विधान परिषद निवडणुकीची घोषणा; १२ मे रोजी मतदान, ९ जागांवर रंगणार लढत

 विधान परिषद निवडणुकीची घोषणा; १२ मे रोजी मतदान, ९ जागांवर रंगणार लढत

मुंबई, (कटूसत्य वृत्त):- महाराष्ट्राच्या राजकारणात अत्यंत महत्त्वाच्या मानल्या जाणाऱ्या विधान परिषद निवडणुकीचा कार्यक्रम अखेर जाहीर झाला असून राज्यातील ९ जागांसाठी १२ मे रोजी मतदान होणार आहे. भारत निवडणूक आयोगाने जाहीर केलेल्या वेळापत्रकानुसार सकाळी ९ ते दुपारी ४ या वेळेत मतदान प्रक्रिया पार पडणार आहे. विशेष म्हणजे, त्याच दिवशी मतमोजणी होऊन निकालही जाहीर केला जाणार असल्याने राजकीय घडामोडींना वेग आला आहे.

कार्यकाळ संपणाऱ्या सदस्यांची पार्श्वभूमी

विधान परिषदेतील ९ सदस्यांचा कार्यकाळ १३ मे रोजी संपुष्टात येत आहे. या सदस्यांमध्ये उद्धव ठाकरे, नीलम गोऱ्हे, श्रीकांत शिंदे, अमोल मिटकरी, शशिकांत शिंदे, गोपीचंद पडळकर, रजनीसिंह मोहिते-पाटील, राजेश राठोड, प्रविण डाके आणि रमेश कराड यांचा समावेश आहे. त्यामुळे या सर्व जागांसाठी नवीन सदस्यांची निवड होणार आहे.

जागांचे संभाव्य राजकीय समीकरण

सध्याच्या विधानसभा संख्याबळावर नजर टाकल्यास या निवडणुकीत महायुतीचे पारडे स्पष्टपणे जड असल्याचे दिसून येते. अंदाजे भाजपला ५, शिवसेना (शिंदे गट) २, राष्ट्रवादी (अजित पवार गट) १ आणि महाविकास आघाडीला १ जागा मिळण्याची शक्यता व्यक्त केली जात आहे.

मात्र राष्ट्रवादीकडे असलेल्या अतिरिक्त मतांमुळे महायुतीकडून अतिरिक्त उमेदवार दिला गेल्यास निवडणूक चुरशीची होण्याची शक्यता वर्तवली जात आहे.

‘कोटा’चे गणित निर्णायक

विधान परिषद निवडणुकीत एका उमेदवाराला विजयी होण्यासाठी २८ मतांचा कोटा आवश्यक आहे. सध्या महायुतीकडे एकूण २३४ आमदारांचे संख्याबळ असल्याने त्यांच्या ८ उमेदवारांचा विजय जवळपास निश्चित मानला जात आहे.

दुसरीकडे, महाविकास आघाडीचे संख्याबळ सुमारे ४९ असल्याने त्यांना एक जागा निश्चित मिळेल, मात्र दुसऱ्या जागेसाठी आवश्यक मतांची जुळवाजुळव करणे कठीण दिसत आहे.

विधानसभा संख्याबळाची आकडेवारी

राज्यातील सध्याचे पक्षनिहाय संख्याबळ या निवडणुकीत निर्णायक ठरणार आहे. भाजपकडे १३१, शिवसेना (शिंदे गट) ५७, राष्ट्रवादी (अजित पवार गट) ४० आमदार आहेत.

तर काँग्रेसकडे १६, राष्ट्रवादी (शरद पवार गट) १०, शिवसेना (ठाकरे गट) २० आमदार असून समाजवादी पक्षाचे २ आमदार आहेत. याशिवाय काही लहान पक्ष आणि अपक्ष आमदारांचे मतही निर्णायक ठरू शकते.

निवडणुकीत रंगत येण्याची शक्यता

महायुतीचे संख्याबळ भक्कम असले तरी अतिरिक्त उमेदवारी, नाराजी आणि संभाव्य क्रॉस-व्होटिंगमुळे निवडणुकीत अनपेक्षित वळण येण्याची शक्यता नाकारता येत नाही. विशेषतः काही नाराज आमदारांची भूमिका आणि पक्षांतर्गत रणनीती यामुळे अंतिम निकालावर परिणाम होऊ शकतो.

दरम्यान, १२ मे रोजी होणाऱ्या मतदानाकडे संपूर्ण राज्याचे लक्ष लागले असून या निवडणुकीतून आगामी राजकीय समीकरणांची दिशा स्पष्ट होणार आहे.