सेवा संकल्प अभियानांतर्गत भांडारकवठे येथे २०२६ वृक्षांची लागवड

 सेवा संकल्प अभियानांतर्गत भांडारकवठे येथे २०२६ वृक्षांची लागवड

 सोलापूर (कटूसत्य वृत्त):-  (जिमाका) सेवा संकल्प अभियानांतर्गत ग्रामपंचायत भांडारकवठे, ता. दक्षिण सोलापूर येथे २०२६ वृक्षांची वृक्षलागवड करण्यात आली. जिल्हा परिषदेचे मुख्य कार्यकारी अधिकारी कुशल जैन यांच्या मार्गदर्शनाखाली दक्षिण सोलापूर पंचायत समितीचे गटविकास अधिकारी मनोज राऊत यांच्या हस्ते या वृक्षारोपण उपक्रमाचा शुभारंभ करण्यात आला.

जिल्हा परिषदेच्या वतीने सेवा संकल्प अभियानांतर्गत विविध लोकाभिमुख उपक्रम राबविण्यात येत आहेत. त्याच पार्श्वभूमीवर दक्षिण सोलापूर पंचायत समितीच्या वतीने पर्यावरण संवर्धन, वृक्षलागवड आणि वृक्ष संगोपनाबाबत शालेय विद्यार्थी तसेच महिलांमध्ये जागृती निर्माण करण्यासाठी हा उपक्रम राबविण्यात आला.

गावातील प्रत्येक मुलाला आणि महिलेला वृक्ष संगोपनाची जबाबदारी देत एक झाड दत्तक देण्यात आले. दत्तक घेतलेल्या झाडाची नियमित देखभाल, पाणी देणे आणि त्याचे संरक्षण करण्याचे आवाहन यावेळी करण्यात आले. वृक्षलागवडीसोबतच वृक्षांचे संगोपन आणि संवर्धन करणे ही प्रत्येकाची सामूहिक जबाबदारी असल्याचे मान्यवरांनी सांगितले.

या उपक्रमामुळे गावातील नागरिक, विद्यार्थी आणि महिलांमध्ये पर्यावरण संवर्धनाची भावना दृढ होण्यास मदत होणार असून, भविष्यात गावाचा हरित विकास साधण्यास हातभार लागणार आहे. सेवा संकल्प अभियानांतर्गत राबविण्यात आलेल्या या उपक्रमाचे ग्रामस्थांनी स्वागत केले.