आम शहाजी बापू पाटील यांच्या आमदार फंडातून 40 हायमास्ट दिवे बसविण्यास मंजुरी

सांगोला (कटूसत्य वृत्त):- आ. शहाजीबापू पाटील यांच्या फंडातून सुमारे 70 लाख 58 हजार रुपये खर्चून सांगोला शहरातील विविध 12 ठिकाणी व तालुक्यातील 28 गावे वाड्या वस्त्यांसह ,धार्मिकस्थळे आदि परिसरात सुमारे 40 हायमास्ट दिवे बसविण्यास मंजुरी मिळाली असून परिसर प्रकाशमय केला जाणार आहे दरम्यान श्री दत्त जयंतीच्या शुभ मुहूर्तावर वझरे गावात हाय मास्ट दिवा बसून परिसर प्रकाशमय केल्याने ग्रामस्थांतून आनंद व्यक्त होत आहे.

सांगोला विधानसभा मतदार संघाचे विधानसभा सदस्य आ. शहाजीबापू पाटील यांच्या सन 2020-21 या आर्थिक वर्षातील फंडातून यापूर्वीच सुमारे 50 लाख रुपये निधीतून तालुक्यातील व पंढरपूर तालुक्यातील भाळवणी गटातील प्रा. आरोग्य केंद्र व उपकेंद्रांना पीपीई कीट मास्क, सॅनिटायझर आदि साहित्याचे वाटप केले असून अनेक रस्त्याच्या कामांसाठी निधी खर्च केला आहे आता त्यांच्या फंडातून व जिल्हा नियोजन अधिकारी कार्यालय सोलापूर यांच्या नियोजनातून सांगोला तालुक्यातील 28 गावे , वाड्या-वस्त्यांसह धार्मिक स्थळे, चौक आदी ठिकाणी तसेच सांगोला शहरातील 12 विविध ठिकाणी हायमास्ट दिवे बसविण्यास मंजुरी मिळाली आहे. ठेकेदाराकडून सदर ठिकाणी हायमास्ट दिवे बसविण्याचे काम सुरू झाले असून वझरे गावात हायमास्ट दिवा बसवून कार्यान्वित केला आहे. लवकरच उर्वरित मंजुरीच्या ठिकाणी हायमास्ट दिवे बसवून रात्रीचा अंधार दूर केला जाणार असल्याचे आ. शहाजीबापू पाटील यांनी सांगितले.

आ.शहाजीबापू पाटील यांच्या (2020-21) फंडातून सांगोला तालुक्यातील कडलास- जुने ग्रामपंचायत कार्यालय समोर अकोला- सिद्धनाथ मंदिर परिसर, वासुद हनुमान मंदिर, वाटंबरे -माळवाडी -चिणके रोड, आजनाळे -दिवाणमळा , लिगाडेवाडी- मारुती मंदिरासमोर ,यलमार मंगेवाडी- खंडोबा मंदिरासमोर ,चिणके -डाॅ. बाबासाहेब आंबेडकर शॉपिंग सेंटर समोर, वझरे- दत्त मंदिर समोर ,चिकमहूद -रवी जाधव किराणा स्टोअर्स जवळ, पाचेगाव खुर्द -मिसाळवाडी ,वाढेगाव -शिवाजी चौक, आलेगाव -हनुमान मंदिरासमोर बाबरवाडी, मेडशिंगी -लेंडवे पाटील वस्ती , घेरडी- साताप्पा देवस्थान, सोनंद- काशीद वाडी- भोसले वस्ती व मुस्लिम गल्ली संतोष साळुंखे घराजवळ, कोळा सिद्धनाथ नगर तुकाराम नगर रोड व खंडागळे वस्ती , हातीद ग्रामपंचायत कार्यालयासमोर, तिप्पेहळी- एकनाथ नरळे वस्ती कोळे रोड, एखतपुर- जिव्हाळा नगर, जवळा -नारायण देव मंदिर परिसर व गावातील बाजार पटांगण, मांजरी- जुनी चावडी कट्ट्याजवळ, शिवणे- मारुती मंदिर चौक, वाकी घेरडी -झेडपी शाळेजवळ शिंदे वस्ती, मेथवडे -एसटी स्टँड समोर मेथवडे फाटा, सांगोला- टेलिफोन ऑफिस जवळ, आरक्षण क्रं. 47 चिंचोली रोड बगीच्या, कुंभार गल्ली, मुंगी पीर दर्गा ,कचेरी रोड गणेश लाॅजसमोर, अंबिका मंदिर, नेहरू चौक, मुस्लिम स्मशानभूमी वाढेगाव रोड, पाटील वस्ती, परीट गल्ली ,सटवाई मंदिर, कोष्टी गल्ली असे एकूण 40 हायमास्ट दिवे बसविण्यात येणार आहेत.