नियमित योगामुळे निरोगी, सुदृढ व तणावमुक्त जीवन शक्य – किसन जाधव
.png)
सोलापूर (कटूसत्य वृत्त):- २१ जून जागतिक योग दिनानिमित्त श्री सिद्धेश्वर वनविहार येथे योगशिक्षक चंद्रकांत (ब्रदर) जाधव व सुहास जाधव यांच्या मार्गदर्शनाखाली योग दिन उत्साहपूर्ण वातावरणात संपन्न झाला. पहाटेच्या प्रसन्न वातावरणात उपस्थितांनी विविध योगासने, प्राणायाम व ध्यानसाधना करून योगाचे महत्त्व प्रत्यक्ष अनुभवले. यावेळी सोलापूर महानगरपालिका प्रभाग क्रमांक २२ चे भाजपा नगरसेवक किसन जाधव, एमआयडीसी पोलीसचे पोलीस निरीक्षक विजयकुमार खोमणे, पोलीस निरीक्षक दत्ता जाधव, पोलीस हवालदार दत्ता उर्फ अक्षय जाधव, वरिष्ठ सांख्यिक अधिकारी अशोक कुमार, दिलीप कुमार, विविध विभागांचे कर्मचारी तसेच शिक्षक सुहास सर यांच्यासह अनेक नागरिक मोठ्या संख्येने उपस्थित होते. याप्रसंगी नगरसेवक किसन जाधव यांनी मनोगत व्यक्त करताना सांगितले की, योग ही केवळ व्यायाम पद्धती नसून भारतीय संस्कृतीची अमूल्य देणगी आहे. आजच्या धकाधकीच्या जीवनात शारीरिक स्वास्थ्याबरोबरच मानसिक शांतता आणि सकारात्मक विचारांसाठी योग अत्यंत आवश्यक आहे. नियमित योगाभ्यासामुळे अनेक आजारांपासून संरक्षण मिळते तसेच व्यक्तिमत्त्व विकासालाही चालना मिळते. प्रत्येक नागरिकाने दररोज काही वेळ योगासाठी देऊन निरोगी जीवनशैली अंगीकारावी जागतिक स्तरावर योगाचा प्रसार व्हावा यासाठी भारताने महत्त्वपूर्ण भूमिका बजावली असून देशाचे पंतप्रधान नरेंद्रजी मोदी यांनीही योग दिनानिमित्त आयोजित कार्यक्रमात सहभाग नोंदवला. त्यांच्या आवाहनानुसार देशभरात विविध ठिकाणी भल्या पहाटे योग दिन उत्साहात साजरा करण्यात आला. कार्यक्रमाच्या शेवटी उपस्थितांनी नियमित योग करण्याचा संकल्प केला. योगाच्या माध्यमातून निरोगी भारत व सशक्त समाज निर्माण करण्याचा संदेश यावेळी देण्यात आला.
.jpg)
No comments:
Post a Comment