अमेरिकेतील रासायनिक अभियंता धीरजचा सोलापुरात गौरव

 अमेरिकेतील रासायनिक अभियंता धीरजचा सोलापुरात गौरव

सोलापूर (कटूसत्य वृत्त):- घरची परिस्थिती साधी… परदेशी शिक्षणाचे मोठे स्वप्न… ना शासकीय मदत, ना शिष्यवृत्ती… तरीही जिद्द, चिकाटी आणि अथक परिश्रमाच्या जोरावर सोलापूरच्या धीरज राज सुरते यांनी अमेरिकेत केमिकल इंजिनिअर म्हणून स्वतःची ओळख निर्माण करत कुटुंबासह शहराचे नाव उज्ज्वल केले आहे. सोलापूरच्या सुपुत्राने वडिलांच्या कर्जाची, संघर्षाची यशातून परतफेड केली. त्यांच्या या उल्लेखनीय यशाबद्दल सुरते–स्वामी परिवाराच्या वतीने आयएमए हॉल येथे भावनिक आणि उत्साहपूर्ण वातावरणात गौरव समारंभ पार पडला.

        यावेळी एआय इंजिनिअर म्हणून यश मिळविल्याबद्दल तन्मय राज सुरते याचाही सन्मान करण्यात आला. कार्यक्रमास जाईबाई सुरते, राज सुरते, योगिता सुरते, ॲड. नितीन स्वामी, ॲड. कालिंदी सुरते–स्वामी, उमेश सुरते, वर्षा सुरते, डॉ. शैलेश सुरते, अनुराधा सुरते, सामाजिक कार्यकर्ते देवा उघडे यांच्यासह मान्यवर उपस्थित होते.

           अमेरिकेतील मिशिगन विद्यापीठातून धीरज सुरते यांनी मास्टर ऑफ सायन्स इन केमिकल इंजिनिअरिंग ही पदव्युत्तर पदवी संपादन केली. विशेष म्हणजे या संपूर्ण शैक्षणिक प्रवासात त्यांना कोणतीही शिष्यवृत्ती किंवा शासकीय आर्थिक मदत मिळाली नाही. तरीही मुलाचे स्वप्न पूर्ण करण्यासाठी वडील राज सुरते यांनी स्वतःचा ट्रॅव्हल व्यवसाय, बँकेचे कर्ज आणि मित्रांच्या सहकार्याच्या जोरावर आर्थिक जबाबदारी पेलली.अडचणी, आर्थिक संकटे आणि अनिश्चिततेच्या सावटातही धीरज यांनी हार मानली नाही. दिवस-रात्र अभ्यास, अपार मेहनत आणि आत्मविश्वासाच्या बळावर त्यांनी अमेरिकेतील नामांकित मिशिगन विद्यापीठात शिक्षण पूर्ण केले आणि त्याच देशात प्रतिष्ठेची नोकरी मिळवत यशाचे शिखर गाठले, असे गौरवोद्गार उपस्थित मान्यवरांनी काढले.

      संघर्षावर मात करून स्वप्न पूर्ण करणारा हा युवक आज अनेक तरुणांसाठी प्रेरणास्थान ठरला आहे. धीरजने केवळ आपल्या कुटुंबाचे नव्हे तर सोलापूरचेही नाव जागतिक स्तरावर पोहोचवले आहे, अशा भावना मान्यवरांनी आपल्या भाषणातून व्यक्त करत त्याला पुढील वाटचालीस शुभेच्छा दिल्या. यावेळी कृषी उत्पन्न बाजार समितीचे संचालक अविनाश मार्तंडे, संजय शिंदे, प्रा. डॉ. शीला हिरेमठ, देवा उघडे, पत्रकार किरण बनसोडे आदींनी शुभेच्छापर मनोगते व्यक्त केली.

           कार्यक्रमाच्या प्रारंभी तथागत गौतम बुद्ध यांच्या मूर्तीचे तसेच भारतरत्न डॉ. बाबासाहेब आंबेडकर यांच्या प्रतिमेचे पूजन करण्यात आले. स्वागत ॲड. कालिंदी सुरते यांनी केले. प्रास्ताविक अनुराग सुतकर यांनी केले. सूत्रसंचालन राहुल बिराजदार यांनी केले तर सतीश शेंडगे यांनी आभार मानले. यावेळी शुभेच्छा देण्यासाठी सर्व नातेवाईक आणि विविध क्षेत्रातील मान्यवर मोठ्या संख्येने उपस्थित होते.

आणि वडिलांचे स्वप्न पूर्ण केले : धीरज सुरते 

वडिलांचे स्वप्न होते की मी परदेशात इंजिनिअर व्हावे. शिष्यवृत्ती मिळाली नाही तरीही न डगमगता वडिलांनी कर्ज काढून अमेरिकेत शिक्षणासाठी पाठविले. अडचणी आल्या पण खचलो नाही. अथक अभ्यास, जिद्द आणि चिकाटीच्या जोरावर अमेरिकेत इंजिनिअर होऊन वडिलांचे स्वप्न पूर्ण केले. आजीसह सर्व कुटुंबियांचे पाठबळ मिळाले. त्यांच्या संस्कारामुळेच मी आज घडलो. इथपर्यंत आलो, अशी कृतज्ञतेची भावना सत्कारमूर्ती इंजिनीयर धीरज सुरते यांनी व्यक्त केली.