प्राथमिक आरोग्य केंद्राच्या जागेतच आटपाडी नगरपंचायत मुख्यालय उभे करा .

 प्राथमिक आरोग्य केंद्राच्या जागेतच आटपाडी नगरपंचायत मुख्यालय उभे करा .

आटपाडी (कटूसत्य वृत्त):-

          प्राथमिक आरोग्य केंद्राच्या जागेतच आटपाडी नगरपंचायतीच्या मुख्यालयाची इमारत उभी करा, मुळ ठिकाणीच ५० कोटीचे एकच एस . टी . स्टॅन्ड उभे करा, मुख्य पेठेचा रस्ता ५० फुटी करा, राजवाडा गावचे आकर्षण बनवा, आटपाडी शहर आणि दोन्ही ओढा पात्रातील सर्व अतिक्रमणे नेस्तनाबुत करा . अशी मागणी राष्ट्रवादी काँग्रेस पार्टी शरदचंद्र पवार पक्षाचे ओबीसी विभागाचे प्रदेशचे उपाध्यक्ष सादिक खाटीक यांनी केली आहे .

          आटपाडीचे नुतन नगराध्यक्ष, मुख्याधिकारी आणि नवनिर्वाचित १७ सदस्यांना पाठविलेल्या खास निवेदनात या मागण्यापुर्तीसाठी सादिक खाटीक यांनी आग्रह धरला आहे आटपाडी नगरपंचायतीच्या पहिल्याच मासीक सभेत या संदर्भातले ठराव संमत करून या मागण्यासाठी सर्व नगरसेवकांनी शासनाकडे पाठपुरावा करावा . अशी अपेक्षाही सादिक खाटीक यांनी व्यक्त केली आहे .

          सांगली, मिरज, कुपवाड महानगरपालीके नंतर दुसऱ्या स्थानावर आणि सांगली जिल्ह्यातील सर्व नगरपालीका, नगरपंचायतीमध्ये पहिल्या स्थानावर आटपाडी नगरपंचायतीचे सर्वात मोठे कार्यक्षेत्र  आहे. पाच दशकापुर्वीच्या मुळच्या आटपाडी ग्रामपंचायतीत समावेश असलेल्या पुजारवाडी ( सोनारसिद्धनगर ), देशमुखवाडी, यप्पावाडी, खांजोडवाडी, मासाळवाडी, मुढेवाडी, शेंडगेवाडी या ७ गावांचा आटपाडी नगरपंचायतीत पुन्हा समावेश झाल्यास मापटेमळा, भिंगेवाडी या समाविष्ट दोन गावासहच्या एकुण १० गावच्या आटपाडी नगरपंचायतीचे कार्यक्षेत्र सांगली, मिरज, कुपवाड महानगरपालीके पेक्षा आणि जिल्ह्यातील सर्व नगरपालीका नगरपंचायती पेक्षाही सर्वात मोठे कार्यक्षेत्र ठरू शकते .

          कार्यक्षेत्राच्या माध्यमातून सध्या दुसऱ्या स्थानावर असलेल्या आटपाडी नगरपंचायत क्षेत्रात मुळ आटपाडी गावच मुख्य स्थानी येत असल्याने, मुळ आटपाडी गावच सर्वदृष्ट्या, सर्वसंपन्न होणे अति अत्यावश्यक आहे .

          सर्वसमावेशक मध्यवर्ती ठिकाण म्हणून आटपाडी एस. टी . स्टॅन्ड लगतच्या, अनेक मोठाल्या इमारती सहच्या प्राथमिक आरोग्य केंद्राच्या रिकाम्या होणाऱ्या ७८ गुंठे निसर्गरम्य जागेतच आटपाडी नगरपंचायत मुख्यालयाचा कारभार सुरु होणे सर्व बाजुंनी न्यायाचे होणार आहे .

          आटपाडी नगरपंचायतीच्या कार्यकक्षेतील ग्रामीण रुग्णालयाचे, उपजिल्हा रुग्णालयात रूपांतर झाल्याने आणि, जिल्हा परिषदेच्या अखत्यारीतील येथील प्राथमिक आरोग्य केंद्र बंद होणार असल्याने, तेथील उपलब्ध होणाऱ्या ७८ गुंठे जागेच्या पार्श्वभूमीवर नगरपंचायतीचे मुख्यालय आटपाडी प्राथमिक आरोग्य केंद्राच्या जागेवर उभारावे . या भुमिकेतून आपण शासनासह सर्वांचे लक्ष वेधत असल्याचे सादिक खाटीक यांनी प्रारंभीच स्पष्ट केले .

          पुर्वीच्या १० एकत्रित गावांचा आटपाडी ग्रामपंचायतीत समावेश असताना, सर्वांना सोयीचे, मध्यवर्ती ठिकाण म्हणून आटपाडीचे एस . टी . स्टॅन्ड आताच्या जागेत १९६५ साली अर्थात ६ दशकापूर्वी उभे केले गेले होते. हे सर्वांनी लक्षात घेतले पाहिजे . याच एस टी . स्टॅन्डच्या मुळ जागेवर शहरातील एकच ५० कोटीचे भव्य एस . टी . स्टॅन्ड उभारले गेले पाहीजे . भविष्यात आटपाडीचाच भाग असलेली लगतची आणखी ७ गावे आटपाडी नगरपंचायतीचा भाग ठरू शकणार असल्याने मध्यवर्ती ठिकाणी सर्वांना सोयीचे म्हणूनच मुळ एस . टी . स्टॅन्ड, प्राथमिक आरोग्य केंद्र, खादी कार्यालय, श्रीनाथ मंदिरापर्यतचा परिसरच सर्वोत्तम, सर्वस्पर्शी, सर्वमान्य, सर्वप्रिय, सर्वश्रेष्ठ ठरणार आहे .

          आटपाडी प्राथमिक आरोग्य केंद्राच्या सध्याच्या जागेपासून पुर्वेला १०० मीटर अंतरावर आटपाडीचे प्रशस्त एस . टी . स्टॅन्ड आहे . उत्तरेला १०० ते ४०० मीटर अंतरावर, आटपाडी तलावापासून आटपाडी गावाला वळसा मारून गेलेले सुमारे ८० ते ९० मीटर रुंदीचे आणि ३ किमी लांबीचे भले मोठे सदैव रिकामे असणारे ओढा पात्र आहे. तर या प्राथमिक आरोग्य केंद्राच्याच पश्चिमेला २ हेक्टर १३ आर अर्थात ५ एकर १३ गुंठेचे क्षेत्र श्री . मंत्री महाराष्ट्र सेवा संघ पुणे अर्थात खांदी भांडार आटपाडी यांचे आहे . आटपाडीचा सर्वात मोठा शनिवारचा आठवडा बाजार १०० मीटर वरील याच ओढा पात्रात भरत असल्याने सर्वच बाजारकरुंना प्राथमिक आरोग्य केंद्रातल्या नगरपंचायत कारभाराचा सहज सुलभ लाभ होणार आहे . एस . टी . स्टॅन्ड पासून दीड किमी अंतरावर भरणारा मार्केट यार्डातला शेळ्या मेंढ्यांचा बाजार, प्राथमिक आरोग्य केंद्रा लगतच्या ओढापात्रात अथवा खादी भांडारशी करार वगैरेचे सनदशीर सोपस्कर करून खादी भांडारच्या ५ एकर १३ गुंठ्याच्या प्रशस्त जागेत आणणे अत्यंत व्यापक सोयी सुविधांचे आणि हजारोंच्या उपयोगाचे ठरू शकते . हा शेळ्या मेंढ्याचा बाजार खादी भांडारच्या आवारात अथवा लगतच्या ओढा पात्रात आल्यास, हा शेळ्यामेंढ्याचा, राज्यभरातला सर्वात मोठा बाजार होण्यापासून कोणीच रोखू शकणार नाही . खादी भांडार ते आटपाडी तलावापर्यतच्या विस्तीर्ण ओढापात्रात बैल, खोंडे, गायी, म्हैशी, रेडे वगैरे मोठ्या जनावरांचा प्रत्येक आठवडयात सलग ३ दिवशीय आठवडा बाजार भरविणे सर्व सोयीचे होवू शकणार आहे .

          आटपाडीच्या नगरपंचायतीचे मुख्यालय प्राथमिक आरोग्य केंद्राच्या जागेत साकारल्यास तेथील सुस्थितीतील अनेक इमारतींचा फायदा नगरपंचायतीस होवू शकतो . आटपाडी शहराच्या ओढापात्राला लागून सात फुट रूंदीची शतकापासून संरक्षक भिंत आहे . ही भिंत ओलांडून अनेकांनी ओढापात्रात शे - दोनशे फुटापर्यत प्रचंड अतिक्रमण करण्याचा सपाटा लावला आहे . शिवाय आटपाडी शहरातील अनेक ठिकाणी शासकीय जागांवर केली गेलेली अतिक्रमणे तसेच देवस्थान इनाम वर्ग ३ च्या जमिनींचे बेकायदेशीर व्यवहार त्यावरील इमारतींचे अतिक्रमण काढणे . हे आटपाडी शहराला मोठे रूप देवू शकतो . प्राथमिक आरोग्य केंद्राच्या जागेत नगरपंचायत साकारल्यास नगरपंचायतीच्या नजरे खालीही अतिक्रमणे येणार असल्याने या अतिक्रमणांना उध्वस्त करणे सहज शक्य होणार आहे . आटपाडी शहराची मुख्य बाजार पेठ, प्राथमिक आरोग्य केंद्राच्या परिसरापासून ३०० ते ४०० मीटरच्या आत येत असल्याने तसेच आटपाडी शहराच्या ७० टक्के नागरीकांच्या अर्थात शालेय विद्यार्थ्यांपासून वयोवृद्धांपर्यत सर्वांच्या सोयीचे ठिकाण प्राथमिक आरोग्य केंद्राचा परिसर ठरणार असल्याने तेथेच आटपाडी नगरपंचायतीचे मुख्यालय साकारणे तसेच नगरपंचायतीचे रूपांतर भविष्यात महानगरपालीकेत होईपर्यत प्राथमिक आरोग्य केंद्राचा परिसर विस्तारी करणासाठी सोयीचा ठरणार आहे . भग्नावस्थेकडे वाटचाल सुरू असलेला राजवाडा अर्थात सरकारवाड्याच्या जागेवर शासकीय कार्यालयासह व्यापारी संकुलाचे निर्माण करणे आणि आटपाडीच्या मुख्य पेठेतला रस्ता ५० फुटी करणे हे आटपाडी शहराच्या दृष्टीने अत्यंत महत्वाचे ठरणार आहे या सर्व पार्श्वभुमीवर आटपाडी शहराच्या सर्वांगीण व चौफेर विकासासाठी पाचही विषयावर नगरपंचायतीच्या पहिल्या मासीक मिटींग मध्ये ठराव संमत करून ते शासनाकडे पाठवून या प्रश्नांवर जोरदार पाठपुरावा करावा . असेही आवाहन सादिक खाटीक यांनी शेवटी केले आहे .