सर्व परिस्थिती पूर्ववत झाली असून वाहतूक सुरळीत सुरु झाली आहे. 

दरम्यान, धुळ्यातील दसरा मैदान स्टॉपजवळ एका एसटी बसवर अज्ञात व्यक्तींवर दगडफेक केली. या दगडफेकीनंतर बस चालकाने बस तत्काळ थांबवून परिस्थिती नियंत्रणात आणली. धुळ्यातील एसटी बसवरील दगडफेक ही परभणी प्रकरणाचे पडसाद असल्याचा अंदाज व्यक्त करण्यात येत आहे. या प्रकरणाची माहिती मिळताच एसटी बसजवळ धाव घेतली. या दगडफेकीनंतर पोलिसांनी त्याचा तपास सुरु केल्याची माहिती हाती आली आहे.